નવી દિલ્હી તા.૨૩

 ટ્રમ્પે કહ્યું, ચૂંટણી માટે ભારતને ભંડોળ પૂરું પાડવું બિનજરૂરી છે કારણ કે તેમને કોઈ નાણાકીય મદદની જરૂર નથી, તેમણે દાવો કર્યો હતો કે ભારત અમેરિકાનો "લાભ ઉઠાવે છે" અને વૈશ્વિક સ્તરે સૌથી વધુ ટેરિફ લાદે છે.

    અમેરિકાના રાષ્ટ્રપતિ તરીકે ડોનાલ્ડ ટ્રમ્પે શપથ ગ્રહણ કર્યા બાદ દરરોજ મોટી અપડેટ સામે આવી રહી છે. આ તરફ હવે ડોનાલ્ડ ટ્રમ્પે ફરી એકવાર યુનાઇટેડ સ્ટેટ્સ એજન્સી ફોર ઇન્ટરનેશનલ ડેવલપમેન્ટ (USAID) દ્વારા ભારતને આપવામાં આવેલા ભંડોળ પર હુમલો કર્યો છે. આ સાથે દાવો કર્યો છે કે, તેમણે ચૂંટણીમાં મદદ કરવા માટે ભારતને '18 મિલિયન ડોલર' આપ્યા હતા. ટ્રમ્પે કહ્યું કે, ચૂંટણી માટે ભારતને ભંડોળ પૂરું પાડવું બિનજરૂરી છે કારણ કે તેમને કોઈ નાણાકીય મદદની જરૂર નથી. તેમણે દાવો કર્યો હતો કે ભારત અમેરિકાનો "લાભ ઉઠાવે છે" અને વૈશ્વિક સ્તરે સૌથી વધુ ટેરિફ લાદે છે.

તે આપણો ફાયદો ઉઠાવે છે: ડોનાલ્ડ ટ્રમ્પ

અમેરિકાના રાષ્ટ્રપતિ ડોનાલ્ડ ટ્રમ્પે કહ્યું કે, ચૂંટણી માટે ભારતને પૈસા આપી રહ્યા છો? તેમને પૈસાની જરૂર નથી. તેઓ આપણો ફાયદો ઉઠાવે છે. તેઓ વિશ્વમાં સૌથી વધુ ટેરિફ ધરાવતા દેશોમાંનો એક છે. તેમની પાસે 200 ટકા ટેરિફ છે અને છતાં અમે તેમને ચૂંટણી માટે મોટી રકમ આપીએ છીએ. નોંધનિય છે કે, આ ચોથી વખત છે જ્યારે ટ્રમ્પે ભારતમાં મતદારોની ભાગીદારી વધારવા માટે USAID ભંડોળ અંગેના પોતાના દાવાને પુનરાવર્તિત કર્યો છે. અગાઉ પણ તેમણે આ મુદ્દા પર પ્રશ્નો ઉઠાવ્યા હતા અને કહ્યું હતું કે, આ ભંડોળ બીજા કોઈને ચૂંટણી જીતવામાં મદદ કરવા માટે કરવામાં આવ્યું હતું.

ટૂંક સમયમાં હકીકતો બહાર આવશે

અગાઉ વિદેશ મંત્રી એસ જયશંકરે શનિવારે કહ્યું હતું કે, સરકાર ટ્રમ્પ વહીવટીતંત્ર દ્વારા ભારતીય ચૂંટણીઓમાં સંભવિત વિદેશી હસ્તક્ષેપ અંગે આપવામાં આવેલા નિવેદનોની તપાસ કરી રહી છે. તેમણે કહ્યું કે, ટૂંક સમયમાં હકીકતો બહાર આવશે. એક કાર્યક્રમમાં બોલતા જયશંકરે કહ્યું કે, USAID ને સદ્ભાવના સાથે ભારતમાં કામ કરવાની મંજૂરી આપવામાં આવી હતી. જોકે તેમણે એમ પણ કહ્યું કે, હવે અમેરિકા તરફથી એવા સંકેતો મળી રહ્યા છે કે, કેટલીક પ્રવૃત્તિઓ ખરાબ ઇરાદા સાથે કરવામાં આવી રહી છે.

સરકાર આ મામલાની કરી રહી છે તપાસ 

વિદેશમંત્રી જયશંકરે કહ્યું, મને લાગે છે કે ટ્રમ્પ વહીવટીતંત્રના કેટલાક લોકોએ કેટલીક માહિતી જાહેર કરી છે, જે ચોક્કસપણે ચિંતાજનક છે. આ સૂચવે છે કે, કેટલીક પ્રવૃત્તિઓ ચોક્કસ હેતુ સાથે હાથ ધરવામાં આવી રહી છે, જેથી કોઈ ચોક્કસ કથા અથવા વિચારધારાને પ્રોત્સાહન આપી શકાય. તેમણે કહ્યું કે, સરકાર આ મામલાની સક્રિય તપાસ કરી રહી છે. સરકાર તરીકે અમે આ બાબતની તપાસ કરી રહ્યા છીએ કારણ કે આવી સંસ્થાઓએ તેમની પ્રવૃત્તિઓની જાણ કરવી જરૂરી છે. મને વિશ્વાસ છે કે, હકીકતો ટૂંક સમયમાં બહાર આવશે.