છેલ્લા 8 દિવસમાં સૌથી લોકપ્રિય હેં...વારાણસીમાં ભાજપનો પરાજય 9:51 AM
પાંચ મહિલા પર દુષ્કર્મ કરનારા ભારતીયને ૪૦ વર્ષની જેલની સજા
૪૦ વર્ષની જેલની સજામાંથી ૩૦ વર્ષ તો તેને પેરોલ પણ નહીં મળે : તેની જેલની સજા પૂરી થશે ત્યારે તે ૮૩ વર્ષનો થઈ ગયો હશે : બાલેશ ધનખડ નામના આ શખ્સ પર પાંચ કોરિયન યુવતીઓ પર દુષ્કર્મનો આરોપ છે : તેણે આ યુવતીઓને જોબના બહાને બોલાવી નશીલી દવા આપી બેભાન કરીને તેમના પર કુકર્મ આચર્યુ હતું
સિડની, તા.૧૨: ઓસ્ટ્રેલિયામાં એક ભારતીયને પાંચ કોરિયન યુવતીઓ પર દુષ્કર્મના ગુનામાં ૪૦ વર્ષની જેલની સજા ફટકારવામાં આવી છે. આ ૪૦ વર્ષની સજામાં ૩૦ વર્ષનો નોન-પેરોલ પીરિયડ પણ સામેલ છે. એટલે કે તેને ૩૦ વર્ષ સુધી તો પેરોલ પણ નહીં મળે. ઓસ્ટ્રેલિયામાં આ શખ્સ પોતાને સમાજસેવક જણાવતો હતો. તેની ધરપકડ કરવામાં આવી ત્યાં સુધી તેનું હિંદુ સમુદાયમાં સન્માનથી નામ લેવાતું હતું. પણ જ્યારે હવે તેનો ભાંડો ફૂટી ગયો છે તો બધા તેના પર ફિટકાર વરસાવવા લાગ્યા છે અને ભારતનું નામ બદનામ કરવા બદલ તેના પર રોષ ઠાલવી રહ્યા છે. ૪૩ વર્ષના બાલેશ ધનખડને ૪૦ વર્ષની જેલની સજા ફટકારતા ડાઉનિંગ સેન્ટર ડિસ્ટ્રીક્ટ કોર્ટના જજ માઈકલ કિંગે કહ્યું કે, તેનો ગુનો સુયોજિત, ઘણો હિંસક અને ચાલાકીભર્યો હતો, જેને પૂરા ઈરાદા સાથે અંજામ આપવા આવ્યો હતો. જજે કહ્યું કે, કામેચ્છા પૂરી કરવા માટે બાલેશનો વ્યવહાર દરેક પીડિત મહિલા પ્રત્યે નિર્દય હતો.
બાલેશ જોબની ફેક એડવર્ટાઈઝમેન્ટ આપીને યુવતીઓને પોતાના સિડની ખાતેના ઘરે કે તેની આસપાસના વિસ્તારોમાં બોલાવતો હતો. પછી તેમને નશીલી દવા આપી બેભાન કરીને તેમના પર દુષ્કર્મ કરતો હતો. તેણે યુવતીઓ પર દુષ્કર્મ કરતો હતો તેના વિડીયો પણ બનાવ્યા હતા. વિડીયોમાં જોઈ શકાય છે કે, ૨૧થી ૨૭ વર્ષની આ યુવતીઓ બેભાન હતી અને તેમની હાલત ઘણી ખરાબ હતી. એટલું જ નહીં, બાલેશે એક એક્સલ શીટ પણ બનાવી હતી, જેમાં તે ઈન્ટર્વ્યુ માટે આવતી યુવતીઓની બધી માહિતી નોંધી રાખતો હતો. સ્પેડશીટમાં તેણે યુવતીઓને તેમના દેખાવ અને બુદ્ધિમતાના આધારે રેટિંગ આપેલા હતા તેમજ દરેક પીડિતા સાથેની તેની વાતચીત, યુવતીઓની બધી ડિટેઈલ્સ, તેમની નબળાઈ વગેરે બાબતો પણ નોંધેલી હતી.
