બેંગલુરુ, તા.૬

ભારતીય જનતા પાર્ટીના સાંસદ તેજસ્વી સૂર્યાએ ગુરુવારે એક ખાનગી સમારંભ યોજી કર્ણાટકની પ્રસિદ્ધ સિંગર શિવશ્રી સ્કંદપ્રસાદ સાથે લગ્ન કરી લીધા છે. આ લગ્ન મીડિયાની નજરોથી દૂર રહ્યા. આ લગ્નમાં ફક્ત પરિવારના નજીકના લોકો અને રાજકીય હસ્તીઓ જ જોડાઈ હતી. કેટલાક રાજકીય નેતાઓએ આ ખુશીની પળને સોશિયલ મીડિયા પર શેર કરી નવવિવાહિત કપલને શુભકામનાઓ આપી છે.

પ્રમુખ મહેમાનોમાં ભાજપના નેતા અન્નામલાઈ, પ્રતિપ સિંહા અને અમિત માલવીય હતા, જેમને લગ્નની તસવીરોમાં જોઈ શકાય છે. કર્ણાટક ભાજપના અધ્યક્ષ બીએસ યેદિયુરપ્પા અને કેન્દ્રીય મંત્રી વી. સોમન્ના પણ આ પ્રસંગે હાજર હતા. તેમણે આ ખુશીના પળને સોશિયલ મીડિયા પર શેર કરી છે.

પરંપરાગત લગ્ન પછી સુર્યાના વતન બેંગલુરુના ગાયત્રી વિહાર મેદાનમાં એક ભવ્ય રિસેપ્શન યોજાશે. લગ્ન પછીની વિધિઓમાં ૬ માર્ચે કાશી યાત્રા, જેરિગે બેલા મુહૂર્ત અને લાજા હોમ સામેલ છે. જેરિગે બેલા દક્ષિણ ભારતીય લગ્નની મહત્વપૂર્ણ વિધિ છે, જેને મુહૂર્ત સમય માનવામાં આવે છે, જ્યારે લાજા હોમ હિંદુ પરંપરા છે, જેમાં વધૂ પવિત્ર અગ્નિમાં તળેલા અનાજ અર્પણ કરે છે.

શિવશ્રી સ્કંદપ્રસાદ એક બહુમુખી કલાકાર છે, જેમને કર્ણાટિક સંગીત, ભરતનાટ્યમ અને દૃશ્ય કળામાં નિપુણતા પ્રાપ્ત છે, જે પરંપરાગત અને આધુનિક અભિવ્યક્તિઓનું સરળ મિશ્રણ છે. સંગીત ક્ષેત્રે તેણે ગુરુ એ.એસ. મુરલી પાસેથી કર્ણાટિક સંગીતની તાલીમ લીધી છે અને બ્રહ્મા ગાના સભા અને કર્તિક ફાઇન આર્ટ્સ જેવા પ્રતિષ્ઠિત મંચો પર પ્રદર્શન કર્યું છે.

તેમની કળાત્મક યાત્રાએ તેમને ડેનમાર્ક અને દક્ષિણ કોરિયા જેવા દેશોમાં સાંસ્કૃતિક આદાનપ્રદાન કાર્યક્રમોમાં ભાગ લેવાનો અવસર આપ્યો છે. શૈક્ષણિક દ્રષ્ટિકોણથી તેમણે સસ્ત્ર યુનિવર્સિટીમાંથી બાયોઇન્જિનિયરિંગમાં ડિગ્રી મેળવી છે અને મદ્રાસ યુનિવર્સિટીમાંથી ભરતનાટ્યમમાં માસ્ટર ડિગ્રી મેળવી છે. આ ઉપરાંત, તેમણે સંસ્કૃતનો અભ્યાસ કર્યો છે અને આયુર્વેદિક કોસ્મેટોલોજીમાં ડિપ્લોમા પણ મેળવ્યો છે, જે તેમના વિવિધ કુશળતાને વધુ સમૃદ્ધ બનાવે છે.