અમૃતસરના મંદિર પર તાજેતરમાં થયેલા ગ્રેનેડ હુમલાનો મુખ્ય આરોપી સોમવારે સવારે પોલીસ એન્કાઉન્ટરમાં માર્યો ગયો હતો. શંકાસ્પદની ઓળખ ગુરસિદક સિંહ તરીકે થઈ છે.

  અમૃતસરના મંદિર પર થયેલા ગ્રેનેડ હુમલાના આરોપી ગુરસિદક અને વિશાલ રાજાસાંસી વિસ્તારમાં છુપાયા હોવાની માહિતી મળી હતી. પોલીસે સર્ચ ઓપરેશન શરૂ કર્યું હતું. આ દરમિયાન આરોપીનું પોલીસ સાથે એન્કાઉન્ટર થયું હતું. આરોપી ગુરસીદકને એન્કાઉન્ટરમાં ગોળી વાગી હતી.

  તેને હોસ્પિટલમાં લઈ જવામાં આવ્યો, જ્યાં તેનું મૃત્યુ થયું. જ્યારે તેનો સાથી વિશાલ નાસી જવામાં સફળ રહ્યો હતો. પોલીસ અધિકારીઓના જણાવ્યા અનુસાર, આરોપી રાજાસાંસી વિસ્તારમાં નાસતો ફરતો હોવાની ચોક્કસ બાતમી મળી હતી.

  તેને કસ્ટડીમાં લેવા માટે સીઆઈએ અને છહેરતા પોલીસ કર્મચારીઓની ટીમ બનાવવામાં આવી હતી. ટીમે બે લોકોને બાઇક પર આવતા જોયા. આના પર પોલીસે બાઇકને રોકવાનો પ્રયાસ કર્યો, બાઇક સવાર આરોપીએ બાઇક છોડીને પોલીસ પાર્ટી પર ગોળીબાર કર્યો.

  પોલીસના જણાવ્યા અનુસાર, એક ગોળી કોન્સ્ટેબલ ગુરપ્રીત સિંહના માથામાં વાગી હતી, એક ગોળી ઈન્સ્પેક્ટર અમોલક સિંહની પાઘડીમાં વાગી હતી અને એક ગોળી પોલીસના વાહનને વાગી હતી. ઇન્સ્પેક્ટર વિનોદ કુમારે સ્વબચાવમાં પોતાની પિસ્તોલમાંથી ગોળીબાર કર્યો, જેનાથી આરોપી ગુરસિદક ઘાયલ થયો.

  જ્યારે અન્ય આરોપીઓ સ્થળ પરથી નાસી છૂટવામાં સફળ રહ્યા હતા. એચસી ગુરપ્રીત સિંહ અને ગુરસિદકને સારવાર માટે સિવિલ હોસ્પિટલમાં લઈ જવામાં આવ્યા હતા, જ્યાં ગુરસિદકનું મૃત્યુ થયું હતું. પોલીસ સ્ટેશનમાં FIR નોંધવામાં આવી રહી છે.