અલીરાજપુર: જમ્મુ-કાશ્મીરના પહેલગામમાં થયેલા આતંકવાદી હુમલાના વિરોધમાં લોકો અલગ અલગ રીતે પોતાનો વિરોધ નોંધાવી રહ્યા છે. આવું જ એક અનોખું પ્રદર્શન મધ્યપ્રદેશના અલીરાજપુરમાં જોવા મળ્યું. અહીં કાશ્મીરના પહેલગામમાં ૨૬ પ્રવાસીઓની હત્યાના વિરોધમાં હિન્દુ સંગઠનો સાથે જોડાયેલા યુવાનોએ આ પ્રદર્શનનું નેતૃત્વ કર્યું હતું.
ત્યારબાદ પ્રદર્શન કરી રહેલા લોકોએ પાકિસ્તાનના રાષ્ટ્રધ્વજને રસ્તાઓ અને જાહેર શૌચાલયોમાં લગાવ્યો હતો. આ પ્રદર્શન સ્થાનિક અમલા લાઇન અને તિલક માર્ગ પર મંગળવારે રાત્રે કરવામાં આવ્યું હતું. વાહનો અને લોકોએ રસ્તા પર લગાવેલા પાકિસ્તાની ધ્વજને પગ નીચે કચડ્યો હતો. આ પ્રદર્શનમાં સ્થાનિક યુવા દુકાનદારો પણ સામેલ હતા.
જિલ્લાભરમાં પાકિસ્તાન વિરોધી પોસ્ટરો લગાવવામાં આવ્યા હતા. પ્રદર્શનકારીઓએ ભારત માતા કી જય અને પાકિસ્તાન મુર્દાબાદના નારા પણ લગાવ્યા હતા. કાશ્મીરના પહેલગામમાં થયેલા આતંકવાદી હુમલા બાદથી સ્થાનિક લોકોમાં આતંકવાદીઓ અને પાકિસ્તાન સામે રોષ વધી રહ્યો છે.
સ્થાનિક લોકોએ આ અનોખા વિરોધ પ્રદર્શનને સમર્થન આપ્યું હતું અને તેમાં ભાગ લીધો હતો. લોકોનું કહેવું છે કે આતંકવાદીઓ ધર્મના આધારે લોકોની હત્યા કરી રહ્યા છે. પહેલગામમાં આતંકવાદીઓએ પ્રવાસીઓની હત્યા તેમનો ધર્મ પૂછીને કરી છે. બીજી તરફ, પ્રદર્શન કરી રહેલા લોકોએ કેન્દ્ર સરકાર પાસે કાર્યવાહીની માંગ કરી છે.