વિદેશી રોકાણકારોએ અત્યાર સુધીમાં રૂ.૧,૧૫,૬૩૫ કરોડ પાછા ખેંચી લીધા
વિદેશી રોકાણકારો ભારતીય બજારમાંથી મોટા પ્રમાણમાં નાણાં પાછા ખેંચી રહ્યા છેઃ શું એક અનિચ્છનીય રેકોર્ડ બનશે? સપ્ટેમ્બરથી એકધારી એકઝીટ : શેરબજાર તેની ટોચથી ૧૪ ટકા નીચે આવી ગયું છે, નાણાકીય વર્ષ ૨૦૨૨માં FII એ ૧.૪૦ લાખ કરોડ રૂપિયા ઉપાડ્યા હતા
નવી દિલ્હી, તા.૨૫: સતત પાંચ દિવસના ઘટાડા બાદ, આજે સ્થાનિક શેરબજારમાં તેજી જોવા મળી રહી છે. પરંતુ ગયા વર્ષે ઓક્ટોબરથી તેમાં નોંધપાત્ર ઘટાડો થયો છે. આનું એક મુખ્ય કારણ એ છે કે વિદેશી રોકાણકારો ભારતીય બજારમાંથી મોટા પ્રમાણમાં નાણાં પાછા ખેંચી રહ્યા છે. એવી આશંકા છે કે નાણાકીય વર્ષ ૨૦૨૪-૨૫માં આ ઉપાડ રેકોર્ડ સ્તરે પહોંચી શકે છે. અત્યાર સુધી આ અનિચ્છનીય રેકોર્ડ નાણાકીય વર્ષ ૨૦૨૨ માં બન્યો હતો જ્યારે વિદેશી રોકાણકારોએ રૂ.૧,૪૦,૦૧૦ કરોડ પાછા ખેંચી લીધા હતા. નેશનલ સિકયોરિટીઝ ડિપોઝિટરી લિમિટેડના ડેટા અનુસાર, ચાલુ નાણાકીય વર્ષમાં FII ઉપાડ રૂ.૧,૧૫,૬૩૫ કરોડ સુધી પહોંચી ગયો છે. જાન્યુઆરી અને ફેબ્રુઆરી ૨૦૨૫ માં વેચાણની ગતિ વધી છે. આ જ કારણ છે કે નાણાકીય વર્ષ ૨૫ માં FII ઉપાડ FY૨૨ ના આંકડાને વટાવી શકે છે.
માહિતી અનુસાર, જાન્યુઆરીમાં વિદેશી રોકાણકારોએ રૂ.૭૮,૦૦૦ કરોડ પાછા ખેંચી લીધા હતા. ભારતીય મૂડી બજારોના ઇતિહાસમાં આ બીજો સૌથી મોટો માસિક આઉટફ્લો છે. ગયા વર્ષે ઓક્ટોબરમાં આનાથી પણ મોટી ઉપાડ થયો હતો. પછી તેમણે રૂ.૯૪,૦૦૦ કરોડ ઉપાડી લીધા હતા. ફેબ્રુઆરીમાં પણ અત્યાર સુધીમાં રૂ.૨૭,૧૪૧ કરોડના ઉપાડ થયા છે. ગયા નાણાકીય વર્ષમાં, રૂ.૨૦૮,૨૧૨ કરોડના રોકાણો પ્રાપ્ત થયા હતા. સપ્ટેમ્બરના અંતથી FII સતત ભારતીય શેર વેચી રહ્યા છે. આનાથી બજાર અને અર્થતંત્રના સ્વાસ્થ્ય અંગે ચિંતા વધી રહી છે.
વિદેશી રોકાણકારો દ્વારા કરવામાં આવેલી વેચાણને કારણે, બીએસઈ સેન્સેક્સ અને એનએસઈ નિફ્ટી સપ્ટેમ્બર ૨૦૨૪ ના તેમના ઉચ્ચતમ સ્તરથી લગભગ ૧૪% ઘટયા છે. આ મોટા પાયે આઉટફ્લોને કારણે ડોલર સામે ભારતીય રૂપિયાની કિંમત પણ નબળી પડી છે. રૂપિયાના ઘટાડાને રોકવા માટે RBI ને અબજો ડોલર ખર્ચવા પડ્યા છે. આ વેચાણ પાછળ અનેક કારણો છે. આનું પહેલું કારણ એ છે કે FII ચીન જેવા બજારોમાં રોકાણ કરી રહ્યા છે. અમેરિકાના રાષ્ટ્રપતિ ડોનાલ્ડ ટ્રમ્પની વેપાર નીતિ અને ઉભરતા બજારો પર તેની અસર પણ એક કારણ છે.
છેલ્લા કેટલાક મહિનામાં યુએસ બોન્ડ અને ડોલર મજબૂત થયા છે, જેના કારણે FII તેમના તરફ વળી રહ્યા છે. ઓક્ટોબર ૨૦૨૪ થી ભારતનું માર્કેટ કેપ લગભગ ૧ ટ્રિલિયન ઘટયું છે જ્યારે ચીનનું માર્કેટ કેપ ૨ ટ્રિલિયન વધ્યું છે. નિષ્ણાતો કહે છે કે ભારતીય શેર ઇન્ડોનેશિયા, દક્ષિણ કોરિયા અને તાઇવાન જેવા દેશો કરતાં વધુ મોંઘા છે. જોકે, ભારતની અર્થવ્યવસ્થા અને અન્ય પરિબળો લાંબા ગાળે મજબૂત હોવાથી આગામી ૩-૬ મહિનામાં FII રોકાણ ભારતમાં પાછું આવી શકે છે. (રર.૧૬)
(3:10 PM IST)
છેલ્લા 8 દિવસમાં સૌથી લોકપ્રિય 
