બિહારના પટણા શહેરના અગમકુઆન પોલીસ સ્ટેશન વિસ્તારમાં એક હૃદયદ્રાવક ઘટના પ્રકાશમાં આવી છે. દિલ્હીના રહેવાસી વિકાસ કુમાર (23) એ બુધવારે પોતાના ભાડાના ઘરમાં PUBG ગેમ રમતો હતો, તેની પત્ની દ્વારા તેને વારંવાર રોકટોક કરવામાં આવતી હતી, જેના કારણે યુવકે કંટાળીને ફાંસી લગાવીને આત્મહત્યા કરી લીધી હતી. ઘટનાની માહિતી મળતા જ પોલીસ ઘટનાસ્થળે પહોંચી ગઈ હતી અને મૃતદેહને પોતાના કબજામાં લઈ પોસ્ટમોર્ટમ માટે મોકલી આપ્યો અને કેસની તપાસ શરૂ કરી હતી.

મૃતક વિકાસની પત્ની મનીતા કુમારીનું કહેવું છે કે તે હંમેશા PUBG ગેમ રમતો હતો અને ગેમ દ્વારા પૈસા કમાઈને ઘર ચલાવતો હતો. જ્યારે પણ તેને ગેમ રમવાની ના પાડતા હતા, ત્યારે તે આત્મહત્યા કરવાની ધમકી આપતો હતો. ઘટના સમયે મનિતા ચૈત્ર છઠ ઉત્સવમાં ભાગ લેવા માટે તેની માસીના ઘરે ગઈ હતી.

તેણીએ તેના પતિ સાથે છેલ્લે સવારે 5 વાગ્યે ફોન પર વાત કરી હતી, જે દરમિયાન તેની પત્નીએ તેના પતિને ગેમ રમવાની ના પાડી હતી. થોડા સમય પછી મકાનમાલિકે ફોન કરીને જાણ કરી કે વિકાસે આત્મહત્યા કરી લીધી છે. મનિતાની કાકી શકીલા દેવીએ જણાવ્યું કે વિકાસ PUBG ગેમમાં રોકાણ કરીને પૈસા કમાતો હતો અને ઘરના ખર્ચાઓ તેના દ્વારા પૂરા થતા હતા. તે દિવસ-રાત મોબાઈલ પર ગેમ રમતો હતો, જેનાથી મનિતા તેને રોકતી હતી.

અગમકુઆન પોલીસ સ્ટેશનના સબ-ઇન્સ્પેક્ટર રામાયણ સિંહના જણાવ્યા અનુસાર યુવકે ફાંસી લગાવીને આત્મહત્યા કરી છે. પરિવારના સભ્યોએ જણાવ્યું કે તેને ગેમ રમવાનું વ્યસન હતું અને તેના કારણે પતિ-પત્ની વચ્ચે ઝઘડા થતા હતા. હાલમાં પોલીસ તમામ મુદ્દાઓની તપાસ કરી રહી છે