તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
સસ્તાંની લાલચ આપી હજારો લોકોને રૂ.૫૦૦ કરોડનો ચૂનો લગાવ્યો
અડધી કિંમતે લેપટોપ, સ્કૂટર આપવાનું કહી ૪૦૦૦૦ લોકો સાથે છેતરપિંડી
કોચી,તા.૧૨: તમને કોઈ એવી ઓફર આપે કે અડધી કિંમતે નવું સ્કૂટર, લેપટોપ અને ઘર માટે ઉત્તમ વસ્તુઓ મળશે. તો તમને આ બધુ એક સ્વપ્ન જેવું જ લાગશે. એમાં પણ મિડલ ક્લાસ લોકો માટે તો આવી ઓફર સુવર્ણ તક બની જાય છે. પરંતુ તમે એક કહેવત તો સાંભળી જ હશે કે, ‘લોભિયા હોય ત્યાં ધુતારા ભૂખે ન મરે.' અને કેરળમાં એવું જ બન્યું છે. જ્યાં એક ૨૮ વર્ષીય ભેજાબાજની સ્કીમની લાલચમાં હજારો લોકો ફસાયા અને રૂપિયા ગુમાવ્યા. પોલીસે યુવકની ધરપકડ કરીને પૂછપરછ કરતા તેણે ૪૦૦૦૦ લોકો સાથે છેતરપિંડી કરીને ૫૦૦ કરોડનો ચૂનો લગાવ્યો હોવાની ચોંકાવનારી વાત સામે આવી છે.
૩૦ જાન્યુઆરીના રોજ અનંથુની ધરપકડ કરવામાં આવી. પોલીસે આ છેતરપિંડી સાથે જોડાયેલા બેંક ખાતાઓ ફ્રીઝ કરી દીધા હતા જેથી પૈસાનો વ્યવહાર અટકી જાય. આ મામલાની સંપૂર્ણ તપાસ માટે SIT એટલે કે સ્પેશિયલ ઈન્વેસ્ટિગેશન ટીમની રચના કરવામાં આવી હતી. જો કે, ત્યાં સુધીમાં, ૩૦,૦૦૦થી ૪૦,૦૦૦ લોકો આ જાળમાં ફસાઈ ગયા હતા. ઘણા લોકોએ લોન લઈને રોકાણ કર્યું હતું. ૩૦૦૦થી વધુ લોકોએ ફરિયાદ નોંધાવી છે. તપાસમાં જાણવા મળ્યું કે કુલ ૫૦૦ કરોડ રૂપિયાની છેતરપિંડી થઈ છે. ફક્ત ૩૪ ફરિયાદમાં ૩૭ કરોડ રૂપિયાની છેતરપિંડીની પુષ્ટિ થઈ છે.
અનંથુ છેતરપિંડીના પૈસાથી વૈભવી જીવન જીવી રહ્યો હતો. તેણે કોચીના મરીન ડ્રાઈવમાં મોંઘા એપાર્ટમેન્ટ ભાડે લીધા હતા. તે પોતાની લક્ઝરી વસ્તુઓ પર ઘણા પૈસા ખર્ચતો હતો. તેણે ઇડુક્કી અને કોટ્ટાયમમાં ઓછામાં ઓછા પાંચ સ્થળોએ મિલકતમાં રોકાણ કર્યું હતું. અનંથુએ ચતુરાઈથી પોતાના માટે એક વિશ્વસનીય છબી બનાવી હતી. તે ફરટિદાર અંગ્રેજી બોલતો હતો અને સોશિયલ મીડિયા પર ખૂબ જ સક્રિય હતો. પોતાની યોજનાને વાસ્તવિક બનાવવા માટે તેણે સેલિબ્રિટીઓ, રાજકારણીઓ અને સરકારી અધિકારીઓ સાથે ફોટોગ્રાફ્સ પણ પડાવ્યા હતા.
તે કહેતો હતો કે મોટી કંપનીઓ CSR હેઠળ આ યોજનાને ભંડોળ આપી રહી છે. તેને વધુ વાસ્તવિક બનાવવા માટે તેણે કેટલીક કંપનીઓ અને NGO પાસેથી CSRના પૈસા માંગ્યા, પરંતુ તેને કયાંયથી પૈસા મળ્યા નહીં. ‘વુમન ઓન વ્હીલ્સ' નામનો પ્રોજેક્ટ આ કૌભાંડની સફળતાની ચાવી બન્યો. શરૂઆતના રોકાણકારોને સ્કૂટર આપવામાં આવ્યા, જેનાથી લોકોનો વિશ્વાસ વધ્યો અને વધુ લોકો રોકાણ કરવા આકર્ષાયા. ટૂંક સમયમાં આ યોજનાનો વિસ્તાર થયો અને ઘરગથ્થુ વસ્તુઓ પર ભારે ડિસ્કાઉન્ટ આપવામાં આવ્યું હતું.
પરંતુ દરેક પોન્ઝી સ્કીમની જેમ આખરે પૈસા ખતમ થઈ ગયા અને હજારો લોકો છેતરાયા. કેરળ પોલીસને ફરિયાદ મળ્યા બાદ તપાસ શરૂ થઈ. પોલીસે કહ્યું શરૂઆતમાં કૌભાંડની ગંભીરતાનો ખ્યાલ નહોતો. કેટલાક નસીબદાર લોકોને ખરેખર સ્કૂટર અને લેપટોપ મળ્યા, જેથી યોજનામાં વિશ્વાસ મજબૂત થઈ શકે, પરંતુ પછી વસ્તુઓ ખોટી થવા લાગી. લોકોની ફરિયાદો વધવા લાગી અને મામલો પોલીસ સુધી પહોંચતાં કૌભાંડનો પર્દાફાશ થયો હતો.
(12:15 PM IST)
છેલ્લા 8 દિવસમાં સૌથી લોકપ્રિય 
