વોશિંગ્ટન, 25 માર્ચ, 2025: અમેરિકી રાષ્ટ્રપતિ ડોનાલ્ડ ટ્રમ્પે ચૂંટણી પ્રક્રિયામાં મોટા ફેરફારો લાવતો એક કાર્યકારી આદેશ જાહેર કર્યો છે. આ આદેશ અનુસાર, હવે અમેરિકામાં ફેડરલ ચૂંટણીઓમાં વોટ આપવા માટે નાગરિકતાનો દસ્તાવેજી પુરાવો, જેમ કે પાસપોર્ટ, ફરજિયાત બનશે. ટ્રમ્પના જણાવ્યા મુજબ, આ પગલું ચૂંટણીઓમાં પારદર્શિતા અને નિષ્પક્ષતા સુનિશ્ચિત કરવા માટે લેવામાં આવ્યું છે. આ આદેશ મંગળવારે હસ્તાક્ષર સાથે જાહેર કરવામાં આવ્યો હતો.

ટ્રમ્પનો નિર્ણય શું છે?
નવા આદેશ હેઠળ, મતદાતા પંજીકરણ માટે નાગરિકતાનો દસ્તાવેજી પુરાવો રજૂ કરવો ફરજિયાત રહેશે. આનો અર્થ એ થયો કે નાગરિકતાના પુરાવા વિના કોઈપણ વ્યક્તિ ફેડરલ ચૂંટણીઓમાં મતદાન માટે પંજીકરણ નહીં કરાવી શકે. આ ઉપરાંત, બધા મતપત્રો ચૂંટણીના દિવસ સુધીમાં પ્રાપ્ત થવા જરૂરી રહેશે. ટ્રમ્પનું કહેવું છે કે આ પગલાંથી ચૂંટણી પ્રક્રિયામાં સુરક્ષા અને વિશ્વાસ વધશે.

ચૂંટણીમાં અનિયમિતતાને રોકવાનો દાવો:
આદેશમાં જણાવાયું છે કે અમેરિકામાં ચૂંટણીઓને સુરક્ષિત રાખવામાં અસફળતા મળી છે. આને ધ્યાનમાં રાખીને ફેડરલ એજન્સીઓને સૂચના આપવામાં આવી છે કે તેઓ ચૂંટણી અધિકારીઓ સાથે ફેડરલ ડેટા શેર કરે, જેથી ગેર-નાગરિકોની ઓળખ કરી શકાય. આ પગલું ટ્રમ્પના તે દાવાઓ સાથે સુસંગત છે, જેમાં તેમણે ચૂંટણીમાં અનિયમિતતા અને ખાસ કરીને મેલ-ઇન વોટિંગમાં ધાંધલધડીની વારંવાર ટીકા કરી છે, ભલે તેના પુરાવા નજીવા જ હોય.

લોકોએ કરી આદેશની ટીકા:
મતદાન અધિકાર સંગઠનો અને ડેમોક્રેટ્સે આ આદેશની ટીકા કરી છે. કોલોરાડોના રાજ્ય સચિવ જેના ગ્રિસવોલ્ડે કહ્યું, “ટ્રમ્પનો કાર્યકારી આદેશ ગેરકાયદેસર છે. આ યોગ્ય અમેરિકનોને તેમના પવિત્ર મતદાન અધિકારનો ઉપયોગ કરતા રોકશે.” ઘણા લોકોનું માનવું છે કે આ નિર્ણયથી મતદાન પ્રક્રિયા જટિલ બનશે અને કેટલાક પાત્ર મતદાતાઓને વંચિત કરી શકે છે.

આ આદેશ ટ્રમ્પની રાષ્ટ્રપતિ પદની નવી શરૂઆતમાં લેવાયેલા મોટા નિર્ણયોમાંનો એક છે, જેની અસર અમેરિકાની ચૂંટણી પ્રક્રિયા પર લાંબા સમય સુધી જોવા મળી શકે છે.