નવી દિલ્હી : ભારતના વિદેશી હૂંડિયામણ ભંડોળમાં નોંધપાત્ર વધારો જોવા મળ્યો છે. રિઝર્વ બેંક ઓફ ઈન્ડિયા (આરબીઆઈ) દ્વારા જાહેર કરાયેલા સાપ્તાહિક આંકડાકીય પૂરક અહેવાલ મુજબ, 4 એપ્રિલે પૂર્ણ થયેલા સપ્તાહમાં દેશનું વિદેશી હૂંડિયામણ ભંડોળ 10.8 અબજ ડોલરના ઉછાળા સાથે 676.2 અબજ ડોલરના આંકડાને વટાવી ગયું છે. આ વધારો દેશની આર્થિક સ્થિરતાને મજબૂત કરનારો સાબિત થઈ શકે છે.

આરબીઆઈના આંકડા અનુસાર, વિદેશી હૂંડિયામણ ભંડોળનો મુખ્ય ઘટક એવી વિદેશી ચલણ સંપત્તિમાં 9.07 અબજ ડોલરથી વધુનો વધારો થયો છે, જે હવે 574 અબજ ડોલરને પાર કરી ગઈ છે. આ ઉપરાંત, સોનાના ભંડોળમાં પણ 1.56 અબજ ડોલરનો ઉમેરો થયો છે, જેની કુલ કિંમત 79.36 અબજ ડોલર થઈ છે. વિશેષ ઉપાડ અધિકાર (એસડીઆર) 186 મિલિયન ડોલરના વધારા સાથે 18.36 અબજ ડોલર પર પહોંચ્યા છે, જ્યારે આંતરરાષ્ટ્રીય નાણાકીય ભંડોળ (આઈએમએફ) 46 મિલિયન ડોલરના વધારા સાથે 4.46 અબજ ડોલર થયા છે.

આ નોંધપાત્ર વધારો ભારતની આર્થિક સ્થિતિને વધુ મજબૂત બનાવે છે, જે વૈશ્વિક આર્થિક અનિશ્ચિતતાઓની વચ્ચે દેશની નાણાકીય સ્થિરતાને ટેકો આપી શકે છે. નિષ્ણાતોનું માનવું છે કે વિદેશી હૂંડિયામણ ભંડોળમાં થયેલો આ વધારો ભારતની આયાત ક્ષમતા અને રૂપિયાના મૂલ્યને સ્થિર રાખવામાં મદદરૂપ થશે.