તા. ૧૭ નવેમ્બર ર૦ર૬ વિક્રમ સંવત ર૦૮૩ કારતક સુદ – ૮ મંગળવાર
News of Wednesday, 19th March 2025
કસ્ટમર પર ગરમ ચા ઢોળવા બદલ સ્ટારબક્સને ૫૦ મિલિયન ડોલરનું વળતર ચૂકવવા આદેશ
આરોપ હતો કે, સ્ટારબક્સમાં આપવામાં આવેલી ચાનું ઢાકણું બરાબર રીતે બંધ ન હોવાથી તે તેના ખોળામાં પડી હતી અને તેનાથી તેની ચામડી અને ગુપ્તાંગો ગંભીર રીતે દાઝી ગયા હતાઃ જ્યુરીએ માન્યું કે સ્ટારબક્સની બેદરકારીથી કસ્ટમરને પીડા સહન કરવી પડી છે : કેલિફોર્નિયાના એક ડિલિવરી ડ્રાઈવરે સ્ટારબક્સ સામે કેસ કર્યો હતો

કેલિફોર્નિયા, તા.૧૯: ભારતમાં કસ્ટમરના હકોની બાબતમાં હજુ જોઈએ તેવી જાગૃતિ નથી પરંતુ અમેરિકામાં એવું નથી. ત્યાં તો નાની-નાની બાબતોમાં કસ્ટમર કેસ કરી દેતા હોય છે અને તેના કારણે મોટી કંપનીઓ હોય કે નાના સ્ટોલવાળા દરેક કસ્ટમરના કન્ફર્ટ અને તેમની સુરક્ષાનું ઘણું ધ્યાન રાખે છે અને અમેરિકાના કાયદા પણ એવા છે કે, કસ્ટમરની ફરિયાદ જેન્યુઅન હોય તો ગમે તેવી મોટી કંપનીને પણ વળતર ચૂકવવું પડે છે. અમેરિકાના કડક કાયદાનો પરચો મલ્ટીનેશનલ કોફી ચેઈન સ્ટારબક્સને પણ થઈ ગયો છે. અમેરિકાની એક કોર્ટે સ્ટારબક્સને એક ડિલિવરી ડ્રાઈવરને ૫૦ મિલિયન ડોલરનું વળતર ચૂકવવા આદેશ કર્યો છે. ડ્રાઈવરે લોસ એન્જલસમાં સ્ટારબક્સના એક આઉટલેટ પર ચાનો ઓર્ડર આપ્યો હતો. તેનો આરોપ છે કે, ચાનું ઢાંકણું બરાબર રીતે બંધ ન હતું એટલે ચા તેના ખોળામાં પડી હતી. તેનાથી તે ગંભીર રીતે દાઝી ગયો હતો. ગરમ ચા પડતાં તેના ગુપ્તાંગોને કાયમી નુકસાન થયું છે અને નસોને પણ અસર થઈ છે. ફેબ્રુઆરી ૮, ૨૦૨૦એ બનેલી આ ઘટના બાબતે ડ્રાઈવરે પોતાની ફરિયાદમાં સ્ટારબક્સ પર બેદરકારીનો આરોપ લગાવ્યો હતો.
એક લોસ એન્જલસ કાઉન્ટી જ્યુરીએ સ્ટારબક્સને ૫૦ મિલિયન ડોલર માઈકલ ગાર્સિયા નામના ડ્રાઈવરને ચૂકવવા આદેશ આપ્યો છે. મીડિયા રિપોર્ટ્સ મુજબ, ગાર્સિયાના વકીલ માઈકલ પાર્કરે જણાવ્યું હતું કે, ગાર્સિયાએ આપેલો ચાનો ઓર્ડર લઈને આવેલા કર્મચારીએ ટ્રે યોગ્ય મજબૂત રીતે પકડી ન હતી અને ચાના કપનું ઢાંકણું પણ બરાબર રીતે બંધ ન હતું. જેથી ગરમ ચા ગાર્સિયાના ખોળામાં પડી હતી. તેનાથી ગાર્સિયાને શારીરિક પીડાની સાથે માનસિક પીડા પણ થઈ. સાથે જ તેને નિરાશા, અપમાન, અસુવિધા, દુઃખ, વિકળતિ, શારીરિક ક્ષતિ અને ભાવનાત્મક પરેશાનીનો પણ સામનો કરવો પડયો. એટલે તેને વળતર આપવામાં આવ્યું.
