ઇસ્લામાબાદ: પાકિસ્તાનના વડાપ્રધાન શહેબાઝ શરીફે શનિવારે જણાવ્યું હતું કે તેમનો દેશ કાશ્મીરના પહેલગામમાં તાજેતરમાં થયેલા આતંકવાદી હુમલાની 'તટસ્થ તપાસ' માં સહકાર આપવા માટે તૈયાર છે, જેમાં 26 પ્રવાસીઓ માર્યા ગયા હતા. આ ટિપ્પણી ભારત અને પાકિસ્તાન વચ્ચે વધી રહેલા તણાવ વચ્ચે આવી છે.
22 એપ્રિલના રોજ પહેલગામના બૈસરન મેદાનમાં થયેલા હુમલા પર નવી દિલ્હીની કડક પ્રતિક્રિયા બાદ આ નિવેદન આવ્યું છે, જ્યાં આતંકવાદીઓએ પ્રવાસીઓ પર ગોળીબાર કર્યો હતો. જવાબમાં ભારતે પાકિસ્તાની નાગરિકો માટે વિઝા રદ કરી દીધા છે અને આંતરરાષ્ટ્રીય સરહદો પર સુરક્ષા પ્રોટોકોલ કડક કરી દીધા છે. અત્યાર સુધી ભારતે કહ્યું છે કે તે આતંકવાદ માટે પાકિસ્તાન સ્થિત જૂથોને જવાબદાર માને છે અને તેણે સખત વૈશ્વિક કાર્યવાહીની માંગ કરી છે.
આ પહેલાં પાકિસ્તાની સેનાએ નિયંત્રણ રેખા પર અકારણ ગોળીબાર કર્યો હતો, જેનો ભારતીય સૈનિકોએ જડબાતોડ જવાબ આપ્યો હતો. સૈન્ય સૂત્રોએ શનિવારે આ માહિતી આપી હતી. પહેલગામમાં મંગળવારે થયેલા આતંકવાદી હુમલા બાદ ભારત અને પાકિસ્તાન વચ્ચે તણાવ વધી ગયો છે. પહેલગામમાં થયેલા હુમલામાં 26 નાગરિકો માર્યા ગયા હતા. બંને દેશોમાં વધેલા તણાવ વચ્ચે સતત બીજી રાત્રે ગોળીબાર થયો હતો. પાકિસ્તાની સૈનિકોએ ગુરુવારે રાત્રે પણ એલઓસી પર ભારતીય ચોકીઓને નિશાન બનાવીને ગોળીબાર કર્યો હતો અને ભારતે તેનો જડબાતોડ જવાબ આપ્યો હતો. ગોળીબારમાં કોઈ જાનહાનિના સમાચાર નથી.
ભારતે સંકલ્પ લીધો છે કે તે પહેલગામ હુમલામાં સામેલ આતંકવાદીઓને શોધી કાઢશે. કેન્દ્ર સરકારે પહેલગામ હુમલાના તાર સરહદ પારથી જોડાયેલા હોવાના કારણે બુધવારે પાકિસ્તાની લશ્કરી સલાહકારને હાંકી કાઢવા, 1960ની સિંધુ જળ સંધિને સ્થગિત કરવા અને અટારી-વાઘા સરહદ ચોકીને તાત્કાલિક બંધ કરવા સહિત અનેક પગલાંની જાહેરાત કરી હતી. ભારતે અટારી સરહદ દ્વારા દેશમાં પ્રવેશ કરનારા તમામ પાકિસ્તાનીઓને એક મે સુધીમાં દેશ છોડી દેવા કહ્યું છે.