ભોપાલ: જમ્મુ અને કાશ્મીરના પહેલગામમાં થયેલા આતંકવાદી હુમલા બાદ મધ્યપ્રદેશ પોલીસ એક્શનમાં આવી ગઈ છે. રાજ્યમાં રહેતા પાકિસ્તાની નાગરિકો અંગે પોલીસ મુખ્યાલય (PHQ) એ એક મોટું પગલું ભર્યું છે. માહિતી આપતાં ભોપાલ પોલીસ કમિશનર હરિનારાયણચારી મિશ્રાએ જણાવ્યું હતું કે હાલમાં મધ્યપ્રદેશમાં લગભગ ૮,૪૦૫ પાકિસ્તાની નાગરિકો હાજર છે. આમાંના ઘણા નાગરિકો લાંબા ગાળાના વિઝા પર છે, જ્યારે કેટલાક ટૂંકા ગાળાના વિઝા પર ભારત આવ્યા છે

પોલીસ કમિશનરે કહ્યું કે PHQ રાજ્યમાં હાજર તમામ પાકિસ્તાની નાગરિકોના સ્થાનની સંપૂર્ણ તપાસ કરી રહ્યું છે. આ આંકડામાં તમામ પ્રકારના વિઝા ધારકો અને તમામ જાતિ અને સંપ્રદાયના પાકિસ્તાની નાગરિકોનો સમાવેશ થાય છે

ભોપાલ પોલીસ કમિશનરે સ્પષ્ટતા કરી કે કેન્દ્ર સરકારે તમામ પાકિસ્તાની વિઝા રદ કરી દીધા છે. આ કારણે, મધ્યપ્રદેશમાં રહેતા ટૂંકા ગાળાના વિઝા ધરાવતા પાકિસ્તાની નાગરિકોએ 27 એપ્રિલ સુધીમાં ફરજિયાતપણે ભારત છોડવું પડશે. તે જ સમયે, મેડિકલ વિઝા ધારકોને 29 એપ્રિલ સુધીમાં ભારત છોડવાની સૂચના આપવામાં આવી છે.

જોકે, લાંબા ગાળાના વિઝા ધરાવતા પાકિસ્તાની નાગરિકો હાલ ભારતમાં રહી શકશે. ભોપાલ શહેરમાં લાંબા ગાળાના વિઝા ધરાવતા પાકિસ્તાની નાગરિકોની સંખ્યા લગભગ 250 છે, જ્યારે ટૂંકા ગાળાના વિઝા ધરાવતા પાકિસ્તાની નાગરિકોની સંખ્યા અહીં માત્ર 3 હોવાનું જાણવા મળ્યું છે. પોલીસ કમિશનર હરિનારાયણચારી મિશ્રાએ એમ પણ કહ્યું કે પહેલગામ આતંકવાદી હુમલા બાદ મધ્યપ્રદેશથી પાકિસ્તાની નાગરિકોને પાછા મોકલવાના પ્રયાસો શરૂ કરવામાં આવ્યા છે. પોલીસ સંપૂર્ણપણે સતર્ક છે અને રાજ્યમાં રહેતા તમામ પાકિસ્તાની નાગરિકો પર કડક નજર રાખવામાં આવી રહી છે.