તા. ૧૭ નવેમ્બર ર૦ર૬ વિક્રમ સંવત ર૦૮૩ કારતક સુદ – ૮ મંગળવાર
News of Wednesday, 9th April 2025
આરોગ્ય વિભાગના એડિશનલ કમિશનર દિનેશભાઈ પરમાર સહિત બે રૂ. 30 લાખની લાંચ માંગતા ACBના હાથે ઝડપાતા ખળભળાટ મચ્યો
એસીબીની સફળ ટ્રેપ : શાહીબાગમાં આરોપીના ઘરે રંગે હાથે ઝડપાયા : રૂ. 15 લાખ રિકવર

અમદાવાદ: ગુજરાતના આરોગ્ય વિભાગમાં લાંચનો મોટો કૌભાંડ સામે આવ્યું છે. એન્ટી કરપ્શન બ્યુરો (એસીબી)એ આરોગ્ય વિભાગના એડિશનલ કમિશનર અને એક નિવૃત્ત ડીનને રૂ. 30 લાખની લાંચ લેતા રંગે હાથે ઝડપી લીધા છે. આ ઘટના આજે, 08 એપ્રિલ 2025ના રોજ અમદાવાદના શાહીબાગ વિસ્તારમાં બની, જ્યાં એસીબીએ સફળ ટ્રેપ ગોઠવી આરોપીઓને ઝડપી લીધા હતા.
ફરિયાદીની શિક્ષાત્મક કાર્યવાહીથી શરૂ થયું કૌભાંડ:
આ કેસના ફરિયાદી એક જાગૃત નાગરિક છે, જેમણે અગાઉ ભાવનગર ખાતે નાયબ નિયામક (આરોગ્ય અને તબીબી સેવાઓ) તરીકે ફરજ બજાવી હતી. તેમણે આરોગ્ય વિભાગના સ્ટાફ સામે બોગસ મેડિકલ પ્રેક્ટિસના આરોપે શિક્ષાત્મક કાર્યવાહી કરી હતી. આના પગલે તેમની સામે ખંડણીની ફરિયાદ કરવામાં આવી હતી, જેના કારણે ફરિયાદી અને તેમના સાથી ડોક્ટરને ફરજ મોકૂફી પર ઉતારવામાં આવ્યા હતા. આરોગ્ય વિભાગે બંને ડોક્ટરો સામે પ્રાથમિક તપાસ શરૂ કરી, જે ઓક્ટોબર 2024માં પૂર્ણ થઈ અને જાન્યુઆરી 2025માં તપાસ અધિકારીએ પોતાનો અહેવાલ સુપરત કર્યો હતો.
લાંચની માંગણી અને ટ્રેપનું આયોજન:
તપાસ દરમિયાન આરોપી નંબર-2 ગીરીશભાઈ જેઠાલાલ પરમારે ફરિયાદીનો સંપર્ક કરી, તેમને અને તેમના સાથી ડોક્ટરને તપાસમાં તરફેણ કરવા માટે આરોપી નંબર-1 દિનેશભાઈ પરમાર (અધિક સચિવ, આરોગ્ય અને પરિવાર કલ્યાણ વિભાગ) સાથે મીટિંગ કરવા બોલાવ્યા હતા. ગાંધીનગર ખાતે બંને આરોપીઓ સાથે રૂબરૂ વાતચીત દરમિયાન, આરોપીઓએ એકબીજાના મેળાપમાં ફરિયાદી અને તેમના સાથી ડોક્ટર પાસેથી રૂ. 30 લાખની લાંચની માંગણી કરી હતી. આ પૈકી રૂ. 15 લાખ એડવાન્સ તરીકે અને બાકીની રકમ કામ પૂર્ણ થયા બાદ આપવાનું નક્કી થયું હતું.
આરોપી નંબર-2એ ફોન પર વારંવાર નાણાંની માંગણી કરતા, ફરિયાદીએ લાંચ આપવાનો ઇનકાર કરી એસીબીનો સંપર્ક કર્યો. એસીબીએ આજે શાહીબાગમાં આરોપી નંબર-2ના ઘરે લાંચનું છટકું ગોઠવ્યું. આરોપીએ ફરિયાદીને પોતાના ઘરે બોલાવી, હેતુલક્ષી વાતચીત કરી રૂ. 15 લાખ સ્વીકાર્યા, ત્યારે એસીબીએ તેને રંગે હાથે ઝડપી લીધો.
આરોપીઓની વિગતો:
1. દિનેશભાઈ પરમાર : અધિક સચિવ (તપાસ), વર્ગ-1, આરોગ્ય અને પરિવાર કલ્યાણ વિભાગ
2. ગીરીશભાઈ જેઠાલાલ પરમાર : નિવૃત્ત ડીન, સરકારી ડેન્ટલ કોલેજ, અસારવા, અમદાવાદ (વચેટિયા તરીકે સામેલ)
એસીબી ટીમની કામગીરી:
- ટ્રેપિંગ ઓફિસર : એસ. એન. બારોટ, પોલીસ ઇન્સ્પેક્ટર, એસીબી, ફિલ્ડ-3 (ઇન્ટેલિજન્સ), અમદાવાદ
- મદદમાં : શ્રીમતી એ. કે. ચૌહાણ, પોલીસ ઇન્સ્પેક્ટર, એસીબી, ફિલ્ડ-1
- સુપરવિઝન ઓફિસર : એ. વી. પટેલ, મદદનીશ નિયામક, એસીબી, ફિલ્ડ-3 (ઇન્ટેલિજન્સ)
ઘટનાનું સ્થળ અને રિકવરી:
આ ઘટના આરોપી નંબર-2ના ઘરે બની, જેનું સરનામું બંગલો નંબર-8, અર્હમ સોસાયટી, શાહીબાગ, અમદાવાદ છે. એસીબીએ રૂ. 15 લાખની રકમ રિકવર કરી છે, જે આરોપીએ ફરિયાદી પાસેથી સ્વીકારી હતી.
આ ઘટનાએ આરોગ્ય વિભાગની કામગીરી પર સવાલો ઉભા કર્યા છે. એક જાગૃત નાગરિકની હિંમત અને એસીબીની ત્વરિત કાર્યવાહીથી આ કૌભાંડનો પર્દાફાશ થયો છે. હવે આગળની તપાસમાં આરોપીઓ સામે કડક કાર્યવાહીની અપેક્ષા રાખવામાં આવે છે.
(10:06 AM IST)









છેલ્લા 8 દિવસમાં સૌથી લોકપ્રિય 
