નવી દિલ્હી: જમ્મુ-કાશ્મીરના પહેલગામમાં થયેલા ભયાનક આતંકી હુમલા બાદ, જેમાં ૨૮ નિર્દોષ લોકોના જીવ ગયા, ભારત સરકાર ઝડપી અને કડક કાર્યવાહીના મૂડમાં છે. આગામી ૨૪ કલાકમાં વડાપ્રધાન નરેન્દ્રભાઈ મોદીના નેતૃત્વ હેઠળ કેબિનેટ સુરક્ષા સમિતિ (સીસીએસ)ની બેઠક મળવાની સંભાવના છે. આ બેઠકમાં સાઉથ બ્લોકે આતંકી હુમલાના જવાબમાં લશ્કરી વિકલ્પો પર નિર્ણય લેવો પડશે. સરકારી સૂત્રો અનુસાર, વડાપ્રધાન મોદીએ સાઉદી અરેબિયાની મુલાકાત ટૂંકી કરીને ભારત પરત ફરવાનો નિર્ણય લીધો છે અને તેઓ આ બેઠકમાં સુરક્ષા પરિસ્થિતિની સમીક્ષા કરશે.  

પહેલગામના બૈસરન વેલીમાં મંગળવારે થયેલા આ હુમલામાં લશ્કર-એ-તૈયબાની સ્થાનિક શાખા ધ રેઝિસ્ટન્સ ફ્રન્ટે જવાબદારી લીધી છે. ગુપ્તચર સૂત્રોના જણાવ્યા અનુસાર, આ હુમલામાં પાંચથી છ આતંકવાદીઓ સામેલ હતા, જેમાં વિદેશી (પાકિસ્તાની) આતંકવાદીઓનો પણ સમાવેશ હતો. 

સીસીએસની આ બેઠકમાં ગૃહમંત્રી અમિત શાહ, સંરક્ષણ મંત્રી રાજનાથ સિંહ, વિદેશ મંત્રી એસ. જયશંકર, નાણામંત્રી નિર્મલા સીતારામન, રાષ્ટ્રીય સુરક્ષા સલાહકાર અજીત ડોવલ અને ઉચ્ચ લશ્કરી અધિકારીઓ હાજર રહેવાની શક્યતા છે. સૂત્રોના જણાવ્યા અનુસાર, આ બેઠકમાં આતંકવાદીઓ સામે લશ્કરી કાર્યવાહી, ગુપ્તચર તંત્રની મજબૂતી અને સરહદ પારના આતંકવાદને રોકવા માટેના વિકલ્પો પર ચર્ચા થશે.

આ હુમલો ભારતની સુરક્ષા નીતિઓ અને આતંકવાદ સામેની લડાઈ માટે એક મોટો પડકાર છે. નિષ્ણાતોનું માનવું છે કે, સરકાર આ હુમલાનો જવાબ આપવા માટે સર્જિકલ સ્ટ્રાઈકથી લઈને ખુલ્લી લશ્કરી કાર્યવાહી સુધીના વિકલ્પો પર વિચાર કરી શકે છે. ૨૮ નિર્દોષ જીવોનું બલિદાન વ્યર્થ નહીં જાય, એવો સંદેશ સરકાર આપવા માંગે છે.