તા. ૧૭ નવેમ્બર ર૦ર૬ વિક્રમ સંવત ર૦૮૩ કારતક સુદ – ૮ મંગળવાર
News of Wednesday, 9th April 2025
યુએસ એરપોર્ટ ભારતીય મહિલાને ૮ કલાક રોકી રખાઈ, કપડાં ઉતારવી ચેકિંગ કરાયું
અમેરિકાના એરપોર્ટ પર ૮ કલાક સુધી ડિટેઈન કરીને રાખવામાં આવી હતી અને તે દરમિયાન તેને ઘણી માનસિક યાતનાઓમાંથી પસાર થવું પડયું હતું :હેન્ડબેગમાંથી પાવર બેન્ક મળતા તેને એરપોર્ટ પર ૮ કલાક કરીને રાખવામાં આવી હતીઃ શ્રુતિના કહેવા મુજબ, તેને ૮ કલાક દરમિયાન ટોઈલેટ જવાની કે કોઈને ફોન કરવાની મંજૂરી પણ નહોંતી અપાઈ

ન્યુયોર્ક, તા.૯: અમેરિકામાં ડોનાલ્ડ ટ્રમ્પ સત્તામાં આવ્યા પછી ઈમિગ્રેશન નીતિમાં ઘણા ફેરફારો કરાયા છે. જેના કારણે અમેરિકાનો પ્રવાસ કરનારા લોકોને ઘણી પરેશાનીઓનો સામનો કરવો પડી રહ્યો છે. હવે તો નાની એવી ભૂલ માટે પણ તેમને શંકાસ્પદ માની લેવામાં આવે છે અને એરપોર્ટ પર કલાકો સુધી પૂછપરછ કરવામાં આવે છે. જો પેસેન્જર અધિકારીઓના સવાલોના જવાબ આપવામાં જરા પણ ખચકાટ અનુભવે તો તેને અમેરિકામાં એન્ટ્રી અપાતી નથી. અમેરિકાના એરપોર્ટ પર કડક ચેકિંગના કારણે વેલિડ વિઝા ધરાવતા પેસેન્જર્સને પણ લાંબા સમય સુધી ડિટેઈન કરીને રાખવામાં આવ્યા હોવાના ઘણા રિપોર્ટ સામે આવ્યા છે. તાજેતરમાં જ એક ભારતીય મહિલા આંત્રપ્રિન્યોરને પણ અમેરિકાના એરપોર્ટ પર આવો કડવો અનુભવ થયો હતો.
ઈન્ડિયા એક્શન પ્રોજેક્ટ અને ચાયપાનીના ફાઉન્ડર શ્રુતિ ચતુર્વેદીએ પોતાને અમેરિકાના એરપોર્ટ પર થયેલા ઘણા જ ખરાબ અને માનસિક રીતે તોડી નાખનારા અનુભવ અંગે સોશિયલ મીડિયા પ્લેટફોર્મ એક્સ પર એક પોસ્ટમાં જણાવ્યું હતું. તેમણે જણાવ્યું હતું કે, ચેકિંગના નામ પર તેમને ૮ કલાક એરપોર્ટ પર રોકી રાખવામાં આવ્યા હતાં.આ દરમિયાન તેમના ગરમ કપડાં ઉતરાવાયાં હતા, ટોઈલેટ જવા ન દેવાઈ અને કોઈને ફોન પણ કરવા ન દેવાયો ન હતો. આ બધું માત્ર એટલા માટે થયું કે તેની પાસે એક પાવર બેન્ક હતી.
શ્રુતિએ જણાવ્યું હતું કે, અલાસ્કાના એરપોર્ટ પર તેમને ૮ કલાક રોકી રાખવામાં આવતા તેઓ પોતાની ફ્લાઈટ પણ ચૂકી ગયા હતાં. તેમણે આરોપ લગાવ્યો છે કે, ચેકિંગ દરમિયાન તેના કપડાં ઉતરાવાયાં હતા ત્યારે એક પુરુષ અધિકારી કેમેરા સામે બેસીને તે જોઈ રહ્યો હતો. શ્રુતિના આરોપ મુજબ, ૮ કલાક દરમિયાન તેને ટોઈલેટ પણ જવાની મંજૂરી પણ આપવામાં આવી ન હતી.
શ્રુતિએ આરોપ મુજબ, તેમની હેન્ડબેગમાંથી પાવર બેન્ક મળવાના કારણે તેનું ચેકિંગ કરવામાં આવ્યું હતું. તેમણે પોતાની પોસ્ટમાં લખ્યું છે કે, કલ્પના કરો કે પોલીસ અને FBI દ્વારા તમને ૮ કલાક કસ્ટડીમાં રાખવામાં આવે. પછી હાસ્યાસ્પદ બાબતો વિશે પૂછવામાં આવે, કેમેરા પર એક પુરુષ અધિકારી દ્વારા શારીરિક તપાસ કરવામાં આવે, ગરમ કપડાં ઉતરાવા કહેવામાં આવે અને એક એસી રૂમમાં રાખવામાં આવે, મોબાઈલ ફોન અને પર્સ લઈ લેવામાં આવે, ટોઈલેટ જવાની કે કોઈને ફોન કરવાની મંજૂરી આપવામાં ન આવે અને તમારી ફ્લાઈટ છૂટી જાય તો તમારી હાલત શું થાય? આ બધું માત્ર એટલા માટે કે એરપોર્ટ પર સિકયોરિટીને તમારી હેન્ડબેગમાં રહેલી પાવર બેન્ક શંકાસ્પદ લાગી છે. શ્રુતિએ ભારતના વિદેશ મંત્રી એસ જયશંકર અને વિદેશ મંત્રાલયને ટેગ કરી પોતાની આપવિતી જણાવી છે. (રર.૧૬)
(3:26 PM IST)









છેલ્લા 8 દિવસમાં સૌથી લોકપ્રિય 
