વોશિંગ્ટન ડીસી, ૨૯ માર્ચ, ૨૦૨૫: અમેરિકાના ૪૭મા રાષ્ટ્રપતિ ડોનાલ્ડ ટ્રમ્પના નજીકના સહયોગી અને ટેસ્લાના સીઈઓ એલન મસ્કે એક મોટી જાહેરાત કરી છે. મસ્કે સંકેત આપ્યા છે કે તેઓ ટ્રમ્પ સરકારમાંથી બહાર નીકળવાની તૈયારીમાં છે અને ડિપાર્ટમેન્ટ ઓફ ગવર્નમેન્ટ એફિશિયન્સી (DOGE)ના વડા પદેથી મે મહિનાના અંત સુધીમાં રાજીનામું આપી શકે છે. મસ્કનો આ નિર્ણય એવા સમયે આવ્યો છે જ્યારે તેમણે DOGEના નેતૃત્વમાં અમેરિકાના ખાધને ૧ ટ્રિલિયન ડોલર ઘટાડવાનો દાવો કર્યો છે, પરંતુ બીજી તરફ ટેસ્લા કંપની વિવાદો અને વિરોધના કારણે મુશ્કેલીમાં મુકાઈ છે.)

DOGEની સફળતા - ૧ ટ્રિલિયન ડોલરનો ખાધ ઘટાડ્યો:
એલન મસ્કે DOGEના વડા તરીકે ૧૩૦ દિવસમાં અમેરિકાના ખાધને ૧ ટ્રિલિયન ડોલર ઘટાડવાનું લક્ષ્ય હાંસલ કર્યું હોવાનો દાવો કર્યો છે. તેમણે જણાવ્યું કે, તેમની ટીમે દરરોજ ૪ બિલિયન ડોલરની બચત કરી અને સરકારી ખર્ચને ૬ ટ્રિલિયન ડોલર સુધી ઘટાડી દીધો. ફોક્સ ન્યૂઝને આપેલા ઈન્ટરવ્યૂમાં મસ્કે કહ્યું, “અમે ૧૫ ટકા સરકારી ખર્ચ ઘટાડવાનું લક્ષ્ય રાખ્યું હતું, જેનાથી જરૂરી સેવાઓ પર અસર ન પડે. જો આ મિશન સફળ ન થાય તો અમેરિકાની અર્થવ્યવસ્થા ડૂબી જશે.” તેમની ટીમે સરકારી કોન્ટ્રાક્ટ રદ કરવા, સંપત્તિઓનું વેચાણ અને સરકારી નોકરીઓમાં કાપ મૂકવા જેવા પગલાં લઈને અત્યાર સુધી ૧૧૫ બિલિયન ડોલરની બચત કરી છે.

DOGEની ટીમ અને યોજનાઓ:
મસ્કની DOGE ટીમમાં અરામ મોગદ્દાસી, સ્ટીવ ડેવિસ, બ્રેડ સ્મિથ, એન્થોની આર્મસ્ટ્રોંગ, જો ગેબ્બિયા, ટોમ ક્રોસ અને ટાયલર હેસેન જેવા નિષ્ણાતો સામેલ છે. આ ટીમે સરકારી ખર્ચમાં થતી છેતરપિંડી અને બગાડને રોકવા માટે કડક પગલાં લીધાં. મસ્કે જણાવ્યું, “અમેરિકાને આર્થિક રીતે સ્થિર બનાવવો એ અમારું મુખ્ય ધ્યેય છે. અમે દરેક ખર્ચની સમીક્ષા કરી અને જરૂરી ન હોય તેવા ખર્ચને દૂર કર્યા.”

ટેસ્લા વિવાદો અને વિરોધનું કારણ:
મસ્કનું રાજીનામું એવા સમયે આવ્યું છે જ્યારે ટેસ્લા કંપની મુશ્કેલીઓનો સામનો કરી રહી છે. ટ્રમ્પ સરકારના ટેરિફ નિર્ણયો બાદ ઘણા દેશોએ ટેસ્લા પર બહિષ્કાર મૂક્યો છે. અમેરિકામાં પણ ટેસ્લાના શોરૂમ્સ અને ઓફિસો પર હુમલા થયા છે, જેના કારણે કંપનીના શેરમાં ૫ ટકાનો ઘટાડો નોંધાયો. કર્મચારીઓ અને નાગરિકો દ્વારા દેશભરમાં વિરોધ પ્રદર્શનો થઈ રહ્યા છે. મસ્કે કહ્યું, “મારી પાસે ૧૭ નોકરીઓ છે, હું ખૂબ વ્યસ્ત છું. ટેસ્લાને મારા સમયની જરૂર છે.”

DOGE સામે કાનૂની પડકારો:
DOGEના નિર્ણયો સામે કાનૂની વિવાદો ઉભા થયા છે. મસ્ક પર ગોપનીયતા કાયદાઓના ઉલ્લંઘનનો આરોપ લાગ્યો છે અને તેમના ઘણા નિર્ણયોને ગેરકાયદે જાહેર કરવા માટે મુકદ્દમા દાખલ થયા છે. વિરોધીઓનું કહેવું છે કે મસ્કની ટીમે કોંગ્રેસની મંજૂરી વિના કટોતી કરી, જે ગેરકાનૂની છે. મસ્કના રાજીનામાં બાદ હવે સવાલ ઉભો થયો છે કે શું ટ્રમ્પ સરકાર DOGEને ચાલુ રાખશે કે તેને બંધ કરશે.

મસ્કનું ભવિષ્ય:
એલન મસ્કે જણાવ્યું કે તેઓ ૧૩૦ દિવસની મુદત પૂરી થતાં DOGE છોડશે અને ટેસ્લા તથા અન્ય કંપનીઓ પર ધ્યાન કેન્દ્રિત કરશે. તેમણે કહ્યું, “અમે અમેરિકાને આર્થિક મજબૂતી આપવાનું કામ પૂરું કર્યું છે, હવે મારે મારી કંપનીઓને સમય આપવો છે.” તેમના આ નિર્ણયથી ટ્રમ્પ સરકાર અને ટેસ્લા બંનેના ભવિષ્ય પર અસર પડી શકે છે.