શનિવારે દક્ષિણ ઈરાનના બંદર અબ્બાસમાં શાહિદ રાજાઈ પોર્ટ પર એક મોટા વિસ્ફોટના અહેવાલ મળ્યા છે, જેમાં પ્રાથમિક અહેવાલો અનુસાર ઓછામાં ઓછા 400 થી વધુ  લોકો ઘાયલ થયા છે.
ઈરાનની અર્ધ-સત્તાવાર તસ્નીમ ન્યૂઝ એજન્સીએ જણાવ્યું કે આગને ઓલવવા માટે પોર્ટની કામગીરી સ્થગિત કરવામાં આવી છે. મોટી સંખ્યામાં પોર્ટ કર્મચારીઓની હાજરીને જોતા, તેણે ઉમેર્યું કે "ઘણા લોકો કદાચ ઘાયલ થયા હશે અથવા તો ઘટનામાં માર્યા પણ ગયા હશે."
રાજ્ય મીડિયાએ અહેવાલ આપ્યો છે કે વિસ્ફોટ ત્યારે થયો જ્યારે ઈરાને ઓમાનમાં યુનાઇટેડ સ્ટેટ્સ સાથે પરમાણુ વાટાઘાટોનો ત્રીજો રાઉન્ડ શરૂ કર્યો હતો. વિસ્ફોટનું કારણ હજી સ્પષ્ટ નથી.
સ્થાનિક ક્રાઈસીસ મેનેજમેન્ટના એક અધિકારીએ રાજ્ય ટીવીને જણાવ્યું હતું કે, "આ ઘટનાનું કારણ શાહિદ રાજાઈ પોર્ટ વ્હાર્ફ વિસ્તારમાં સંગ્રહિત કેટલાક કન્ટેનરનો વિસ્ફોટ હતો. અમે હાલમાં ઘાયલોને બહાર કાઢીને તબીબી કેન્દ્રોમાં ખસેડી રહ્યા છીએ." ફાર્સ ન્યૂઝ એજન્સીએ પ્રારંભિક અંદાજ મુજબ  400 થી વધુ  લોકો ઘાયલ થયા હોવાનું જણાવ્યું હતું.
ઈરાની મીડિયાએ જણાવ્યું કે વિસ્ફોટથી અનેક કિલોમીટરની ત્રિજ્યામાં બારીઓના કાચ તૂટી ગયા હતા, અને ઓનલાઈન શેર કરવામાં આવેલા ફૂટેજમાં વિસ્ફોટ બાદ મશરૂમ જેવા વાદળની રચના જોવા મળી હતી.
2020 માં, સમાન પોર્ટ પરના કમ્પ્યુટર્સ સાયબર હુમલાનો ભોગ બન્યા હતા, જેના કારણે જળમાર્ગો અને સુવિધા તરફ જતા રસ્તાઓ પર ભારે જામ સર્જાયો હતો. વોશિંગ્ટન પોસ્ટના અહેવાલ મુજબ, ઈરાનના કટ્ટર દુશ્મન ઇઝરાયલે અગાઉના ઈરાની સાયબર હુમલાના બદલા તરીકે તે ઘટના પાછળ હોવાનું જણાયું હતું.