નવી દિલ્હી :કેન્દ્ર સરકારના પ્રેસ ઇન્ફર્મેશન બ્યુરો (PIB) એ સોમવારે ચેતવણી આપી હતી કે કેટલાક પાકિસ્તાન સમર્થિત સોશિયલ મીડિયા એકાઉન્ટ્સ ખોટા દાવા કરી રહ્યા છે કે ભારતીય સેનાની તૈયારીઓ સંબંધિત "ગુપ્ત દસ્તાવેજો" લીક થઈ ગયા છે. PIB ફેક્ટ ચેકે આ દસ્તાવેજોને 'બનાવટી' ગણાવ્યા.  . 

ગયા અઠવાડિયે, દક્ષિણ કાશ્મીરના પહેલગામના બૈસરન વિસ્તારમાં આતંકવાદીઓએ 26 લોકોની ગોળી મારીને હત્યા કરી હતી, જેમાં મોટાભાગના પ્રવાસીઓ હતા. ફરી એકવાર હુમલાના તાર પાકિસ્તાન સાથે જોડાયેલા જણાયા. જે બાદ ભારત અને પાકિસ્તાન વચ્ચે તણાવ વધી ગયો.

  PIB ફેક્ટ ચેકે તેની સોશિયલ મીડિયા પોસ્ટમાં જણાવ્યું હતું કે, 'પાકિસ્તાન સમર્થક સોશિયલ મીડિયા એકાઉન્ટ્સ ખોટો દાવો કરી રહ્યા છે કે ભારતીય સેનાની તૈયારીઓ સંબંધિત ગુપ્ત દસ્તાવેજો લીક થઈ ગયા છે.' આ દસ્તાવેજો નકલી છે. કૃપા કરીને વણચકાસાયેલ માહિતી શેર કરવાનું ટાળો અને સચોટ માહિતી માટે ફક્ત ભારત સરકારના સત્તાવાર સ્ત્રોતો પર જ વિશ્વાસ કરો

અગાઉ, સંરક્ષણ મંત્રાલયે રવિવારે ચેતવણી આપી હતી કે વોટ્સએપ પર એક "ભ્રામક" સંદેશ વાયરલ થઈ રહ્યો છે જેમાં દાવો કરવામાં આવ્યો છે કે સરકાર ભારતીય સેનાના આધુનિકીકરણ માટે દાન મેળવવા માટે બેંક ખાતું ખોલવા જઈ રહી છે. મંત્રાલયે આ સંદેશને નકારી કાઢ્યો અને લોકોને સાવધ રહેવાની અપીલ કરી. PIB ફેક્ટ ચેકે રવિવારે પણ આ ભ્રામક સંદેશ વિશે ચેતવણી આપી હતી.
પહેલગામમાં થયેલા ક્રૂર આતંકવાદી હુમલા બાદ, વડા પ્રધાન મોદીની અધ્યક્ષતામાં મળેલી કેબિનેટ સુરક્ષા સમિતિ (CCS) ની બેઠકમાં પાકિસ્તાન વિરુદ્ધ અનેક પગલાં લેવામાં આવ્યા હતા. ઉપરાંત, સુરક્ષા દળોને ઉચ્ચ તકેદારી રાખવાનો નિર્દેશ આપવામાં આવ્યો હતો અને ગુનેગારોને ન્યાયના કઠેડામાં લાવવાની પ્રતિજ્ઞા લેવામાં આવી હતી.