મુંબઈ :ઈન્ડિગો એરલાઈન્સની એક ફ્લાઇટ એટેન્ડન્ટ પર 5 વર્ષની બાળકીની સોનાની ચેઈન ચોરી કરવાનો આરોપ લાગ્યો છે. આ મામલે છોકરીની માતા પ્રિયંકા મુખર્જીએ ફરિયાદ નોંધાવી છે. પોલીસના જણાવ્યા અનુસાર, આ ઘટના 1 એપ્રિલના રોજ ત્રિવેન્દ્રમથી બેંગલુરુ જતી ઇન્ડિગોની ફ્લાઇટમાં બની હતી, જ્યાંથી પ્રિયંકા કોલકાતા જતી કનેક્ટિંગ ફ્લાઇટ પકડવાની હતી.

ફ્લાઇટ દરમિયાન, પ્રિયંકા મુખર્જીની બે પુત્રીઓ, એક પાંચ વર્ષની અને બીજી બે વર્ષની, એકબીજા સાથે લડી રહી હતી. આ દરમિયાન ફ્લાઇટ એટેન્ડન્ટ અદિતિ અશ્વિની શર્માએ પ્રિયંકાની મોટી પુત્રીને શાંત કરવા માટે તેને ખોળામાં લીધી. જ્યારે વિમાન લેન્ડિંગ માટે તૈયાર હતું, ત્યારે ફ્લાઇટ એટેન્ડન્ટે છોકરીને તેની માતાને પાછી સોંપી દીધી

જ્યારે પ્રિયંકા મુખર્જીએ બાળકને પોતાના હાથમાં લીધું, ત્યારે તેણે જોયું કે તેની સોનાની ચેઇન, જેનું વજન લગભગ 20 ગ્રામ હતું, ગાયબ હતી. તેણે તરત જ ફ્લાઇટ એટેન્ડન્ટ અદિતિને આ વિશે પૂછ્યું, પરંતુ તેણીએ ચોરી કરવાનો ઇનકાર કર્યો.

પ્રિયંકાએ તાત્કાલિક આ બાબત સેન્ટ્રલ ઇન્ડસ્ટ્રિયલ સિક્યુરિટી ફોર્સ (CISF), ઇન્ડિગો એરલાઇન્સ અને એરપોર્ટ સત્તાવાળાઓના ધ્યાન પર લાવી. પણ તેને સાચો જવાબ ન મળ્યો. પ્રિયંકાના મતે, "બેંગલુરુમાં ઉતર્યા પછી, મને બપોર સુધી કોઈ તરફથી યોગ્ય જવાબ મળ્યો ન હતો. એરપોર્ટ અધિકારીઓએ કહ્યું કે આ ઘટના ફ્લાઇટની અંદર બની હતી, તેથી તેને એરલાઇન અને પોલીસ સાથે મળીને ઉકેલવો પડશે."

જ્યારે પોલીસે ઇન્ડિગોનો સંપર્ક કર્યો, ત્યારે એરલાઇને આરોપોને નકારી કાઢ્યા અને કહ્યું કે તેમની પાસે ઘટનાની પુષ્ટિ કરવા માટે કોઈ સીસીટીવી ફૂટેજ નથી.

ઇન્ડિગોએ આ બાબતે એક સત્તાવાર નિવેદન જારી કરીને કહ્યું, "અમે તાજેતરમાં ફ્લાઇટ 6E 661 (ત્રિવેન્દ્રમથી બેંગલુરુ) માં બનેલી એક ઘટનાથી વાકેફ છીએ જેમાં એક ગ્રાહક દ્વારા ફરિયાદ નોંધાવવામાં આવી છે. અમે આવા મામલાઓને ખૂબ જ ગંભીરતાથી લઈએ છીએ અને તપાસમાં સંબંધિત અધિકારીઓને સંપૂર્ણ સહકાર આપી રહ્યા છીએ."