તહેરાન: સંયુક્ત રાષ્ટ્રના પરમાણુ નિરીક્ષણ સંસ્થા (UN nuclear watchdog)ના વડા રાફેલ ગ્રોસીએ ઈરાન અંગે એક ગંભીર ચેતવણી આપી છે. તેમણે કહ્યું છે કે ઈરાન પરમાણુ બોમ્બ બનાવવાની ક્ષમતાથી હવે દૂર નથી. ગ્રોસીનું આ નિવેદન તેમના તહેરાનની મુલાકાત અને વાટાઘાટો શરૂ થવાના થોડા સમય પહેલા આવ્યું છે, જેના કારણે આ મુદ્દો વધુ ગંભીર બન્યો છે.

અમેરિકા સહિતના પશ્ચિમી દેશો લાંબા સમયથી ઈરાન પર પરમાણુ હથિયારો મેળવવાનો પ્રયાસ કરી રહ્યું હોવાનો આરોપ લગાવતા રહ્યા છે. જો કે, તહેરાને સતત આ આરોપોને નકારી કાઢ્યા છે અને ભારપૂર્વક જણાવ્યું છે કે તેમનો પરમાણુ કાર્યક્રમ શાંતિપૂર્ણ નાગરિક હેતુઓ માટે છે.

ફ્રાન્સના અખબાર લે મોન્ડને આપેલા એક ઇન્ટરવ્યુમાં ગ્રોસીએ કહ્યું હતું કે, "તે એક કોયડા જેવું છે. તેમની પાસે તેના ભાગો છે અને એક દિવસ તેઓ આખરે તેને જોડી શકે છે." તેમના આ નિવેદનથી પશ્ચિમી દેશોમાં ચિંતાનું મોજુ ફરી વળ્યું છે.

ઇન્ટરનેશનલ એટોમિક એનર્જી એજન્સી (IAEA)ના વડા રાફેલ ગ્રોસી બુધવારે તહેરાન પહોંચ્યા હતા અને તેમણે વિદેશ મંત્રી અબ્બાસ અરાગચી સાથે મુલાકાત કરી હતી. અરાગચીએ X પર પોસ્ટ કર્યું હતું કે બંને વચ્ચે "ઉપયોગી ચર્ચા" થઈ છે.

ગ્રોસીએ મુલાકાત પહેલા પોસ્ટ કર્યું હતું કે ઈરાનનો IAEA સાથેનો સહયોગ "ઈરાનના પરમાણુ કાર્યક્રમના શાંતિપૂર્ણ સ્વભાવ વિશે વિશ્વસનીય ખાતરીઓ પ્રદાન કરવા માટે અનિવાર્ય છે." તેમની આ મુલાકાત અને નિવેદનો વચ્ચે, વિશ્વભરના દેશો આ પરિસ્થિતિ પર ચાંપતી નજર રાખી રહ્યા છે. ઈરાન પોતાના પરમાણુ કાર્યક્રમને લઈને આંતરરાષ્ટ્રીય સમુદાયને કેટલી ખાતરી આપી શકે છે તે જોવાનું રહેશે.