ઈસ્લામાબાદ તા.૧૧ ; બલૂચ લિબરેશન આર્મી (BLA) એ પાકિસ્તાનના બલૂચિસ્તાન પ્રાંતના બોલાન વિસ્તારમાં જાફર એક્સપ્રેસ ટ્રેનને હાઈજેક કરી લીધી છે. આતંકવાદીઓએ ટ્રેનમાં 120 મુસાફરોને બંધક બનાવ્યા હતા અને 6 જવાનોની હત્યા કરી હતી. BLAએ ચેતવણી આપી છે કે જો પાકિસ્તાની સેના તેમની વિરુદ્ધ કોઈ સૈન્ય કાર્યવાહી કરશે તો તમામ બંધકોને મારી નાખવામાં આવશે. BLAએ એક નિવેદન બહાર પાડીને હુમલાની જવાબદારી સ્વીકારી અને તેને "પૂર્વ આયોજિત લશ્કરી કાર્યવાહી" ગણાવી. સંગઠને કહ્યું કે "અમારા સ્વાતંત્ર્ય સેનાનીઓએ મશ્કફ, ધાધર, બોલાનમાં રેલ્વે પાટા ઉડાવી દીધા, જાફર એક્સપ્રેસને રોકવાની ફરજ પડી. આ પછી અમારા લડવૈયાઓએ સંપૂર્ણ રીતે ટ્રેન પર કબજો કરી લીધો અને તમામ મુસાફરોને બંધક બનાવી લીધા."

જો પગલાં લેવામાં આવશે તો તેના ગંભીર પરિણામો આવશે

BLAએ પાકિસ્તાની સેનાને ધમકી આપતા કહ્યું કે જો સેના તેમની સામે કોઈ કાર્યવાહી કરશે તો તેના પરિણામો અત્યંત ખતરનાક હશે. BLAના પ્રવક્તા ઝિઆંદ બલોચે કહ્યું, "જો પાકિસ્તાની સેના કોઈપણ પ્રકારની સૈન્ય કાર્યવાહી કરશે તો તમામ બંધકોને મારી નાખવામાં આવશે અને તેની સંપૂર્ણ જવાબદારી પાકિસ્તાની સેનાની રહેશે." BLAએ કહ્યું કે આ હુમલો તેમના વિશેષ દળો દ્વારા કરવામાં આવ્યો હતો. જેમાં ‘માજીદ બ્રિગેડ, એસટીઓએસ અને ફતેહ સ્ક્વોડ’નો સમાવેશ થાય છે. સંગઠને કહ્યું કે જો પાકિસ્તાની સેના કોઈ જવાબી કાર્યવાહી કરશે તો તેઓ પણ પૂરી તાકાતથી જવાબ આપશે.

અત્યાર સુધીમાં 6 જવાનોના મોતની પુષ્ટિ કરવામાં આવી છે

BLAના નિવેદન અનુસાર, "અત્યાર સુધીમાં 6 પાકિસ્તાની સૈનિકો માર્યા ગયા છે અને ટ્રેનમાં સવાર સેંકડો મુસાફરો BLAની કસ્ટડીમાં છે." સંગઠને એવો પણ દાવો કર્યો હતો કે આ હુમલો પાકિસ્તાની સેના સામે ચાલી રહેલા તેમના સંઘર્ષનો એક ભાગ હતો. પાકિસ્તાનમાં તાજેતરના વર્ષોમાં ટ્રેન હાઈજેકની આ સૌથી મોટી ઘટના માનવામાં આવે છે. પાકિસ્તાન સરકાર તરફથી હજુ સુધી કોઈ સત્તાવાર નિવેદન આવ્યું નથી, પરંતુ સુરક્ષા એજન્સીઓ આ બાબત પર નજર રાખી રહી છે.