બ્રિટનમાં ૩,૨૦,૦૦૦ પાઉન્ડથી વધુના ‘ક્રેશ ફોર કેશ' ફ્રોડમાં ગુજરાતી સહિત ૧૦ને સજા
બ્રિટનમાં ડિસેમ્બર ૨૦૧૫થી ઓક્ટોબર ૨૦૧૬ દરમિયાન અકસ્માતના ખોટા ક્લેમ કરી ૩,૨૦,૦૦૦ પાઉન્ડથી વધુનું ફ્રોડ કરનારી ગેંગના ૧૦ સભ્યોને સજા સંભળાવવામાં આવી છે. આ ગેંગ ગુજરાતી રાજુ પટેલ અને અન્ય એક ભારતીય કમલેશ વડુકુલ ચલાવતા હતાગેંગના બાકીના સભ્યો ખોટા અકસ્માત કરવાનું અને ક્લેમ કરવા માટે પોતાના દસ્તાવેજો આપવાનું કામ કરતા હતા.કેટલાક કિસ્સામાં તો અકસ્માત થયા વિના જ ક્લેમ કરાયા હતા
લંડન,તા.૦૧: બ્રિટનમાં ૩,૨૦,૦૦૦ પાઉન્ડથી વધુના ‘ક્રેશ ફોર કેશ' ફ્રોડમાં પકડાયેલી ગેંગના ૧૦ સભ્યોને ૧૯ અઠવાડિયાથી ૫ વર્ષ સુધીની જેલની સજા સંભળાવાઈ છે. ગુજરાતી રાજુ પટેલ અને અન્ય એક ઈન્ડિયન કમલેશ વડુકુલ આ ગેંગ ચલાવતા હતા. ફ્રોડના આ કેસમાં સૌથી વધુ ૫ વર્ષની જેલની સજા રાજુ પટેલને ફટકારવામાં આવી છે. આ ગેંગે ડિસેમ્બર ૨૦૧૫થી ઓક્ટોબર ૨૦૧૬ દરમિયાન એક જ વર્ષમાં આટલું મોટું ફ્રોડ આચર્યું હોવાનું સિટી ઓફ લંડન પોલીસની ઈન્શ્યોરન્સ ફ્રોડ એન્ફોર્સમેન્ટ ડિપાર્ટમેન્ટ (IFED)ની ઈશ્યોરન્સ ફ્રોડ બ્યુરો (IFB) અને તેના ઈશ્યોરર મેમ્બર્સના સહકારથી કરવામાં આવેલી તપાસમાં સામે આવ્યું હતું.
આ ગેંગમાં ૩૬ વર્ષીય રાજુ પટેલ અને ૪૫ વર્ષીય કમલેશ વડુકુલ દ્વારા ચલાવાતી આ ગેંગમાં ૪૫ વર્ષનો અમરજિત ધાલિવાલ ઉર્ફે અમો સિંઘ, ૩૯ વર્ષની ડિમ્પલ ઘેરા, ૪૨ વર્ષનો અકેબ હુસેન, ૩૩ વર્ષીય મિનાતા જાલોહ, ૩૨ વર્ષનો સાકિબ ખાન, ૪૦ વર્ષનો આસિદ નદીમ, ૩૭ વર્ષનો જેમ્સ પેયને, ૫૦ વર્ષનો અમજદ રહમાન સામેલ હતા. રાજુ અને કમલેશ ઈશ્યોરન્સ કંપની અને વ્હીકલ રિપેર ફાઈનાન્સ સર્વિસમાં એક્સિડન્ટના ખોટા ક્લેમ સબમિટ કરવાનું કામ કરતા હતા. જ્યારે અન્ય આઠ લોકો જાણી-જોઈને એક્સિડન્ટ કરીને કે પછી ખોટા ક્લમે માટે પોતાની પર્સનલ ડિટેઈલ્સ આપીને ફ્રોડમાં સાથ આપતા હતા.
