જમ્મુ: કશ્મીરમાં આ વર્ષે પ્રવાસનમાં મોટો ઉછાળો જોવા મળી રહ્યો છે. ૨૦૨૫ના પ્રથમ ત્રણ મહિના અને એક સપ્તાહમાં જ ૫,૨૫,૨૭૨ પ્રવાસીઓએ કશ્મીરની મુલાકાત લીધી છે. જેમાં ૫,૧૪,૮૪૫ સ્થાનિક અને ૧૦,૪૨૭ વિદેશી પ્રવાસીઓનો સમાવેશ થાય છે. કશ્મીરીઓ માને છે કે આનાથી સ્થાનિક અર્થતંત્રને મોટો વેગ મળ્યો છે અને જે લોકો પોતાની આજીવિકા માટે પ્રવાસન પર નિર્ભર છે તેમના ચહેરા પર મુસ્કાન આવી ગઈ છે.

 

 

સત્તાવાર આંકડાઓ અનુસાર, જાન્યુઆરીમાં ૧,૫૧,૦૨૩ પ્રવાસીઓ આવ્યા (૧,૪૮,૪૩૯ સ્થાનિક અને ૩,૫૮૫ વિદેશી), ફેબ્રુઆરીમાં ૧,૪૭,૫૬૦ પ્રવાસીઓ આવ્યા (૧,૪૩,૪૪૪ સ્થાનિક અને ૪,૧૧૬ વિદેશી) - માર્ચમાં સૌથી વધુ ૧,૭૬,૩૫૫ પ્રવાસીઓ આવ્યા (૧,૭૪,૩૪૯ સ્થાનિક અને ૨,૦૦૬ વિદેશી). ૧ થી ૭ એપ્રિલ સુધી ૪૯,૫૪૪ પ્રવાસીઓ આવ્યા (૪૮,૬૧૪ સ્થાનિક અને ૯૩૦ વિદેશી) હતા.

 

 

પ્રવાસન અધિકારીઓએ જણાવ્યું કે ૨૦૨૫ તાજેતરના સમયના સૌથી સારા વર્ષોમાંનું એક બની રહ્યું છે. પ્રવાસીઓની સંખ્યામાં વધારો થવાનું એક મોટું કારણ માર્ચમાં ગુલમર્ગમાં ખેલો ઇન્ડિયા વિન્ટર ગેમ્સનું સફળ આયોજન હતું. પ્રવાસન વિભાગના એક અધિકારીના જણાવ્યા અનુસાર, વિન્ટર ગેમ્સે રાષ્ટ્રીય ધ્યાન આકર્ષિત કર્યું અને મોટી સંખ્યામાં સાહસિક પ્રેમીઓ અહીં આવ્યા.

 

 

તે જ સમયે, શ્રીનગરનો ટ્યૂલિપ ગાર્ડન દરરોજ હજારો પ્રવાસીઓને પોતાની તરફ આકર્ષિત કરી રહ્યો છે. દિલ્હીથી આવેલા પ્રવાસી રાજેશ શર્મા કહે છે કે આ જગ્યા ધરતી પર સ્વર્ગ જેવી લાગે છે. ફૂલો, ઠંડી હવા અને ઝબરવાન પહાડીઓનો નજારો મંત્રમુગ્ધ કરી દેનારો છે.

 

 

દિલ્હીથી જ આવેલી અન્ય પ્રવાસી નીતુ રૈનાના શબ્દોમાં, "મેં કશ્મીરની સુંદરતા વિશે ફક્ત સાંભળ્યું હતું. પરંતુ અહીં આવવું એક સપનાના સાચા થવા જેવું છે. લોકો ઉષ્માભર્યું સ્વાગત કરે છે."

 

 

સ્થાનિક લોકો પણ પ્રવાસીઓની ભીડથી ખુશ છે. હાઉસબોટના માલિક ઇશ્ફાક અહમદ કહે છે કે લાંબા સમય પછી, અમે અમારી હાઉસબોટમાં આટલી ભીડ જોઈ રહ્યા છીએ. એવું લાગે છે કે જૂના દિવસો પાછા આવી ગયા હોય.  

 

 

પ્રવાસન નિયામક કહે છે કે આ વર્ષે વધુમાં વધુ પ્રવાસીઓને આકર્ષિત કરવા માટે વધુ સાંસ્કૃતિક કાર્યક્રમો અને તહેવારોનું આયોજન કરવામાં આવશે. તેમણે કહ્યું કે અમારું લક્ષ્ય કશ્મીરને એક ટોચનું આંતરરાષ્ટ્રીય પ્રવાસન સ્થળ બનાવવાનું છે. આવી મજબૂત શરૂઆત સાથે, ૨૦૨૫ કશ્મીર પ્રવાસન માટે રેકોર્ડ તોડનારું વર્ષ લાગી રહ્યું છે.