સરકારી મકાનોના સમારકામ માટે સાંસદો ૫ લાખ રૂપિયા ખર્ચ કરી શકશેઃ ૨૩૦ ટકાનો વધારો
લોકસભાના અધિકારીઓના જણાવ્યા અનુસાર, ઘણા સાંસદોએ સેન્ટ્રલ પબ્લિક વર્ક્સ ડિપાર્ટમેન્ટ (CPWD)ને તેમના રહેઠાણોમાં જરૂરી ફેરફારો કરવા વિનંતી કરી હતી
નવી દિલ્હી, તા.૫: સાંસદો હવે તેમના સરકારી નિવાસસ્થાનોમાં ફેરફાર અથવા સમારકામ કરવા માટે વધુ પૈસાનો ઉપયોગ કરી શકશે. લોકસભાની ગળહ સમિતિએ આ માટેની રકમની મર્યાદા ૧.૫ લાખ રૂપિયાથી વધારીને ૫ લાખ રૂપિયા કરી છે, જે ૨૩૦%નો વધારો છે. આ નિર્ણય સાંસદોની જરૂરિયાતોને ધ્યાનમાં રાખીને લેવામાં આવ્યો છે, કારણ કે ઘણા સાંસદો તેમના નિવાસસ્થાનોમાં ઓફિસ, ગેસ્ટ રૂમ અથવા અન્ય જરૂરી સુવિધાઓ ઉમેરવા માંગે છે. ઉત્તર અને દક્ષિણ એવન્યુમાં સ્થિત સાંસદોના બંગલા અને ફ્લેટ ખૂબ જૂના છે, જેના કારણે સમારકામ અને ફેરફારનો ખર્ચ વધી રહ્યો હતો.
લોકસભા સચિવાલયના એક પરિપત્રમાં જણાવાયું છે કે, સાંસદોના નિવાસસ્થાનમાં વધારાના બાંધકામ/સુધારણા માટેની નાણાકીય મર્યાદા ૧,૫૦,૦૦૦ રૂપિયાથી વધારીને ૫,૦૦,૦૦૦ રૂપિયા કરવામાં આવી છે. લોકસભાના અધિકારીઓના જણાવ્યા અનુસાર, ઘણા સાંસદોએ સેન્ટ્રલ પબ્લિક વર્ક્સ ડિપાર્ટમેન્ટને તેમના રહેઠાણોમાં જરૂરી ફેરફારો કરવા વિનંતી કરી હતી. નવી દિલ્હી મ્યુનિસિપલ કાઉન્સિલ વિસ્તારમાં સરકારી ઇમારતોના બાંધકામ અને સમારકામ માટે CPWD એકમાત્ર અધિકળત એજન્સી છે.
તેમાં એમ પણ કહેવામાં આવ્યું છે કે, સીપીડબલ્યુડીને સાંસદોના નિવાસ સ્થાનમાં કરવામાં આવનારા ફેરફારોનો ખર્ચ આકારણી કરવાનો અને ખાતરી કરવાનો નિર્દેશ આપવામાં આવ્યો છે કે તમામ કાર્ય સંબંધિત માર્ગદર્શિકા અને નિયમોનું પાલન કરીને હાથ ધરવામાં આવે.
અગાઉ, ડિસેમ્બર ૨૦૧૯માં, તત્કાલીન ગળહમંત્રી હરદીપ સિંહ પુરીએ સંસદમાં માહિતી આપી હતી કે સરકારે લુટિયન્સ વિસ્તારમાં સાંસદોના બંગલાના સમારકામ અને નવીનીકરણ માટે પાંચ વર્ષમાં ૧૯૩ કરોડ રૂપિયા ખર્ચ કર્યા છે. તેમણે એમ પણ કહ્યું કે સમારકામ પર ખર્ચ માટે કોઈ મહત્તમ મર્યાદા નક્કી કરવામાં આવી નથી.
ઉલ્લેખનીય છે કે લુટિયન્સ દિલ્હીના બંગલાને હેરિટેજ સ્ટ્રક્ચર ગણવામાં આવે છે, પરંતુ નરેન્દ્ર મોદી સરકારના બીજા કાર્યકાળ દરમિયાન, નોર્થ એવન્યુમાં આધુનિક ડુપ્લેક્સ બંગલાઓ બનાવવામાં આવ્યા હતા, જેના માટે કેટલાક જૂના ફ્લેટ તોડી પાડવામાં આવ્યા હતા.
(4:08 PM IST)
છેલ્લા 8 દિવસમાં સૌથી લોકપ્રિય 
