શ્રીનગર: પાકિસ્તાન તેની નાપાક હરકતોથી બાજ આવી રહ્યું નથી. પાકિસ્તાની સેનાએ ફરી એકવાર યુદ્ધવિરામનું ઉલ્લંઘન કરીને નિયંત્રણ રેખા (LoC) પર ગોળીબાર કર્યો છે. પાકિસ્તાની સૈનિકોએ 28-29 એપ્રિલની મધ્યરાત્રિએ કુપવાડા અને બારામુલા જિલ્લાઓ તેમજ અખનૂર સેક્ટરમાં નિયંત્રણ રેખા પાર ગોળીબાર કર્યો હતો. ભારતીય સેનાએ ઉશ્કેરણીનો માપેલો અને અસરકારક રીતે જવાબ આપ્યો હતો. સરહદી વિસ્તારોમાં તણાવનો માહોલ છે. સેનાએ આસપાસના વિસ્તારોમાં પણ એલર્ટ વધારી દીધું છે.

આ પહેલાં, પૂંછ જિલ્લામાં નિયંત્રણ રેખા પર પાકિસ્તાની સેનાએ કોઈપણ પ્રકારની ઉશ્કેરણી વિના ગોળીબાર શરૂ કર્યો હતો. ભારતીય જવાનો દ્વારા જવાબી કાર્યવાહી કર્યા બાદ પાકિસ્તાની સેનાએ ગોળીબાર બંધ કર્યો હતો. લશ્કરી અધિકારીઓ તરફથી મળેલી માહિતી અનુસાર, રવિવારની મધ્યરાત્રિએ પૂંછ જિલ્લાના કૃષ્ણા ઘાટી સેક્ટરમાં પાકિસ્તાની સેનાની અગ્રિમ ચોકીઓએ ભારતીય સેનાની અગ્રિમ ચોકીઓને નિશાન બનાવીને હળવા હથિયારોથી ગોળીબાર શરૂ કર્યો હતો. ભારતીય સેનાએ પણ પાકિસ્તાની સેનાની નાપાક હરકતનો જડબાતોડ જવાબ આપ્યો હતો. ગોળીબારમાં કોઈ નુકસાનના સમાચાર નથી.

જંગલોમાં સર્ચ ઓપરેશન:
દરમિયાન, સૈનિકોએ સોમવારે પણ એલઓસીને અડીને આવેલા જંગલોમાં દિવસભર સર્ચ ઓપરેશન હાથ ધર્યું હતું. પહેલગામના બૈસરનમાં આતંકવાદી હુમલા બાદ ભારતે સિંધુ જળ સંધિને સ્થગિત કરી દીધી છે. આ સાથે જ તમામ પાકિસ્તાની નાગરિકોના ભારતીય વિઝા રદ થયા બાદ પાકિસ્તાન ગુસ્સે થયું છે. પાકિસ્તાને ગુરુવારે પણ યુદ્ધવિરામનું ઉલ્લંઘન કરીને ભારતીય સ્થળો પર ગોળીબાર કર્યો હતો. ત્યારથી નિયમિત રીતે ગોળીબાર થઈ રહ્યો છે.

દરમિયાન, સૂત્રોએ જણાવ્યું કે સોમવારે દિવસ દરમિયાન કોઈ ગોળીબાર થયો નથી. સૈનિકોએ એલઓસીના અગ્રિમ ભાગના તમામ જંગલો અને નાળાઓમાં વ્યાપક સર્ચ ઓપરેશન હાથ ધર્યું છે. સેનાને શંકા છે કે પાકિસ્તાની સૈનિકો ગોળીબારની આડમાં આતંકવાદીઓની ઘૂસણખોરી કરાવી શકે છે. તેથી, સાવચેતીના ભાગરૂપે આ ઓપરેશન હાથ ધરવામાં આવી રહ્યું છે.

રવિવારની મધ્યરાત્રિએ પૂંછ જિલ્લાના કૃષ્ણા ઘાટી સેક્ટરમાં પાકિસ્તાની સેનાની અગ્રિમ ચોકીઓએ ભારતીય સેનાની અગ્રિમ ચોકીઓને નિશાન બનાવીને હળવા હથિયારોથી ગોળીબાર શરૂ કર્યો હતો. ગોળીબારમાં કોઈ નુકસાનના સમાચાર નથી. સરહદી વિસ્તારના ગામડાઓમાં ભયનો માહોલ છે. ભારતીય સેનાની જવાબી કાર્યવાહી બાદ પાકિસ્તાની સેના શાંત થઈ ગઈ હતી.

ગામડાઓમાં ભયનો માહોલ:
એલઓસી પર વધતા તણાવ વચ્ચે સરહદી વિસ્તારના ગામડાઓમાં ભયનો માહોલ છે. જોકે, ભારતીય સેનાની જવાબી કાર્યવાહી બાદ પાકિસ્તાની સેનાની બંદૂકો શાંત થઈ ગઈ હતી, પરંતુ સમગ્ર વિસ્તારમાં દિવસભર ડરનો માહોલ રહ્યો હતો. લોકો ઘરોમાં જ છુપાયેલા રહ્યા અને શાળાઓમાં પણ બાળકોની સંખ્યા ઓછી રહી હતી.