નવી દિલ્હી: રાષ્ટ્રીય તપાસ એજન્સી (એનઆઈએ) એ આજે શુક્રવારે સવારે પાકિસ્તાની મૂળના કેનેડિયન નાગરિક તહવ્વુર હુસૈન રાણાને નવી દિલ્હીની પટિયાલા હાઉસ કોર્ટમાં રજૂ કર્યો. તહવ્વુર રાણા, જે 2008માં થયેલા મુંબઈ આતંકવાદી હુમલાના મુખ્ય આરોપીઓમાંનો એક છે, તેને ગુરુવારે સાંજે અમેરિકાથી ભારતમાં પ્રત્યાર્પણ કરવામાં આવ્યો હતો. રાત્રે બાર વાગ્યે મળતા અહેવાલો મુજબ એનઆઈએ હવે તેની 15 દિવસની કસ્ટડીની માગણી કરવાની તૈયારીમાં છે, જેથી તેની પૂછપરછ દરમિયાન 26/11ના હુમલા સાથે જોડાયેલી મહત્વની માહિતી મેળવી શકાય.

તહવ્વુર રાણા, જેની ઉંમર 64 વર્ષ છે, તેને ગુરુવારે સાંજે લોસ એન્જલસથી એક વિશેષ વિમાન દ્વારા દિલ્હીના ઈન્દિરા ગાંધી આંતરરાષ્ટ્રીય હવાઈ મથક પર લાવવામાં આવ્યો હતો. આ વિમાનમાં એનઆઈએ અને રાષ્ટ્રીય સુરક્ષા ગાર્ડ (એનએસજી) ના વરિષ્ઠ અધિકારીઓની ટીમ સાથે હતી, જેણે સખત સુરક્ષા વ્યવસ્થા હેઠળ રાણાને ભારત લાવ્યો. એરપોર્ટ પર ઉતરતાની સાથે જ એનઆઈએની ટીમે તેને ઔપચારિક રીતે ધરપકડ કરી અને કાનૂની પ્રક્રિયાઓ પૂર્ણ કરી.

આજે સવારે રાણાને પટિયાલા હાઉસ કોર્ટમાં રજૂ કરવામાં આવ્યો, જ્યાં એનઆઈએના વકીલોએ તેની કસ્ટડીની માગણી કરી. સૂત્રોના જણાવ્યા અનુસાર, એનઆઈએ 15 દિવસની પોલીસ કસ્ટડી માગી રહી છે, જેથી રાણાની વિગતવાર પૂછપરછ કરીને મુંબઈ હુમલાના કાવતરા અને તેમાં સામેલ અન્ય લોકો વિશે માહિતી મેળવી શકાય. કોર્ટની કાર્યવાહીને ધ્યાનમાં રાખીને પટિયાલા હાઉસ કોર્ટની આસપાસ સુરક્ષા વધારી દેવામાં આવી છે, અને મીડિયા તેમજ સામાન્ય લોકોને કોર્ટ પરિસરમાં પ્રવેશવા પર પ્રતિબંધ મૂકવામાં આવ્યો છે.

તહવ્વુર રાણા પર આરોપ છે કે તેણે 26/11 મુંબઈ હુમલાના મુખ્ય કાવતરાકાર ડેવિડ કોલમેન હેડલી (ઉર્ફે દાઉદ ગિલાની) સાથે મળીને આતંકવાદી સંગઠન લશ્કર-એ-તૈયબા (એલઈટી) અને હરકત-ઉલ-જિહાદી ઈસ્લામી (એચયુજેઆઈ) સાથે મળીને આ હુમલાનું આયોજન કર્યું હતું. આ હુમલામાં 166 લોકો માર્યા ગયા હતા અને સેંકડો ઘાયલ થયા હતા. રાણા, જે મૂળ પાકિસ્તાનનો છે અને પછીથી કેનેડાનો નાગરિક બન્યો, તે શિકાગોમાં રહેતો હતો અને ત્યાંથી આ હુમલા માટે લોજિસ્ટિક અને નાણાકીય સહાય પૂરી પાડવામાં સામેલ હોવાનું મનાય છે.

એનઆઈએના જણાવ્યા અનુસાર, રાણાને અમેરિકામાં ન્યાયિક કસ્ટડીમાં રાખવામાં આવ્યો હતો અને ભારત-અમેરિકા પ્રત્યાર્પણ સંધિ હેઠળ તેનું પ્રત્યાર્પણ થયું છે. અમેરિકાની સુપ્રીમ કોર્ટે રાણાની અરજી ફગાવી દીધા બાદ તેનું ભારતને પ્રત્યાર્પણ શક્ય બન્યું. એનઆઈએનું કહેવું છે કે રાણાની પૂછપરછથી પાકિસ્તાન સ્થિત આતંકવાદી નેટવર્ક અને સંભવિત રાજ્ય સમર્થન વિશે મહત્વની માહિતી મળી શકે છે.

કોર્ટમાં રજૂઆત બાદ, જો એનઆઈએને કસ્ટડી મળશે, તો રાણાને તિહાર જેલના ઉચ્ચ સુરક્ષા વોર્ડમાં રાખવામાં આવશે. સુરક્ષાને ધ્યાનમાં રાખીને, દિલ્હી પોલીસની સ્પેશિયલ સેલ અને સ્વાટ ટીમને તેના એસ્કોર્ટ માટે તૈનાત કરવામાં આવી છે. આ ઉપરાંત, નવી દિલ્હી બાર એસોસિએશને જણાવ્યું છે કે તેઓ કોર્ટની કાર્યવાહી નિષ્પક્ષ અને અવિરત રહે તેની ખાતરી કરશે.

આ ઘટનાને ભારતની આતંકવાદ વિરુદ્ધની લડાઈમાં મોટી સફળતા ગણાવવામાં આવી રહી છે. એનઆઈએના એક વરિષ્ઠ અધિકારીએ જણાવ્યું, "આ 26/11ના પીડિતો માટે ન્યાયની દિશામાં મહત્વનું પગલું છે." જોકે, પાકિસ્તાને રાણા સાથે કોઈ સંબંધ હોવાનો ઈનકાર કર્યો છે અને કહ્યું છે કે તે કેનેડાનો નાગરિક છે અને છેલ્લા બે દાયકાથી તેણે પાકિસ્તાની દસ્તાવેજો રિન્યૂ કર્યા નથી.

તહવ્વુર રાણાનું પ્રત્યાર્પણ અને કોર્ટમાં રજૂઆત ભારતની કાયદાકીય અને રાજદ્વારી સફળતાનું પ્રતીક છે. આગામી દિવસોમાં તેની પૂછપરછથી મુંબઈ હુમલાના કાવતરા અંગે નવા ખુલાસા થવાની આશા છે.

ભારત લાવવામાં આવેલ રાણાની પ્રથમ તસવીર  આ સાથે જોવા મળે છે.