રશિયાના રાષ્ટ્રપતિ પુતિને અમેરિકાના રાષ્ટ્રપતિ ટ્રમ્પને મોટો ઝટકો આપ્યો છે. રશિયાએ હાલમાં કહ્યું છે કે તે ટ્રમ્પ દ્વારા રજૂ કરાયેલા યુદ્ધવિરામ પ્રસ્તાવ પર ગંભીરતાથી વિચાર કરી રહ્યું છે, પરંતુ તેને કરારનું વર્તમાન સ્વરૂપ મંજૂર નથી. રશિયન રાજ્ય મીડિયા આઉટલેટ્સને ટાંકીને ડેઇલી મેઇલના અહેવાલમાં કહેવામાં આવ્યું હતું કે મોસ્કોએ યુએસ પ્રસ્તાવ સ્વીકારવાનો ઇન્કાર કર્યો છે પરંતુ માંગણીઓની યાદી પણ જારી કરી છે.

રશિયન નાયબ વિદેશ પ્રધાન સેરગેઈ ર્યાબકોવે જણાવ્યું હતું કે, 'અમે અમેરિકનો દ્વારા પ્રસ્તાવિત મોડેલ અને ઉકેલોને ખૂબ જ ગંભીરતાથી લઈએ છીએ, પરંતુ અમે તેને તેના વર્તમાન સ્વરૂપમાં સ્વીકારી શકતા નથી.'

રવિવારે ટ્રમ્પે રશિયા અને યુક્રેન વચ્ચે યુદ્ધવિરામના કરાર પર પહોંચવામાં નિષ્ફળતા પર નિરાશા વ્યક્ત કરી હતી. યુદ્ધને સમાપ્ત કરવાની તેમની પહેલમાં પુતિન અને ઝેલેન્સકીના વલણ પર પ્રહારો કર્યા હતા. ટ્રમ્પે પત્રકારોને જણાવ્યું હતું કે, 'અમે (યુદ્ધવિરામ તરફ) ઘણી પ્રગતિ કરી છે અને સ્વીકાર્યું કે, 'બંને નેતાઓ વચ્ચે ઘણી કડવાશ છે. તેથી એવું લાગી રહ્યું છે કે, બંને દેશો વચ્ચે હાલ યુદ્ધ અટકે તેવા કોઈ સંકેત નજરે પડી રહ્યા નથી.

ટ્રમ્પે એક ઇન્ટરવ્યુ દરમિયાન પોતાનો અસંતોષ વ્યક્ત કર્યો હતો. તેમણે કહ્યું હતું કે, પુતિન દ્વારા ઝેલેન્સકીની વિશ્વસનીયતા પર સવાલ ઉઠાવવાથી તેઓ નિરાશ અને નારાજ છે. રશિયન નેતાએ તાજેતરમાં કહ્યું હતું કે ઝેલેન્સકી પાસે શાંતિ કરાર પર હસ્તાક્ષર કરવાનો અધિકાર નથી અને સૂચવ્યું હતું કે યુક્રેનને બાહ્ય શાસનની જરૂર છે. ટ્રમ્પે કહ્યું હતું કે તેઓ રશિયા પર નવા પ્રતિબંધો લાદવાનું વિચારશે. રશિયા પહેલેથી જ ભારે નાણાકીય દંડનો સામનો કરી રહ્યું છે અને તે તેની તેલ નિકાસ ઘટાડવા માટે ટેરિફનો ઉપયોગ કરી રહ્યું છે.