રિપોર્ટમાં જણાવાયું છે કે, વર્ષ ૨૦૧૮માં ધરપકડ કરાઈ તે પહેલા સુધી ધનખડ ભારતીય-ઓસ્ટ્રેલિયન સમુદાયમાં ઘણું સન્માન હતું. તેણે ભાજપનું એક સેટેલાઈટ ગ્રૂપ બનાવ્યું હતું અને હિંદુ કાઉન્સિલ ઓફ ઓસ્ટ્રેલિયાના પ્રવક્તા તરીકે પણ કામ કરતો હતો.જે ઓસ્ટ્રેલિયાનું એક શક્તિશાળી સંગઠન મનાય છે. તે ‘ઓવરસીઝ ફ્રેન્ડસ ઓફ બીજેપી' સંગઠનનો પ્રમુખ રહી ચૂક્યો છે. તે ABC, બ્રિટિશ અમેરિકન ટોબેકો, ટોયોટા અને સિડની ટ્રેન્સની ઓર્ગેનાઈઝેન્શમાં ડેટા વિઝ્યુલાઈઝેશન કન્સલ્ટન્ટ તરીકે કામ કર્યું હતું.તે મૂળ હરિયાણાના રેવાડીનો છે અને વર્ષ ૨૦૦૬માં ઓસ્ટ્રેલિયા સ્ટૂડન્ટ તરીકે આવ્યો હતો અને પોતાને બીજાનું જીવન સુધારવા માટે સમર્પિત એક કોમ્યુનિટી-માઈન્ડેડ વ્યક્તિ તરીકે રજૂ કરતો હતો. વર્ષ ૨૦૧૮માં ધરપકડ કરાયા બાદ તે ગાયબ જ થઈ ગયો હતો. હકીકતમાં કેસ શરૂ થયો તે સાથે જ કોર્ટમાંથી સપ્રેશન ઓર્ડર લઈ લીધો હતો. જેથી તેના પરના આરોપો અંગે મીડિયામાં પ્રકાશિત કરવા પર પ્રતિબંધ લાગી ગયો હતો. મીડિયામાં બાલેશ અંગે અહેવાલો આવતા બંધ થઈ જતા લોકોને આ મામલા અંગે વધુ કંઈ જાણવા મળતું ન હતું. ગત મહિને જ્યારે કેસની સુનાવણી શરૂ થઈ ત્યારે કોર્ટે સપ્રેશન ઓર્ડર પરનો પ્રતિબંધ હટાવી લીધો હતો. તે પછી કોર્ટે તેને કયા આરોપોમાં દોષી માન્યો છે તેની વિગતો સામે આવી હતી.
ઓક્ટોબર ૨૦૧૮માં પાંચમા કેસમાં પોલીસે તેના સિડની સેન્ટ્રલ બિઝનેસ ડિસ્ટ્રિક્ટ યુનિટ પર રેડ કરી હતી. જેમાં ડેટ-રેપ ડ્રગ્સ અને રેડિયો જેવી દેખાતી ઘડિયાળમાંથી વિડીયો રેકોર્ડર જપ્ત કર્યા હતા. જ્યુરીએ વર્ષ ૨૦૨૩માં તેને ૩૯ ગુનાઓમાં દોષી માન્યો હતો, જેમાંથી ૧૩ દુષ્કર્મના હતા. ધનખડે મહિલાઓને ડ્રગ આપ્યાનો અને સંમતિ વિના શારીરિક સંબંધ બાંધ્યા હોવાનો ઈનકાર કર્યો હતો. તેનું કહેવું હતું કે, તે જેને મંજૂરી સમજે છે અને કાયદો જેને મંજૂરી સમજે છે તેમાં ફરક છે. તેની સજાનો નોન-પેરોલ પીરિયડ એપ્રિલ ૨૦૫૩માં પૂરો થશે અને જ્યારે તેની ૪૦ વર્ષની સજા પૂરી થશે ત્યારે તે ૮૩ વર્ષનો થઈ ગયો હશે.(૨૩.૪)
(9:52 AM IST)
