નવી દિલ્‍હી, તા.૧૬: ભારતે વક્‍ફ સુધારા અધિનિયમ, ૨૦૨૫ પર પાકિસ્‍તાનની ટિપ્‍પણીઓની ટીકા કરી અને કહ્યું કે લઘુમતીઓના રક્ષણની વાત આવે ત્‍યારે પડોશી દેશે પોતાના નબળા રેકોર્ડ પર નજર નાખવી જોઈએ.

વિદેશ મંત્રાલયે એક નિવેદનમાં જણાવ્‍યું હતું કે, ભારતની સંસદ દ્વારા પસાર કરાયેલા વક્‍ફ સુધારા કાયદા પર પાકિસ્‍તાન દ્વારા કરવામાં આવેલી પ્રેરિત અને પાયાવિહોણી ટિપ્‍પણીઓને અમે સખત રીતે નકારી કાઢીએ છીએ. પાકિસ્‍તાનને ભારતના આંતરિક બાબતો પર ટિપ્‍પણી કરવાનો કોઈ અધિકાર નથી. બીજાઓને ભાષણ આપવાને બદલે, પાકિસ્‍તાને લઘુમતીઓના અધિકારોના રક્ષણમાં પોતાના નબળા રેકોર્ડ પર ધ્‍યાન આપવું જોઈએ. ગયા અઠવાડિયે, વકફ સુધારા કાયદા પર ટિપ્‍પણી કરતા, પાકિસ્‍તાનના વિદેશ કાર્યાલયના પ્રવક્‍તા શફકત અલી ખાને ભારત દ્વારા વકફ કાયદામાં કરવામાં આવેલા ફેરફારોની નિંદા કરી હતી અને તેને ભારતીય મુસ્‍લિમોના ધાર્મિક અને આર્થિક અધિકારોનું ઉલ્લંઘન ગણાવ્‍યું હતું.

તેમની સાપ્તાહિક પ્રેસ કોન્‍ફરન્‍સ દરમિયાન એક પ્રશ્‍નના જવાબમાં શફકત અલી ખાને કહ્યું, આ ભેદભાવપૂર્ણ કાયદો પસાર થવાથી ભારતમાં વધતા બહુમતીવાદનું પ્રતિબિંબ પડે છે. એવો ગંભીર ભય છે કે આનાથી ભારતીય મુસ્‍લિમો વધુ હાંસિયામાં ધકેલાઈ જશે.

લોકસભા અને રાજ્‍યસભામાં ઘણા દિવસોની ગરમાગરમ ચર્ચા પછી વકફ બિલ સરળતાથી પસાર થઈ ગયું અને ૫ એપ્રિલના રોજ રાષ્‍ટ્રપતિની મંજૂરી મળી ગઈ. સરકારે કહ્યું છે કે આ કાયદો મિલકત અને વ્‍યવસ્‍થાપન વિશે છે, ધર્મ વિશે નહીં, અને દલીલ કરી છે કે વકફના નામે મોટી માત્રામાં જમીન પર અતિક્રમણ કરવામાં આવ્‍યું છે. વિપક્ષે તેનો વિરોધ કર્યો.

વિપક્ષે આરોપ લગાવ્‍યો કે ભાજપની આગેવાની હેઠળની સરકાર બંધારણને નબળું પાડવા, લઘુમતીઓને બદનામ કરવા અને તેમના અધિકારોથી વંચિત રાખવા તેમજ સમાજને વિભાજીત કરવાનો પ્રયાસ કરી રહી છે. (રર.૫)