ભારત-પાકિસ્‍તાન બોર્ડર પર આ વખતે કાગળોથી નહીં પરંતુ માનવ લાગણીઓથી બનેલી દિવાલો ઉભી થઈ ગઈ. કેટલીક મહિલાઓ માટે દુનિયા ત્‍યાં જ થંભી ગઈ જ્‍યારે પોતાના બાળકોને બોર્ડર પાર કરીને જતા જોયા અને માતાઓએ ત્‍યાં જ રોકાવવું પડ્‍યું. અનેક લોકોને તેમના પ્રિયજનોનો સાથ છોડવો પડ્‍યો હતો. આ ભાવુક દ્રશ્‍યો જે અમે તમને શબ્‍દોમાં જણાવી રહ્યા છે તે ભારત અને પાકિસ્‍તાનના વધતા તણાવ વચ્‍ચે  અટારી-બાઘા બોર્ડર પરના છે.

જમ્‍મુ અને કાશ્‍મીરના પહેલગામમાં થયેલા આતંકવાદી હુમલામાં હિન્‍દુઓના નરસંહાર બાદ ભારતે પાકિસ્‍તાન સામે ઝડપી કાર્યવાહી શરૂ કરી દીધી છે. પાકિસ્‍તાની નાગરિકોને પાછા મોકલવા માટે ભારત સરકારની સમયમર્યાદાનો રવિવારે છેલ્લો દિવસ હતો. સેંકડો પાકિસ્‍તાની નાગરિકો  અટારી-વાઘા બોર્ડર પર પહોંચ્‍યા હતા.

સેંકડો ભારતીય નાગરિકો તેમના  પાકિસ્‍તાની સંબંધીઓને વિદાય આપવા આવી પહોંચતા અમળતસર સ્‍થિત અટારી બોર્ડર પાસે વાહનોની કતાર લાગી ગઈ હતી. આંકડા પર નજર કરીએ તો લગભગ ૨૭૨ પાકિસ્‍તાની નાગરિકો ભારત છોડીને ગયા હતા, જ્‍યારે ૧૩ રાજદ્વારીઓ અને  અધિકારીઓ સહિત ૬૨૯ ભારતીયો પાકિસ્‍તાનથી પાછા ફર્યા હતા.

આ દરમિયાન અમળતસર નજીક અટારી-વાઘા બોર્ડર ક્રોસિંગ પર, એક પાકિસ્‍તાની નાગરિક સરિતા કેવર તેમની માતા પ્રિયા કંવર (જે ભારતીય નાગરિક છે)ને સાંત્‍વના આપતા જોવા મળી હતી. પ્રિયા કેવર દીકરી સરિતા અને તેના પિતા સાથે પાકિસ્‍તાન જઈ શકયા નહીં, કારણ કે ભારતે પાકિસ્‍તાની નાગરિકોને આપવામાં આવેલા વિઝા રદ કર્યા પછી બંનેને જ ભારત છોડવાની ફરજ પાડવામાં આવી હતી.

સરિતાએ જણાવ્‍યું હતું કે, મારી માતા ભારતીય છે અને તેમને અમારી સાથે પાકિસ્‍તાન જવાની મંજૂરી નથી. તેઓ (અટારીના અધિકારીઓ)

અમને કહી રહ્યા છે કે તેઓ મારી માતાને સાથે જવા દેશે નહીં. તેઓ કહે છે કે ભારતીય પાસપોર્ટ ધારકોને મંજૂરી આપવામાં આવશે નહીં. મારા માતા-પિતાના લગ્ન ૧૯૯૧માં થયા હતા. ભાઈ અને પિતા પણ પાકિસ્‍તાની નાગરિક છે.

દેશ છોડીને જનારાઓમાં ૧૧ વર્ષની ઝૈનબ પણ હતી. બે દેશો વચ્‍ચેની લડાઈથી બેખબર બાળકીએ ભાવુક થઈને કહ્યું હતું કે, મારી માતાને પાછળ છોડીને જવું ખૂબ જ મુશ્‍કેલ છે. મારું દિલ તૂટી ગયું છે.

મહત્‍વનું છે કે, ભારત સરકારે સાર્ક વિઝા પર ભારતની મુલાકાત લેતા પાકિસ્‍તાની નાગરિકોને ૨૬ એપ્રિલ સુધીમાં જ્‍યારે બાકીના લોકોએ ૨૭ એપ્રિલે દેશ છોડી દેવા કહ્યું હતું. (૩૮.૧૧)