વોશિંગ્ટન: વૈશ્વિક નાણાકીય બજારોમાં ઉથલપાથલ વચ્ચે અમેરિકી રાષ્ટ્રપતિ ડોનાલ્ડ ટ્રમ્પે વ્હાઇટ હાઉસને બદલે ફ્લોરિડાના તેમના ગોલ્ફ કોર્સમાં સમય વિતાવ્યો, જેની ચારેતરફ ટીકા થઈ રહી છે અને ટ્વિમના આવા વર્તનને 'મેડ કિંગ' (પાગલ રાજા) ના વર્તન સાથે સરખાવવામાં આવી રહ્યું છે. આ દરમિયાન, તેમણે આર્થિક અસ્થિરતાને નજરઅંદાજ કરીને ગોલ્ફ રમવાનું અને મોંઘા ડિનરમાં હાજરી આપવાનું પસંદ કર્યું. જોકે, રિપબ્લિકન સહિત અનેક નેતાઓ અને ઉદ્યોગપતિઓના દબાણ બાદ ટ્રમ્પે તેમની કડક ટેરિફ નીતિઓમાં આંશિક નરમાશ દાખવી અને 90 દિવસ માટે કેટલાક ટેરિફ સ્થગિત કરવાની જાહેરાત કરી. આ ઘટનાઓએ ટ્રમ્પના બીજા કાર્યકાળની અણધારી અને વિવાદાસ્પદ શૈલીને ઉજાગર કરી છે.

ટ્રમ્પે 2 એપ્રિલને ‘લિબરેશન ડે’ જાહેર કરીને વ્હાઇટ હાઉસના રોઝ ગાર્ડનમાં દર્શકો સમક્ષ ડઝનબંધ દેશો પર વ્યાપક ટેરિફ લાદવાની જાહેરાત કરી. આ નિર્ણય તેમણે જાહેરાતના થોડા કલાકો પહેલાં જ લીધો હતો. તેમના નજીકના એક વ્યક્તિએ જણાવ્યું હતું, “ટ્રમ્પ હવે કોઈની પરવા કરતા નથી. ખરાબ સમાચારો હોય કે ટીકા, તેમને કોઈ ફરક પડતો નથી. તેઓ જે ચૂંટણીમાં વચન આપ્યું હતું, તે જ કરશે.” આ જાહેરાત બાદ વૈશ્વિક બજારોમાં ટ્રિલિયન ડોલરનું નુકસાન થયું. આવી ગંભીર પરિસ્થિતિમાં ટ્રમ્પે વ્હાઇટ હાઉસમાં રહેવાને બદલે ફ્લોરિડા જવાનું પસંદ કર્યું. બીજા જ દિવસે તેઓ એર ફોર્સ વનમાં મિયામી પહોંચ્યા અને તેમના ડોરલ રિસોર્ટમાં સાઉદી આધારિત LIV ગોલ્ફ ઇવેન્ટમાં હાજરી આપી, જ્યાં તેમના પુત્ર એરિકે ગોલ્ફ કાર્ટ ચલાવીને તેમને લઈ જવાનું કામ કર્યું.

શુક્રવારે ટ્રમ્પે તેમની લાલ ‘મેક અમેરિકા ગ્રેટ અગેન’ કેપ પહેરીને માર-એ-લાગોમાં સમય વિતાવ્યો અને ત્યાંથી નજીકના ગોલ્ફ ક્લબમાં ગયા. આ દરમિયાન તેમણે સોશિયલ મીડિયા પ્લેટફોર્મ ટ્રુથ સોશિયલ પર પોસ્ટ કરીને પોતાની નીતિઓનો બચાવ કર્યો, “અમેરિકામાં મોટા પ્રમાણમાં રોકાણ કરનારા રોકાણકારો માટે આ સોનેરી તક છે, મારી નીતિઓ ક્યારેય બદલાશે નહીં.” આ જ દિવસે વોશિંગ્ટનમાં લિથુઆનિયામાં તાલીમ દરમિયાન શહીદ થયેલા ચાર અમેરિકી સૈનિકોના મૃતદેહ ડોવર એર ફોર્સ બેઝ પર પરત લાવવામાં આવ્યા, પરંતુ ટ્રમ્પે ત્યાં હાજરી આપવાને બદલે ફ્લોરિડામાં રહેવાનું પસંદ કર્યું અને સંરક્ષણ સચિવ પીટ હેગસેથને મોકલ્યા. તે જ સાંજે તેમણે મેગા ઇન્ક. માટે એક ભવ્ય ડિનરમાં ભાગ લીધો, જેમાં એક ટિકિટની કિંમત 10 લાખ ડોલર હોવાનું કહેવાય છે.

