બીજીંગ, તા.૨૫: નોકરી મેળવવા માટે લાયકાત અને ક્ષમતા જરૂરી છે, પરંતુ ચીનની એક કંપનીએ એક અનોખી શરત મૂકી છે. અહીં, જો તમે અપરિણીત છો કે છૂટાછેડા લીધેલા છો, તો તમને ઓફિસમાં સ્‍થાન મળશે નહીં. વધુમાં, જે કર્મચારીઓ સપ્‍ટેમ્‍બર સુધી કુંવારા રહ્યા તેમને બરતરફ કરવાની ધમકી આપવામાં આવી હતી. હકીકતમાં, કંપનીએ તેના અપરિણીત અને સિંગલ કર્મચારીઓને ધમકીભર્યો મેઇલ મોકલ્‍યો હતો, જેમાં લખ્‍યું હતું કે જો અપરિણીત કર્મચારીઓ આ વર્ષે સપ્‍ટેમ્‍બરના અંત સુધીમાં લગ્ન નહીં કરે તો તેઓ તેમની નોકરી ગુમાવશે. જોકે, ટીકા બાદ, કંપનીએ એક જ દિવસમાં આ નિયમને નકારી કાઢયો.

પૂર્વી ચીનના શેનડોંગ પ્રાંતમાં શુન્‍ટિયન કેમિકલ ગ્રુપે જાન્‍યુઆરીમાં એક નીતિની જાહેરાત કરી હતી જેમાં કંપનીના લગ્ન દરને વધારવાનું વચન આપવામાં આવ્‍યું હતું. આ નીતિ હેઠળ, શુન્‍ટિયન કેમિકલ ગ્રુપમાં કામ કરતા ૨૮-૫૮ વર્ષની વયના તમામ સિંગલ અથવા છૂટાછેડા લીધેલા કર્મચારીઓને લગ્ન કરવા માટે કડક સૂચના આપવામાં આવી હતી. જો આવા કર્મચારીઓ જૂનના અંત સુધીમાં લગ્ન ન કરે તો તેમનું મૂલ્‍યાંકન કરવામાં આવશે.

સપ્‍ટેમ્‍બર સુધી કુંવારા રહેલા કર્મચારીઓને બરતરફ કરવાની ધમકી આપવામાં આવી હતી. ચીન સરકારે દેશમાં લગ્ન દર વધારવાની વિનંતી કર્યા બાદ કંપનીએ આ પગલું ભર્યું. કંપનીએ જાહેરાતમાં જણાવ્‍યું હતું કે, લગ્ન દર સુધારવા માટે સરકારના આહ્વાનનો જવાબ ન આપવો એ વિશ્વાસઘાત હશે.

જ્‍યારે અધિકારીઓને આ નિયમની ખબર પડી, ત્‍યારે તેમણે કંપનીને સખત ઠપકો આપ્‍યો. એક સરકારી અધિકારીએ જણાવ્‍યું હતું કે આ ચીનના શ્રમ કાયદાનું ઉલ્લંઘન છે. સ્‍થાનિક માનવ સંસાધન અને સામાજિક સુરક્ષા બ્‍યુરોએ જણાવ્‍યું હતું કે તેઓએ ૧૩ ફેબ્રુઆરીએ કંપનીનું નિરીક્ષણ કર્યું હતું. આ પછી, કંપનીએ બીજા જ દિવસે આ પોલિસી પાછી ખેંચી લીધી.