નવી દિલ્‍હી,તા.૧૨: લોકશાહી ઢબે ચૂંટાયેલા પ્રતિનિધિઓ અને સરકારી અધિકારીઓ વચ્‍ચે ખટરાગના કિસ્‍સા નવા નથી. સમય અને સંજોગો પ્રમાણે નેતાઓ અને અધિકારીઓના વર્ચસ્‍વમાં વધ-ઘટ થતી રહે છે. વર્ચસ્‍વ સાબિત કરવાની આ હોડમાં લોકશાહીને જોખમમાં નહીં મૂકવાની ટકોર સુપ્રીમ કોર્ટે કરી હતી. મહારાષ્‍ટ્રમાં ચૂંટાયેલા મહિલા સરપંચને ગેરલાયક ઠેરવવા માટે જૂના કેસ ખોલવાની સરકારી અધિકારીઓની પ્રવળત્તિઓની સુપ્રીમ કોર્ટે ઝાટકણી કાઢી હતી. કોર્ટે ઠરાવ્‍યુ હતું કે, સરકારી બાબુઓને લોકશાહીના પાયા હચમચાવવાની મંજૂરી આપી શકાય નહીં.

સુપ્રીમ કોર્ટના જસ્‍ટિસ સૂર્યા કાંત અને એન કોટિશ્વરસિંઘની બેન્‍ચે નોંધ્‍યું હતું કેપંચાયતના ચૂંટાયેલા પ્રતિનિધિઓ સાથે અધિકારીઓએ ગેરવર્તણૂક કરી હોય તેવા અનેક કિસ્‍સા મહારાષ્‍ટ્રમાં બન્‍યા હોવાનું તાજેતરના સમયમાં ધ્‍યાને આવ્‍યું છે. ચૂંટાયેલા પ્રતિનિધિઓ સાથે સરકારી બાબુઓએ ગેરવર્તણૂક કરી હોય તેવા બે-ત્રણ કિસ્‍સામાં સુપ્રીમ કોર્ટે ચુકાદા પણ આપ્‍યા હતા. આવા કિસ્‍સા મહારાષ્‍ટ્રમાં વધારે બની રહ્યા છે. સરકારી બાબુઓએ ચૂંટાયેલા પ્રતિનિધિઓના હાથ નીચે કામ કરવાનું હોય છે. બાબુઓને લોકશાહીના પાયાઓને હચમચાવવાની મંજૂરી આપી શકાય નહીં. સુપ્રીમ કોર્ટે ટકોર કરી હતી કે, ચૂંટાયેલા પ્રતિનિધિને ગેરલાયક ઠેરવવા માટે જૂના કેસ ખોલવાના પ્રયાસ સરકારી બાબુઓએ કર્યા હોવાનું પણ ધ્‍યાનમાં આવ્‍યા છે.

ખાસ કરીને આવી ઘટનાઓ છેક પાયાના સ્‍તરે બની રહી છે. તમારા (પ્રતિનિધિ)ના દાદાએ સરકારી જમીન દબાવી હોવાના કેસ ઊભા કરી તમને ગેરલાયક ઠેરવવાના પ્રયાસ પણ થાય છે. પ્રસ્‍તુત કેસમાં મહારાષ્‍ટ્રના રોહા તાલુકાના ઐઘાર ગામમાં કલાવતી રાજેન્‍દ્ર કોકાલે સરપંચ તરીકે ચૂંટાયા હતા. કલાવતીએ સરપંચ પદેથી આપેલું રાજીનામુ પરત ખેંચ્‍યુ હોવા છતાં રાયગઢ જિલ્લાના કલેક્‍ટરે તેમને સરપંચ પદે ગેરલાયક ઠેરવ્‍યા હતા. મહારાષ્‍ટ્ર હાઈકોર્ટે કલેક્‍ટરના હુકમને રદબાતલ ઠેરવી સરપંચ પદે અરજદારને પુનઃનિયુક્‍ત કર્યા હતા. જેથી આ મામલો સુપ્રીમ કોર્ટમાં પહોંચ્‍યો હતો.