પાકિસ્તાનની અર્થવ્યવસ્થા પહેલાથી જ ખરાબ હાલતમાં હતી, પરંતુ હવે ચેમ્પિયન્સ ટ્રોફીનું આયોજન કર્યા પછી તેની હાલત વધુ ખરાબ થઈ ગઈ છે. ICC ટુર્નામેન્ટનું આયોજન કરીને, પાકિસ્તાન ક્રિકેટ બોર્ડને એટલું નુકસાન થયું છે કે તે વિશ્વના સૌથી મોંઘા ફાઇટર જેટમાંથી એક, F-35 ખરીદી શક્યું હોત. અહેવાલો અનુસાર, ચેમ્પિયન્સ ટ્રોફીનું આયોજન કરવાથી PCB ને 85 મિલિયન યુએસ ડોલર (869 કરોડ રૂપિયા)નું નુકસાન થયું છે.

એ વાત જાણીતી છે કે અમેરિકા F-35 ફાઇટર પ્લેન પર સરેરાશ 82.5 મિલિયન ડોલર (લગભગ 715 કરોડ રૂપિયા) ખર્ચ કરે છે. F-35 ના 3 પ્રકારો છે, જેની કિંમત 700 કરોડ રૂપિયાથી 944 કરોડ રૂપિયા સુધીની છે.

નવાઈની વાત એ છે કે ૮૬૯ કરોડ રૂપિયાના નુકસાન બાદ પાકિસ્તાન ચેમ્પિયન્સ ટ્રોફીમાં ફક્ત બે મેચ રમી શક્યું. લાહોરમાં રમાયેલી શરૂઆતની મેચમાં પાકિસ્તાનને ન્યુઝીલેન્ડે હરાવ્યું હતું. આ પછી, દુબઈમાં ભારત-પાકિસ્તાન વચ્ચે ટક્કર થઈ. આ મેચમાં પણ પડોશી ટીમને હારનો સામનો કરવો પડ્યો હતો. બાંગ્લાદેશ સામેની તેમની ત્રીજી અને અંતિમ ગ્રુપ મેચ વરસાદને કારણે એક પણ બોલ ફેંકાયા વિના ધોવાઈ ગઈ હતી. આ બે હારથી પાકિસ્તાન ટુર્નામેન્ટમાંથી બહાર થઈ ગયું. તેથી, તેનું અભિયાન પણ ફક્ત એક ઘરેલું મેચ સાથે સમાપ્ત થયું.

ટેલિગ્રાફ ઈન્ડિયાના એક અહેવાલ મુજબ, પાકિસ્તાને તેના ત્રણ ચેમ્પિયન્સ ટ્રોફી સ્થળો - રાવલપિંડી, લાહોર અને કરાચીને અપગ્રેડ કરવા માટે લગભગ 18 અબજ પાકિસ્તાની રૂપિયા (લગભગ $58 મિલિયન) ખર્ચ્યા. અપગ્રેડનો ખર્ચ અંદાજિત બજેટ કરતાં ૫૦ ટકા વધુ હતો. પાછળથી, પાકિસ્તાન ક્રિકેટ બોર્ડે પણ આ ઇવેન્ટની તૈયારીઓ પાછળ 40 મિલિયન યુએસ ડોલર ખર્ચ કર્યા હોવાના અહેવાલ છે. જોકે, બદલામાં તેને ફક્ત થોડા પૈસા જ મળ્યા.

પાકિસ્તાન ક્રિકેટ બોર્ડને હોસ્ટિંગ ફી તરીકે માત્ર 6 મિલિયન યુએસ ડોલર મળ્યા હોવાનું કહેવાય છે. ટિકિટ વેચાણ અને પ્રાયોજકોની વાત આવે ત્યારે, કમાણી નજીવી હતી. રિપોર્ટમાં જણાવાયું છે કે ICC ચેમ્પિયન્સ ટ્રોફીનું આયોજન કરવાથી PCB ને લગભગ 85 મિલિયન યુએસ ડોલરનું નુકસાન થયું છે.

આ નુકસાનની ભરપાઈ કરવા માટે, પાકિસ્તાન ક્રિકેટ બોર્ડ હવે ખેલાડીઓના ખિસ્સા લૂંટી રહ્યું છે. પીસીબી મેનેજમેન્ટે રાષ્ટ્રીય ટી20 ચેમ્પિયનશિપ માટે મેચ ફીમાં 90 ટકાનો ઘટાડો કરવાનો ચોંકાવનારો નિર્ણય લીધો છે જ્યારે રિઝર્વ ખેલાડીઓના પગારમાં 87.5 ટકાનો ઘટાડો કરવામાં આવ્યો છે.

પાકિસ્તાનના ડોન અખબારના અહેવાલ મુજબ, 'પીસીબીએ તાજેતરમાં કોઈ પણ સત્તાવાર જાહેરાત કર્યા વિના મેચ ફી 40,000 રૂપિયાથી ઘટાડીને 10,000 રૂપિયા કરી દીધી છે.' જોકે, PCBના ચેરમેન મોહસીન નકવીએ દરમિયાનગીરી કરીને આ નિર્ણયને નકારી કાઢ્યો અને બોર્ડના સ્થાનિક ક્રિકેટ વિભાગને આ બાબત પર પુનર્વિચાર કરવાનો નિર્દેશ આપ્યો. તેમણે ખેલાડીઓને ફાઇવ સ્ટાર હોટલને બદલે ઇકોનોમી હોટલમાં રોકાવાનો પણ આદેશ આપ્યો.