વોશિંગ્ટન/વિસ્કોન્સિન, 31 માર્ચ 2025: વિશ્વના સૌથી ધનિક વ્યક્તિ ઈલોન મસ્કે રવિવારે વિસ્કોન્સિનના એક ટાઉન હોલમાં ચોંકાવનારો ખુલાસો કર્યો છે. તેમણે જણાવ્યું કે, તેમની ટીમ ‘ડિપાર્ટમેન્ટ ઓફ ગવર્નમેન્ટ એફિશિયન્સી’ (DOGE) હવે અમેરિકી કોંગ્રેસના એવા સભ્યોની તપાસ કરશે, જેઓ સરકારી પગારની સરખામણીએ ‘રહસ્યમય રીતે ધનવાન’ બન્યા છે. મસ્કનું કહેવું છે કે, આવા સાંસદોની સંપત્તિ કેવી રીતે વધી તેના જવાબો શોધવામાં આવશે અને આવી ગેરરીતિઓને રોકવા પગલાં લેવાશે.

‘સાંસદોની સંપત્તિ કેવી રીતે વધી?’
મસ્કે ટાઉન હોલમાં એક પ્રશ્નના જવાબમાં કહ્યું કે, કેટલાક સાંસદોની સંપત્તિ તેમના વાર્ષિક પગારની તુલનામાં અસાધારણ રીતે વધી છે. એક સામાન્ય કોંગ્રેસ સભ્યનો પગાર વાર્ષિક 174,000 ડોલર (અંદાજે 1.45 કરોડ રૂપિયા) હોય છે, પરંતુ અનેક સાંસદો કરોડોની સંપત્તિ ધરાવે છે. મસ્કે ઉદાહરણ આપતાં કહ્યું, “જો કોઈ 2 લાખ ડોલર વાર્ષિક કમાતું હોય તો તે 20 મિલિયન ડોલર કેવી રીતે ભેગું કરે? અમે આનો પર્દાફાશ કરવા માગીએ છીએ.” તેમનું માનવું છે કે, આવી સંપત્તિ પાછળ ગેરકાયદેસર નાણાંનું સ્થાનાંતર હોઈ શકે છે.

નાણાંનું ‘ચક્કર’ અને NGOની ભૂમિકા:
ટાઉન હોલમાં એક હાજર વ્યક્તિએ પૂછ્યું કે, શું DOGEને યુએસ એજન્સી ફોર ઈન્ટરનેશનલ ડેવલપમેન્ટ (USAID)માંથી સાંસદો મેક્સિન વોટર્સ, એડમ શિફ અને ચક શુમરને નાણાં ટ્રાન્સફર થયાના પુરાવા મળ્યા છે? જવાબમાં મસ્કે કહ્યું, “સરકાર નાણાં વિદેશમાં એક NGOને મોકલે છે, પછી તે ઘણાં NGOમાંથી પસાર થાય છે અને બાદમાં તે પૈસા અમેરિકામાં પાછા આવીને આવા લોકોના ખિસ્સામાં જાય છે. આ સીધું નથી થતું, પરંતુ ચોક્કસપણે એક ગૂંચવણભરી રીતે થાય છે.” તેમણે આવા નાણાકીય વ્યવહારોની તપાસનો સંકેત આપ્યો.

કોંગ્રેસના ધનવાન સભ્યો પર નજર:
અમેરિકી કોંગ્રેસમાં ઘણા એવા સભ્યો છે જેઓ દાયકાઓથી સેવા આપી રે્હ્યા છે અને કરોડપતિ બની ગયા છે. જેમાં પૂર્વ હાઉસ સ્પીકર નેન્સી પેલોસીની સંપત્તિ 250 મિલિયન ડોલર (અંદાજે 2085 કરોડ રૂપિયા) અને સેનેટર રિક સ્કોટની સંપત્તિ 552 મિલિયન ડોલર (અંદાજે 4600 કરોડ રૂપિયા)નો સમાવેશ થાય છે. પેલોસીની સંપત્તિ મોટાભાગે તેમના પતિ પોલના એપલ, માઈક્રોસોફ્ટ, એમેઝોન, ગૂગલ અને નેટફ્લિક્સ જેવી કંપનીઓમાં રોકાણમાંથી આવે છે, જ્યારે સ્કોટની સંપત્તિ HCA હેલ્થકેર અને સોલેન્ટિક કંપનીઓના સહ-સ્થાપક તરીકેના તેમના પૂર્વ કાર્યમાંથી આવે છે.

મસ્કનું વિસ્કોન્સિન પ્રવાસ:
મસ્કે રવિવારે વિસ્કોન્સિનની મુલાકાત દરમિયાન આ નિવેદન આપ્યું હતું, જ્યાં તેઓ વોકેશા કાઉન્ટીના ન્યાયાધીશ બ્રાડ શિમેલના સમર્થનમાં રેલીને સંબોધી રહ્યા હતા. શિમેલ વિસ્કોન્સિન સુપ્રીમ કોર્ટની ચૂંટણીમાં ઉમેદવાર છે, જે રાજ્યના ગર્ભપાત કાયદા અને રેડિસ્ટ્રિક્ટિંગ જેવા મુદ્દાઓ પર મહત્વની અસર કરશે. આ દરમિયાન મસ્કે બે સ્થાનિક નાગરિકોને 1 મિલિયન ડોલરના ચેક પણ આપ્યા, જે ‘એક્ટિવિસ્ટ ન્યાયાધીશો’ વિરુદ્ધની તેમની પિટિશન પર હસ્તાક્ષર કરનારાઓને પ્રોત્સાહન આપવા માટે હતા. તેમણે કહ્યું, “આ ચેક માત્ર ધ્યાન ખેંચવા માટે છે, જેનાથી મીડિયા પણ ચોંકી ઉઠે છે.”

DOGEની ભૂમિકા અને ભવિષ્ય:
DOGEનું લક્ષ્ય સરકારી ખર્ચમાં ઘટાડો અને ભ્રષ્ટાચાર રોકવાનું છે. મસ્ક, જેની સંપત્તિ 330 બિલિયન ડોલર છે, તેમણે ગયા વર્ષે સાંસદોના પગારવધારાના કાયદાને રોક્યો હતો, પરંતુ બાદમાં ભ્રષ્ટાચાર ઘટાડવા તેના સમર્થનમાં નિવેદન આપ્યું હતું. હવે તેઓ કોંગ્રેસના સભ્યોની સંપત્તિની તપાસ દ્વારા આ લડાઈને આગળ ધપાવવા માગે છે. આ તપાસથી અમેરિકી રાજકારણમાં નવું વિવાદાસ્પદ પરિણામ આવી શકે છે, જેની અસર લાંબા સમય સુધી જોવા મળશે.