<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Wednesday, 19th March 2025

માત્ર ૩ મહિનામાં જ ફ્રેશ ફૂડ પૂરૂ થઈ ગયું હતું : પાવડર દૂધ, પિઝા, રોસ્‍ટ ચિકન, ઝીંગા કોકટેલ અને ટુના માછલી ખાઈને પેટ ભર્યુ

સુનિતા વિલિયમ્‍સે ISSમાં જીવવા માટે ફ્રોઝન ફુડ પર આધાર રાખ્‍યો

નવી દિલ્‍હી, તા.૧૯: ભારતીય મૂળના અવકાશયાત્રી સુનિતા વિલિયમ્‍સ અને તેમના સાથી બૂચ વિલ્‍મોર નવ મહિનાથી વધુ સમય સુધી અવકાશમાં ફસાયા બાદ બુધવારે પૃથ્‍વી પર પાછા ફર્યા.વહેલી સવારે સ્‍પેસએક્‍સ કેપ્‍સ્‍યુલે ફ્‌લોરિડાના દરિયાકાંઠે સફળ સ્‍પ્‍લેશડાઉન લેન્‍ડિંગ કર્યું, ત્‍યારબાદ બંને અવકાશયાત્રીઓને સુરક્ષિત રીતે બહાર કાઢવામાં આવ્‍યા. સુનિતા વિલિયમ્‍સ ગયા વર્ષે જૂનમાં બોઇંગના સ્‍ટારલાઇનર વિમાનમાં આ મિશન માટે નીકળ્‍યા હતા અને શરૂઆતમાં આ મિશન ફક્‍ત એક અઠવાડિયા માટે ચાલવાનું હતું. જોકે, અવકાશયાનમાં ટેકનિકલ ખામીને કારણે સુનિતા ISS પર અટવાઈ ગઈ.તેમના પાછા ફરવા પર વિશ્વભરના લોકોએ રાહતનો શ્વાસ લીધો.

સુનિતા અને બુચ વિલ્‍મોર માટે આ મિશન બિલકુલ સરળ નહોતું. છેલ્લા ૯ મહિનામાં આંતરરાષ્ટ્રીય અવકાશ મથકથી મળેલા કેટલાક ચિત્રોમાં સુનિતાની સ્‍થિતિ ચિંતાજનક દેખાઈ હતી, ત્‍યારબાદ તેમના સ્‍વાસ્‍થ્‍ય અંગે પ્રશ્નો ઉભા થયા હતા. એવા પણ અહેવાલો હતા કે, સુનિતા પોતાનું પેશાબ પીને અવકાશમાં જીવંત રહી હતી. તમારા મનમાં આ પ્રશ્ન પણ ઉઠતો હશે કે સુનિતા વિલિયમ્‍સે આટલા લાંબા સમય સુધી અવકાશમાં ફસાયેલી રહીને કેવો ખોરાક ખાધો? અવકાશમાં સુનિતા મોટે ભાગે ફ્રોઝન ફૂડ પર આધાર રાખતી હતી.

બોઇંગ સ્‍ટારલાઇનર મિશનના મુદ્દાઓથી પરિચિત એક સૂત્રના જણાવ્‍યા અનુસાર મિશન દરમિયાન અવકાશયાત્રીઓને તાજા ફળો અને શાકભાજી મળી શક્‍યા ન હતા. માહિતી અનુસાર, સુનિતા અને બુચ વિલ્‍મોર આ સમય દરમિયાન પાવડર દૂધ, પિઝા, રોસ્‍ટ ચિકન, ઝીંગા કોકટેલ અને ટુના માછલી ખાઈને બચી ગયા. ગયા વર્ષે નવેમ્‍બરમાં ન્‍યૂ યોર્ક પોસ્‍ટે અહેવાલ આપ્‍યો હતો કે સુનિતાને ISS પર ફક્‍ત પિઝા અને ઝીંગા કોકટેલ જ મળ્‍યું.

અંદરના સૂત્રએ એ પણ ખુલાસો કર્યો કે શરૂઆતમાં ઉપલબ્‍ધ તાજા ફળો અને શાકભાજી ત્રણ મહિનામાં જ ગાયબ થઈ ગયા. આ પછી ફક્‍ત પેકેજ્‍ડ અને ફ્રીઝમાં સૂકવેલા શાકભાજીનો ઉપયોગ કરવામાં આવ્‍યો. આ ઉપરાંત માંસ અને ઈંડા પૃથ્‍વી પર રાંધવામાં આવતા હતા અને પછી મોકલવામાં આવતા હતા, જેને ISS પર ગરમ કરવાની જરૂર હતી. સૂપ, સ્‍ટયૂ અને કેસરોલ જેવા ફ્રોઝન ખોરાકને પાણીથી હાઇડ્રેટ કરવામાં આવ્‍યા હતા.

જોકે, નિષ્‍ણાતોએ સ્‍પષ્ટતા કરી છે કે સુનિતાનું વજન ઓછું ખાવાથી ઘટયું નથી. નિષ્‍ણાતોના મતે, ‘‘એ સ્‍પષ્ટ હોવું જોઈએ કે વજનમાં કોઈપણ ઘટાડો ISS પર ખોરાકની અછતને કારણે નથી. લાંબા મિશન માટે પણ પૂરતો ખોરાક હતો.'' નોંધનીય છે કે દરેક અવકાશયાત્રી માટે દરરોજ આંતરરાષ્ટ્રીય અવકાશ મથકને લગભગ ૩.૮ પાઉન્‍ડ ખોરાક પૂરો પાડવામાં આવે છે. આ ઉપરાંત, અહીં કટોકટીની પરિસ્‍થિતિઓ માટે પણ વ્‍યવસ્‍થા કરવામાં આવે છે

(3:48 PM IST)