સ્ટારબક્સનું કહેવું હતું કે, તે આ ચુકાદા સામે અપીલ કરશે. કંપનીના એક પ્રવક્તાએ કહયું કે, કંપની ગાર્સિયા પ્રત્યે સહાનુભૂતિ રાખે છે, પરંતુ આ ઘટના માટે કંપની જવાબદાર હોવાના જ્યુરીના ફેંસલા સાથે સંમંત નથી. કંપનીને લાગે છે કે, દંડ ઘણો વધારે છે. કંપની હંમેશા પોતાના સ્ટોર્સમાં ઉચ્ચતમ સુરક્ષા માપદંડો માટ પ્રતિબદ્ધ રહી છે, જેમાં ગરમ પીણાંનું હેન્ડલિંગ પણ સામેલ છે.
ગાર્સિયાના વકીલનું કહેવું હતું કે, સ્ટારબક્સ પાસે ટ્રાયલ પહેલા સેટલમેન્ટ કરવાની ઘણી તકો હતી. કંપનીએ કથિત રીતે ૩૦ મિલિયન ડોલરની ઓફર પણ કરી હતી, પરંતુ ગાર્સિયાએ કંપની માફી માગે અને સુરક્ષા વધુ કડક બનાવે તેવો આગ્રહ રાખ્યો હતો. વકીલના કહેવા મુજબ, કંપનીએ તે વાત માનવા ઈનકાર કરી દીધો હતો.
આ મામલો વર્ષ ૧૯૯૪માં મેકડોનાલ્ડ સામે થયેલા ઐતિહાસિક કેસની યાદ અપાવે છે. મેકડોનાલ્ડમાં હોટ કોફી પડતાં ૭૯ વર્ષીય સ્ટેલા લિબેક નામની મહિલા ગંભીર રીતે દાઝી ગઈ હતી. તે મામલે મેકડોનાલ્ડને ૨.૮ મિલિયન ડોલરથી વધુનો દંડ કરાયો હતો. જોકે, બાદમાં જજે દંડ ઘટાડી દીધો હતો અને અંતે એ કેસ ૬ લાખ ડોલરની અંદરમાં જ સેટલ થઈ ગયો હતો. એ કેસની જેમ સ્ટારબક્સના કેસએ પણ કોર્પોરેટ રિસ્પોન્સિબિલિટીના મુદ્દા પર ચર્ચા છેડી દીધી છે.
અમેરિકાના ઈતિહાસમાં સૌથી મોટું સેટલમેન્ટ વળતરની દ્રષ્ટિએ ૧૯૯૮માં થયું હતું. જોકે તેમાં સેટલમેન્ટ કોઈ એક વ્યક્તિ સાથે નહીં પણ સ્ટેટ્સ સાથે કરવામાં આવ્યું હતું. આ સેટલમેન્ટ અંતર્ગત અમેરિકાની મોટી ટોબેકો કંપનીઓ ટોબેકોના કારણે થતી બિમારીઓની સારવારના ખર્ચ પેટે અમેરિકાના ૪૬ સ્ટેટ્સને ૨૫ વર્ષમાં ૨૦૬ બિલિયન ડોલર ચૂકવવા તૈયાર થઈ હતી.
(12:02 PM IST)









છેલ્લા 8 દિવસમાં સૌથી લોકપ્રિય 
