છેલ્લા 8 દિવસમાં સૌથી લોકપ્રિય હેં...વારાણસીમાં ભાજપનો પરાજય 9:51 AM
આવતીકાલે વકફ બિલ લોકસભામાં રજુ થશે : ૮ ક્લાક થશે ચર્ચા
બીજેપી તેના સાંસદોને ગૃહમાં તેમની હાજરી સુનિશ્ચિત કરવા માટે ત્રણ લાઇનનો વ્હીપ જારી કરશેઃ વિપક્ષે વોકઆઉટ કર્યુ
નવી દિલ્હી, તા.૧: હવે વકફ સુધારા બિલ અંગે ચિત્ર સ્પષ્ટ થઈ ગયું છે. આ બિલ ૨ એપ્રિલે બપોરે ૧૨ વાગ્યે લોકસભામાં આવશે. બિઝનેસ એડવાઇઝરી કમિટીની બેઠકમાં આને મંજૂરી આપવામાં આવી છે. શાસક રાષ્ટ્રીય લોકશાહી જોડાણ (એનડીએ) નું નેતૃત્વ કરતી ભારતીય જનતા પાર્ટી (ભાજપ) તેના સાંસદોને ગૃહમાં તેમની હાજરી સુનિશ્ચિત કરવા માટે ત્રણ લાઇનનો વ્હીપ જારી કરશે.
સંસદીય બાબતોના મંત્રી કિરેન રિજિજુએ કહયું છે કે ચર્ચા માટે આઠ કલાક નક્કી કરવામાં આવ્યા છે. આ સમય વધારી શકાય છે પરંતુ ગૃહની સંમતિથી. આજ તક સાથેની ખાસ વાતચીતમાં કિરેન રિજિજુએ કહયું કે હવે જો કોઈ બહાનું બનાવીને બહાર નીકળવા માંગે છે અને ચર્ચામાંથી ભાગવા માંગે છે, તો આપણે તેને રોકી શકતા નથી. તેમણે કહયું કે ચાલો ચર્ચા કરીએ. દરેક પક્ષને પોતાનો પક્ષ રજૂ કરવાની અને પોતાનો દ્રષ્ટિકોણ રજૂ કરવાની તક મળશે.
તેમણે કહયું કે જો લોકસભામાં ફક્ત બે દિવસ ચર્ચા થાય, તો શું રાજ્યસભા માટે કોઈ સમય બચશે? કિરેન રિજિજુએ કહયું કે અમે આટલું સારું બિલ લાવ્યા છીએ, કોણે તેનું સમર્થન કર્યું અને કોણે તેનો વિરોધ કર્યો તે નોંધવામાં આવશે. તેમણે એમ પણ કહ્યું કે કાલે ચર્ચા થશે, જવાબ આપવામાં આવશે અને તેને લોકસભા દ્વારા પસાર કરાવવો પડશે.
કિરેન રિજિજુએ કહયું કે અમે હાથ જોડીને વિનંતી કરીએ છીએ કે, જો તમારી પાસે બિલ પર કહેવા માટે કંઈ નથી તો બહાના ન બનાવો. ખુલીને બોલો. તેમણે એમ પણ કહ્યું કે ચર્ચાનો સમય વધારી શકાય છે પરંતુ બિલ તે જ દિવસે પસાર થવું પડશે. કિરેન રિજિજુએ કહ્યું કે ઘણા મુસ્લિમો પણ આ બિલના સમર્થનમાં છે. થ્ભ્ઘ્ માં ઘણી ચર્ચા થઈ છે. આ બિલ અંગે ભ્રમ ફેલાવવામાં આવી રહયો છે.
વિપક્ષે બિઝનેસ એડવાઇઝરી કમિટીની બેઠકમાંથી વોકઆઉટ કર્યું. અગાઉ, સરકારે ચારથી છ કલાક ચર્ચાનો પ્રસ્તાવ મૂક્યો હતો. વિરોધ પક્ષોના નેતાઓ વક્ફ બિલ પર ઓછામાં ઓછા ૧૨ કલાક ચર્ચાની માંગ કરી રહ્યા હતા. સરકારે બે દિવસ ચર્ચા ચાલુ રાખવાની અસમર્થતા વ્યક્ત કરી, એમ કહીને કે ફક્ત બે દિવસ બાકી છે. આ પછી વિપક્ષી સભ્યોએ કાર્ય સલાહકાર સમિતિની બેઠકમાંથી વોકઆઉટ કર્યું. બાદમાં, આઠ કલાકની ચર્ચા પર સર્વસંમતિ સધાઈ અને સરકારે એમ પણ કહ્યું કે ચર્ચાનો સમય વધુ લંબાવી શકાય છે.
સંસદીય બાબતોના મંત્રીએ એમ પણ કહયું કે હું આ બિલને આવતીકાલે પ્રશ્નકાળ પછી તરત જ ગૃહમાં વિચારણા અને પસાર કરવા માંગુ છું અને ચર્ચા માટે આઠ કલાકનો સમય અલગ રાખવામાં આવ્યો છે. તેમણે એમ પણ કહ્યું કે સંસદનું આ સત્ર ૪ એપ્રિલ સુધી છે. લોકસભા પછી, આ બિલ રાજ્યસભા દ્વારા પણ પસાર કરાવવું પડશે. રિજિજુએ કહયું કે આપણે રાજ્યસભામાં પણ સમય આપવો પડશે. રાજ્યસભા લોકસભા જેટલી જ મહત્વપૂર્ણ છે.
વક્ફ બિલ અંગે દરેક પગલા સાવધાનીપૂર્વક લઈ રહેલી સરકાર ઇચ્છતી નથી કે કોઈ પણ સભ્ય ઉશ્કેરાઈ જાય અને એવું કંઈક બોલે જેનાથી વિપક્ષને હોબાળો કરવાની તક મળે અને હોબાળાથી ગૃહની કાર્યવાહી ખોરવાઈ શકે. તેથી, બધા સભ્યોને કહેવામાં આવ્યું છે કે જેમને પણ આ બિલ પર ચર્ચામાં ભાગ લેવાની તક મળે, તેમણે સભ્યતાથી પોતાના વિચારો રજૂ કરવા જોઈએ અને મુખ્ય મુદ્દાઓ પર ધ્યાન કેન્દ્રિત કરવું જોઈએ. બોલતી વખતે ઉત્સાહિત ન થાઓ. ભાજપે તેના સાથી પક્ષોને ગૃહમાં તેમના તમામ સભ્યોની હાજરી સુનિશ્ચિત કરવા પણ કહયું છે.
(4:10 PM IST)
