સંભલ(યુપી) તા.૭: હોળીનો તહેવાર વર્ષમાં એક જ વખત આવે છે, જે લોકોને તેનાથી તકલીફ હોય તેઓએ ઘરમાં રહેવું જોઈએ, તેવા સુભલના એક પોલીસ અધિકારીએ કરેલાં નિવેદન સામે ઉત્તર-દેશના વિપક્ષોએ ઉગ્ર વિરોધ નોંધાવ્‍યો છે. વિપક્ષોએ આ અધિકારીના નિવેદનને પક્ષપાતપૂર્ણ ગણાવી તેમની સામે પગલાં લેવાની માગ કરી છે.

આ વખતે હોળી અને પવિત્ર રમઝાન માસના શુક્રવારની નમાજ એક જ દિવસે છે. આથી કોઈ અનિચ્‍છનીય ઘટના ના બને તે માટે ગુરૂવારે સંભલના કોટવાલી પોલીસ સ્‍ટેશન ખાતે શાંતિ સમિતિની બેઠક યોજાઈ હતી. શાંતિ સમિતિની બેઠક બાદ સંભલના સર્કલ અધિકારી અનુજ ચૌધરીએ જણાવ્‍યું હતું કે, હોળીનો તહેવાર વર્ષમાં એક જ વખત આવે છે, જ્‍યારે શુક્રવારની નમાજ વર્ષમાં ૫૨ વખત આવે છે. જો કોઈને હોળીના રંગોથી અસહજતા અનુભવાતી હોય તો તેમણે તે દિવસે ઘરમાં જ રહેવું જોઈએ. આ દિવસે ઘરની બહાર નીકળનારા લોકો મુક્‍ત વિચારસરણી ધરાવતાં લોકો હશે કારણ કે તહેવારોની ઉજવણી સાથે મળીને જ કરાય છે.

તેમણે સમગ્ર વિસ્‍તારમાં કાયદા અને શાસનની સ્‍થિતિ જાળવી રાખવા માટે સામુદાયિક સદભાવના અને ચુસ્‍ત બંદોબસ્‍ત પર ભાર મુકયો હતો, બંને તહેવારોની ઉજવણી શાંતિપૂર્ણ રીતે થાય તે માટે છેલ્લાં એક મહિનાથી વિવિધ સ્‍તરે શાંતિ સમિતિની બેઠક યોજાઈ રહી છે. ચૌધરીએ બંને સમુદાયના લોકોને એકબીજાની લાગણીનું સન્‍માન કરવા જણાવી ઉમેર્યું હતું કે, જે લોકો હોળીની ઉજવણીમા ભાગ લેવા ના ઈચ્‍છતા હોય તેમની પર જબરદસ્‍તીથી રંગ ના લગાવશો. જે રીતે મુસ્‍લિમો ઈદની આતુરતાપૂર્વક રાહ જુવે છે, તેવી જ રીતે હિન્‍દુઓને પણ હોળીના આગમનનો ઉત્‍સાહ હોય છે. બંને તહેવારોમાં એકતા અને પારસ્‍પારિક સન્‍માનનો ભાવ છે.

સમાજવાદી પાર્ટીના પ્રવક્‍તા શર્વેન્‍દ્ર બિક્રમ સિંઘે ચૌધરીના નિવેદનની ટીકા કરતાં જણાવ્‍યું હતું કે, પોલીસ અધિકારીએ ભાજપના એજન્‍ટ તરીકે વર્તવાની જરૂર નથી. મુખ્‍યમંત્રીની પાસેથી જે સાંભળવા મળે છે તેનું અનુકરણ કરી અધિકારીઓ તેમની નિકટ રહેવા પ્રયાસો કરે છે. આવા નિવેદન કરનારા અધિકારી સામે કાર્યવાહી થવી જોઈએ.(૩૮.૩)