નવી દિલ્‍હી તા.૭: હવે માતા-પિતા બંનેની પરવાનગી વિના સગીર માટે પાસપોર્ટ મેળવવો સરળ રહેશે નહીં. જો કોઈ સિંગલ પેરેન્‍ટ પાસપોર્ટ માટે અરજી કરે તો તેણે પહેલા કરતાં વધુ માહિતી અને પૂરક દસ્‍તાવેજો આપવા પડશે. એટલું જ નહીં, તેણે બીજા વાલી પાસેથી સંમતિ ન મળવાનું કારણ પણ સમજાવવું ૫ડશે.

વિદેશ મંત્રાલયે તાજેતરમાં સગીરની અરજી સાથે જોડાયેલા એનેક્‍સર c  (માતાપિતા તરફથી ઘોષણા)માં ફેરફાર કર્યા છે. જો એનેક્‍સર-CCમાં સાચી માહિતી આપવામાં નહીં આવે તો પાસપોર્ટ અરજી ધ્‍યાનમાં લેવામાં આવશે નહીં. જો સગીરના પાસપોર્ટ અરજી સાથે બંને માતાપિતાની સંમતિ આપવામાં આવે તો એનેક્‍સર-D ભરવું પડશે. જો સિંગલ પેરેન્‍ટ દ્વારા સંમતિ આપવામાં આવે તો એનેક્‍સર-C ભરવું પડશે.

અરજી કરનાર વાલી વતી બીજા વાલી પાસેથી સંમતિ ન મેળવવાનું કારણ તેમનું વિદેશમાં રહેઠાણ હોવાનું જણાવવામાં આવ્‍યું હતું. અગાઉ આવા કિસ્‍સાઓમાં વિદેશમાં રોકાણનો પુરાવો આપવો ફરજિયાત નહોતો. આ ઉપરાંત જ્‍યારે કોર્ટમાં છૂટાછેડાનો કેસ ચાલી રહ્યો હોય ત્‍યારે સિંગલ પેરેન્‍ટ દ્વારા અરજી પર તેના માટે એ માહિતી આપવી ફરજિયાત નહોતી કે તેને કોર્ટ દ્વારા બાળકની કસ્‍ટડી આપવામાં આવી છે કે નહીં. પાસપોર્ટ બનાવતી વખતે એવા દસ્‍તાવેજો સબમિટ કરવાની કોઈ જરૂર નહોતી જેમાં પાસપોર્ટ જારી કરવા પર કોર્ટ દ્વારા કોઈ શરત કે પ્રતિબંધ લાદવામાં આવ્‍યો ન હોય.(૩૮.૨)