મધ્યપ્રદેશના ગુના જિલ્લામાં હનુમાન જયંતિ નિમિત્તે કાઢવામાં આવેલી શોભાયાત્રા દરમિયાન પથ્થરમારાનો બનાવ બનતા વાતાવરણ તંગ બન્યું હતું. કર્નલગંજ વિસ્તારમાં મસ્જિદ પાસે ભાજપના કાઉન્સિલર ઓમ પ્રકાશ કુશવાહ ઉર્ફે ગબ્બર કુશવાહ અને તેમના સમર્થકોની આગેવાની હેઠળનું સરઘસ વિવાદમાં ફેરવાઈ ગયું જ્યારે સરઘસમાં ડીજે પર જોરથી સંગીત વગાડવામાં આવ્યું.

    પ્રત્યક્ષદર્શીઓના જણાવ્યા અનુસાર, ડીજે વગાડવાથી ગુસ્સે ભરાયેલા લોકોએ મસ્જિદની સામે જુલુસ અટકાવ્યો અને વિરોધ કર્યો, ત્યારબાદ વિવાદ વધ્યો. વિવાદ પછી તરત જ મસ્જિદ તરફથી પથ્થરમારો શરૂ થયો, જેના જવાબમાં જુલુસમાં સામેલ લોકોએ પણ પથ્થરમારો કર્યો. થોડી જ વારમાં પરિસ્થિતિ કાબુ બહાર થઈ ગઈ અને વિસ્તારમાં નાસભાગ મચી ગઈ 

    આ ઘટનામાં ભાજપના કાઉન્સિલર ગબ્બર કુશવાહાના 11 વર્ષના પુત્ર અકુલ કુશવાહ સહિત ઘણા લોકો ઘાયલ થયા હતા. ઘાયલોને તાત્કાલિક નજીકની હોસ્પિટલમાં દાખલ કરવામાં આવ્યા હતા. 

   માહિતી મળતા જ એસપી સંજીવ કુમાર સિંહા અને કલેક્ટર કિશોર કુમાર કનૈયાલ ભારે પોલીસ ફોર્સ સાથે ઘટનાસ્થળે પહોંચી ગયા. પોલીસે તાત્કાલિક કાર્યવાહી કરી અને પરિસ્થિતિને કાબુમાં લીધી. 

  એસપી સિંહાએ જણાવ્યું હતું કે, "કર્નલગંજમાં વિવાદની માહિતી મળતાની સાથે જ પોલીસ ફોર્સ તૈનાત કરવામાં આવી હતી. હાલમાં પરિસ્થિતિ નિયંત્રણમાં છે અને મામલાની તપાસ કરવામાં આવી રહી છે. 

  આ ઘટનાથી ગુસ્સે ભરાયેલા હિન્દુ સંગઠનો અને સ્થાનિક લોકોએ કર્નલગંજ ચોકડી પર નાકાબંધી કરી હતી અને સિટી પોલીસ સ્ટેશનનો ઘેરાવ કર્યો હતો અને સૂત્રોચ્ચાર કર્યા હતા. પ્રદર્શનકારીઓએ પથ્થરબાજો સામે કડક કાર્યવાહીની માંગ કરી હતી. 

  ભાજપના કાઉન્સિલર ગબ્બર કુશવાહાએ શહેર પોલીસ સ્ટેશનમાં FIR નોંધાવી છે. ફરિયાદમાં તેમણે તાજિયા સમિતિના પ્રમુખ યુસુફ ખાન અને અન્ય લોકો પર પથ્થરમારો કરવાનો અને હિંસા ભડકાવવાનો આરોપ લગાવ્યો છે. પોલીસે કેસ નોંધીને તપાસ શરૂ કરી છે