<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Wednesday, 19th March 2025

પતિ સાથે ઝઘડો થયો તો પત્‍નિ ટાવર પર ચડી ગઈ : હાઈવોલ્‍ટેજ ડ્રામા

પોલીસકર્મી બન્‍યો સુપરમેન...રસ્‍સીના સહારે ગુસ્‍સે ભરાયેલી મહિલાને સમજાવીને નીચે ઉતારી

પ્રયાગરાજ, તા.૧૯: ઉત્તર પ્રદેશના પ્રયાગરાજથી એક અજીબોગરીબ ઘટના સામે આવી છે. પતિ સાથે ઝઘડો થયો તો પત્‍ની વીજળીના હાઈ હેન્‍શન ટાવર પર ચડી ગઈ. એવો હાઈ વોલ્‍ટેજ ડ્રામા સર્જાયો કે લોકો સ્‍તબંધ થઈ ગયા. આ ઘટના સોમવારે યમુનાનગરના લાલાપુર પોલીસ મથક વિસ્‍તારમાં બપોરેના સમયે ઘટી. બસહરા તરહાર ગામની રહીશ વંદના પટેલ અને તેના પતિ ભોલે પટેલ કોઈ વાત ઝઘડી પડયા. આ ઝઘડામાં વંદનાને એવો તે ગુસ્‍સો આવી ગયો કે તે ઘરની પાસે ખેતરમાં વીજળીના ઊંચા હાઈ ટેન્‍શન ટાવર પર ચડી ગઈ.

ગામવાળાઓએ મહિલાને ટાવર પર ચડતી જોઈ તો ગભરાઈ ગયા. પતિ ભોલા પટેલ સહિત ગામના અન્‍ય લોકોએ તેને સમજાવવાની ખુબ કોશિશ કરી. પરંતુ પત્‍ની ટાવર પરથી નીચે ઉતરવા માટે તૈયાર નહતી. હાઈ ટેન્‍શન ટાવર પર નારાજ પત્‍નીનો હાઈ વોલ્‍ટેજ ડ્રામા કલાકો સુધી ચાલ્‍યો.

ઘટનાની જાણ થતા જ પોલીસ અને વીજળી વિભાગના અધિકારીઓ તરત ઘટનાસ્‍થળે પહોંચી ગયા. તેમણે નારાજ વંદનાને નીચે ઉતરવા માટે કહ્‍યું. પરંતુ તેણે કોઈનું સાંભળ્‍યું નહીં. કોઈના પણ સમજાવવાની તેના પર કોઈ અસર થઈ નહીં. આ બધુ જોઈને પોલીસ અને વીજળી વિભાગના કર્મચારીઓના હોશ ઉડી ગયા. તેઓ સમજી નહતા શકતા કે આખરે કરવું શું. ગુસ્‍સે ભરાયેલી મહિલાને ટાવર પરથી નીચે ઉતારવા માટે પોલીસ અને ગ્રામીણોએ ટાવરની ચારેબાજુ જાળ બીછાવી. ત્‍યારબાદ પોલીસકર્મીને ટાવર પર ચડાવવામાં આવ્‍યો.

તે પોલીસકર્મીની હિંમતને ખરેખર દાદ આપવી પડે. જેણે ટાવર પર ચડીને કલાકોની મથામણ બાદ રસ્‍સીના સહારે ગુસ્‍સે ભરાયેલી મહિલાને સમજાવીને નીચે ઉતારી. રાહતની વાત એ રહી કે પોલીસકર્મી આ મહિલાને નીચે ઉતારવામાં સફળ રહયો. જો કે ટાવર પરથી મહિલાને નીચે લાવવા માટે પોલીસ પ્રશાસને ખુબ જદ્દોજહેમત કરવી પડી. તેમને પરસેવો છૂટી ગયો. કલાકોના હાઈ વોલ્‍ટેજ ડ્રામા બાદ મહિલા ટાવર પરથી નીચે ઉતરી ત્‍યારે લોકોને જીવમાં જીવ આવ્‍યો. ટાવર પરથી નીચે ઉતરવા છતાં મહિલા શાંત થઈ નહીં અને તેના પતિ પર આરોપોની હારમાળા સર્જી દીધી.(૨૩.૨)

(10:19 AM IST)