અંબાણી પરિવારના સભ્ય શ્વાન હેપ્પીએ દુનિયાને કહ્યું અલવિદા
અનંત અંબાણી પર દુઃખના ડુંગર તૂટી પડયા : પરિવાર ભાવુક થયો, સોશ્યલ મીડિયા પર ખાસ નોંધ લખીઃ કૂતરો હેપ્પી ૪ કરોડ રૂપિયાની મર્સિડીઝ-બેન્ઝ G 400Dમાં મુસાફરી કરતો હતો
મુંબઈ, તા.૧: એશિયાના સૌથી ધનિક બિઝનેસ પરિવાર, અંબાણી પરિવાર પર દુઃખનો એક મોટો પહાડ તૂટી પડ્યો છે. આ સમયે અંબાણી પરિવાર ખૂબ જ દુઃખી છે કારણ કે તેમના સૌથી પ્રિય પાલતુ કૂતરા હેપ્પીએ તાજેતરમાં જ દુનિયાને અલવિદા કહ્યું છે. હેપ્પી અનંત અંબાણીના હૃદયની ખૂબ નજીક હતો અને તે ફક્ત પરિવાર માટે એક પાલતુ કૂતરો જ નહીં પરંતુ પરિવારનો એક સભ્ય પણ હતો.
મુકેશ અંબાણીના પુત્ર અનંત અંબાણી અને રાધિકા મર્ચન્ટના લગ્નમાં ઘણા સ્ટાર્સે લાઈમલાઈટ ચોરી લીધી હતી. બોલિવૂડના ત્રણ ખાન હોય કે હોલીવુડના સેલેબ્સ... આ ભવ્ય સમારંભમાં બધાએ પોતાનો ચાર્મ બતાવ્યો. જોકે, આ લગ્નમાં એક કૂતરાએ પણ બધાનું ધ્યાન ખેંચ્યું, આ કૂતરો મુકેશ અંબાણીનો પાલતુ કૂતરો હેપ્પી હતો. આ લગ્ન દરમિયાન હેપ્પી ઘણી વખત અંબાણી પરિવાર સાથે રમતા જોવા મળ્યો હતો. હવે અંબાણીના આ પાલતુ કૂતરાનું નિધન થઈ ગયું છે, જેની માહિતી સોશ્યલ મીડિયા પર શૅર કરવામાં આવી છે. અનંત અંબાણીના પાલતુ કૂતરા હેપ્પીના મળત્યુની માહિતી અંબાણી અપડેટ નામના ઇન્સ્ટાગ્રામ હેન્ડલ પર શેર કરવામાં આવી છે. શેર કરેલી પોસ્ટ મુજબ, અનંત અંબાણીના પાલતુ કૂતરા હેપ્પીનું ૩૦ એપ્રિલના રોજ અવસાન થયું હતું. અંબાણી પરિવારે તેમના પ્રિય હેપ્પી અંબાણીને શ્રદ્ધાંજલિ આપી છે, જેમને તેઓ ફક્ત પરિવારનો સભ્ય જ નહીં પરંતુ સમગ્ર પરિવારનો પ્રિય વ્યક્તિ માનતા હતા. અંબાણી પરિવારનો ફોટો હોય કે લગ્ન સમારોહ હોય કે પરિવારનો મેળાવડો હોય, હેપ્પીની હાજરી દરેક જગ્યાએ જોઈ શકાતી હતી. પરંતુ હવે અંબાણી પરિવારે તેમના હેપ્પીને ગુમાવી દીધો છે. તેમના પ્રિય હેપ્પીના દુનિયામાંથી ગયા પછી, અંબાણી પરિવારે ખૂબ જ સુંદર અને ભાવનાત્મક પોસ્ટ શૅર કરી છે. જેમાં લખ્યું છે કે, ‘પ્રિય હેપ્પી, તમે હંમેશા અમારા ભાગ રહેશો અને અમારા હૃદયમાં જીવશો. તમારું જવું એ સ્વર્ગનો ફાયદો અને અમારું નુકસાન છે.'
હેપ્પી કૂતરો ગોલ્ડન રીટ્રીવર જાતિનો હતો. કહેવામાં આવી રહ્યું છે કે તેની ઉંમર થઈ ગઈ હતી, જેના કારણે હેપ્પીનું મળત્યુ થયું.
નોંધનીય છે કે, અનંત અંબાણીના પ્રિય પાલતુ પ્રાણીની વૈભવી જીવનશૈલીનો અંદાજ તમે એ વાત પરથી લગાવી શકો છો કે જ્યારે પણ અનંત અંબાણી કયાંય જતા હતા, ત્યારે તેમનો પ્રિય હેપ્પી તેમની સાથે પ્રાઇવેટ જેટમાં મુસાફરી કરતો હતો. આ કૂતરા સાથે અંબાણી પરિવારમાં પરિવારના સભ્ય જેવો વ્યવહાર કરવામાં આવતો હતો. મીડિયા રિપોર્ટ્સ અનુસાર, અંબાણી પરિવારનો પાલતુ કૂતરો હેપ્પી ૪ કરોડ રૂપિયાની મર્સિડીઝ-બેન્ઝ G 400Dમાં મુસાફરી કરતો હતો. જ્યારે અંબાણી પરિવારની સુરક્ષામાં G 63 AMG જેવા ઉચ્ચ કક્ષાના વાહનોનો સમાવેશ થાય છે, ત્યારે તેની સાથે G 400d પાલતુ કૂતરા હેપ્પીની સુરક્ષા માટે હતું. મર્સિડીઝ-બેન્ઝ G 400D પહેલા, હેપ્પી ટોયોટા ફોર્ચ્યુનર અને ટોયોટા વેલફાયરમાં મુસાફરી કરતો. (રર.૧૮)
(3:43 PM IST)
છેલ્લા 8 દિવસમાં સૌથી લોકપ્રિય 