શનિવારે ટ્રમ્પ જ્યૂપિટરમાં તેમના પરિવારના ગોલ્ફ કોર્સ પર રમ્યા, જ્યાં તેમણે સિનિયર ક્લબ ચેમ્પિયનશિપની બીજી રાઉન્ડ મેચ જીતી. આની જાહેરાત વ્હાઇટ હાઉસે સત્તાવાર રીતે કરી, “રાષ્ટ્રપતિએ જ્યૂપિટરમાં આજે સિનિયર ક્લબ ચેમ્પિયનશિપની બીજી રાઉન્ડ મેચ જીતી અને રવિવારની ચેમ્પિયનશિપ રાઉન્ડમાં પ્રવેશ્યા.” રવિવારે, જ્યારે તેમના કેબિનેટ સભ્યો ટીવી પર આર્થિક સંકટને નિયંત્રિત કરવા મથી રહ્યા હતા, ટ્રમ્પે ગોલ્ફ રમવાનું ચાલુ રાખ્યું. તેમના સહયોગીઓએ મિશ્ર સંદેશ આપ્યા, કેટલાકે ટેરિફને અડગ ગણાવ્યા, જ્યારે અન્યએ વાટાઘાટોની શક્યતા સૂચવી.

વોશિંગ્ટન પાછા ફર્યા બાદ ટ્રમ્પે રિપબ્લિકન સાથીઓ અને ઉદ્યોગપતિઓના વધતા દબાણનો સામનો કરવો પડ્યો. તેમનો પ્રથમ જાહેર કાર્યક્રમ એલએ ડોજર્સના વર્લ્ડ સિરીઝ વિજેતાઓનું સ્વાગત હતું, જ્યાં તેમને ‘ટ્રમ્પ 47’ જર્સી ભેટમાં મળી. તે સાંજે એક ભવ્ય ડિનરમાં તેમણે દાવો કર્યો, “હું જાણું છું કે હું શું કરું છું. આ દેશો મને ફોન કરી રહ્યા છે, તેઓ વાટાઘાટો માટે ઉત્સુક છે.” જોકે, બીજા દિવસે ટ્રમ્પે ટ્રુથ સોશિયલ પર 90 દિવસ માટે કેટલાક ટેરિફ સ્થગિત કરવાની જાહેરાત કરી, જોકે ચીન સામેના ટેરિફને વધુ કડક કરવાનું ચાલુ રાખ્યું.

ડેમોક્રેટિક રણનીતિકાર કર્ટ બાર્ડેલાએ આ વર્તનને ‘મેડ કિંગ’ની ઉપમા આપી. તેમણે જણાવ્યું, “જ્યારે તમે ભવ્ય ડિનરમાં લોકોને આર્થિક મુશ્કેલીઓ સહન કરવાનું કહો છો, અથવા ગોલ્ફ રમતા હોવ ત્યારે દેશ અને દુનિયામાં આર્થિક અરાજકતા ફેલાયેલી હોય, તો તમે સામાન્ય લોકોની ચિંતાઓથી સંપૂર્ણપણે અલિપ્ત છો. આની રાજકીય કિંમત ચૂકવવી પડશે.” આ ઘટનાઓએ ટ્રમ્પના બીજા કાર્યકાળની અણધારી શૈલી અને વિવાદોને વધુ ઉજાગર કર્યા છે.