હૈદરાબાદ: IPL 2025માં અત્યાર સુધી નિરાશાજનક પ્રદર્શન કરી રહેલી સનરાઇઝર્સ હૈદરાબાદની ટીમ સોમવારે એક ચોંકાવનારી ઘટનાનો સામનો કરવો પડ્યો હતો. ટીમના ખેલાડીઓ હૈદરાબાદના પોશ વિસ્તાર બંજારા હિલ્સમાં આવેલી પાર્ક હયાત હોટેલમાં રોકાયેલા હતા, જ્યાં સોમવારે સવારે અચાનક આગ લાગી ગઈ હતી. આ ઘટનાને પગલે હોટેલમાં અફરાતફરીનો માહોલ સર્જાયો હતો, પરંતુ સદનસીબે તમામ ખેલાડીઓ સુરક્ષિત છે અને તેમને તાત્કાલિક બીજી હોટેલમાં ખસેડવામાં આવ્યા છે.

એક અહેવાલ અનુસાર, બંજારા હિલ્સ સ્થિત પાર્ક હયાત હોટેલના એક માળે અચાનક આગ લાગી હતી, જેના કારણે હોટેલ અને તેની આસપાસના વિસ્તારોમાં ધુમાડાના ગોટેગોટા ફેલાઈ ગયા હતા. ઘટનાની જાણ થતાં જ ફાયર બ્રિગેડની ગાડીઓ તાત્કાલિક ઘટનાસ્થળે પહોંચી ગઈ હતી અને ભારે જહેમત બાદ આગ પર કાબૂ મેળવવામાં સફળતા મળી હતી. આગ લાગવાનું કારણ હજુ અકબંધ છે, પરંતુ પોલીસ અને ફાયર વિભાગ દ્વારા તેની તપાસ હાથ ધરવામાં આવી રહી છે.

આ ઘટના બાદ સનરાઇઝર્સ હૈદરાબાદના તમામ ખેલાડીઓને સલામતીના ભાગરૂપે તાત્કાલિક બીજી હોટેલમાં ખસેડવામાં આવ્યા હતા. આગ લાગ્યા બાદ હોટેલની અંદર રહેલા લોકો જીવ બચાવવા માટે બહાર દોડી આવ્યા હતા, જેના કારણે થોડા સમય માટે અફરાતફરીનો માહોલ સર્જાયો હતો. જો કે, ફાયર બ્રિગેડના સમયસરના આગમન અને કાર્યવાહીથી પરિસ્થિતિને વધુ વણસતી અટકાવવામાં સફળતા મળી હતી.

ઉલ્લેખનીય છે કે સનરાઇઝર્સ હૈદરાબાદનું આ સિઝનમાં પ્રદર્શન અત્યાર સુધી કંઈ ખાસ રહ્યું નથી. ટીમે અત્યાર સુધીમાં કુલ ૬ મેચ રમી છે, જેમાંથી તેઓ માત્ર ૨ મેચમાં જ જીત મેળવી શક્યા છે, જ્યારે ૪ મેચમાં તેમને હારનો સામનો કરવો પડ્યો છે. ટીમે રાજસ્થાન રોયલ્સ અને પંજાબ કિંગ્સ સામે જીત મેળવી હતી, જ્યારે લખનૌ, દિલ્હી, કોલકાતા અને ગુજરાત સામે તેમને પરાજયનો સામનો કરવો પડ્યો હતો. જો કે, ટીમે તેમની છેલ્લી મેચમાં પંજાબ કિંગ્સ સામે શાનદાર વાપસી કરી હતી, જેમાં અભિષેક શર્માએ આક્રમક સદી ફટકારી હતી. આગામી ૧૭ એપ્રિલે ટીમનો મુકાબલો મુંબઈ ઈન્ડિયન્સ સામે છે, ત્યારે આ ઘટના ટીમના માનસિક અને શારીરિક સ્વાસ્થ્ય પર કેવી અસર કરે છે તે જોવું મહત્ત્વનું રહેશે. હાલમાં તો તમામ ખેલાડીઓ સુરક્ષિત છે તે સમાચાર ટીમના ચાહકો માટે રાહતરૂપ છે.