આ ગેંગના સભ્યો પોતાના વાહનની જાણી-જોઈને શોર્ટ બ્રેક મારતા હતા જેથી પાછળ આવતું વાહન અથડાઈ જાય. આ ગેંગે વોલસોલ સિટીમાં આ પ્રકારે ઘણા ખોટા અકસ્માતોને અંજામ આપ્યો હતો. કેટલાક કિસ્સામાં તો અકસ્માત થયા જ ન હતા છતાં ક્લેમ કરવામાં આવ્યા હોવાનું પણ સામે આવ્યું હતું. તપાસમાં એવું પણ બહાર આવ્યું હતું કે, આ ગેંગ વ્હીકલ રિપેર કંપનીની આંખમાં ધૂળ નાખવા માટે જ્યારે કંપનીના માણસો ઈન્સ્પેક્શન કરવા આવવાના હોય ત્યારે પોતાના વાહનને અકસ્માતનું જે સ્થળ જણાવાયું હોય ત્યાં પાર્ક કરી દેતા હતા. આ ગેંગમાં ઘણા સભ્યોની ભરતી કરવામાં આવી હતી અને તેમને અકસ્માતનો ક્લેમ કરવા માટે પૈસા પણ ચૂકવાતા હતા.
ગેંગ મેમ્બર્સ વચ્ચે થયેલી વોટ્સએપ ચેટ્સમાં સામે આવ્યું હતું કે, અકસ્માતનો ક્લેમ કઈ રીતે કરવો અને મેડિકલ એક્ઝામિનર્સને શું કહેવું તેની આખી સ્ક્રીપ્ટ તેમને તૈયાર કરી આપવામાં આવતી હતી. રાજુ અને કમલેશ અકસ્માત થયેલા વાહનોની બોડી રિપેરિંગનું કામ કરતા હતા અને તેની આડમાં આ ફ્રોડને અંજામ આપતા હતા.
ડિસેમ્બર ૨૦૧૫માં તેમણે એક રિપેર ફાઈનાન્સ સર્વિસ કંપની સાથે અકસ્માતનો ભોગ બનેલા વાહનના ડ્રાઈવરને અમુક રકમની ક્રેડિટ આપવાનો એગ્રીમેન્ટ કર્યો હતો. જે ક્રેડિટનો ઉપયોગ કરી ડ્રાઈવર પોતાના વાહનને રિપેર કરવાવા ૨૪ કલાકની અંદર જ ફંડ મેળવી શકતો હતો અને તેને ઈશ્યોરન્સ પાસ થાય ત્યાં સુધી રાહ જોવી પડતી ન હતી. બાદમાં કંપની અકસ્માતમાં જેનો ફોલ્ટ હોય તેના ઈન્શ્યોરન્સમાંથી એટલા પૈસા ક્લેમ કરી લેતી હતી.
રાજુ અને કમલેશે ચોરી કરેલા કે ગેંગના સભ્યો દસ્તાવેજોનો ઉપયોગ કરી કાર ઈન્શ્યોરન્સ પોલિસીસ ઉતરાવી હતી. આ વિમા કંપનીઓમાં ખોટા ક્લેમ કરીને તેમણે ફ્રોડ આચર્યું હતું. તે પછી તે લોકો રિપેર ફાઈનાન્સ સર્વિસને વાહનના ફોટા મોકલી એવો દાવો કરતા હતા તેનો અકસ્માત થયો છે અને તેનું રિપેરિંગ કામ ચાલી રહ્યું છે. રિપેર ફાઈનાન્સ સર્વિસનો સ્ટાફ જાતે સ્થળ પર આવીને તપાસ કરતો ન હતો અને ફોટા પરથી જ અકસ્માત થયો હોવાનું માની લઈ કમલેશના અકાઉન્ટમાં રૂપિયા ટ્રાન્સફર કરી દેતી હતી.
જોકે, ઈન્શ્યોરન્સ લેવાયાના થોડા સમયમાં ક્લેમ થવાના પગલે ઈન્શ્યોરન્સ કંપનીને કંઈક ગરબડ હોવાની શંકા ગઈ હતી. કેમકે, મોટાભાગની પોલિસી અકસ્માતના થોડા દિવસો પહેલા જ ઉતારવામાં આવી હતી અને કેટલાક કિસ્સામાં જે વાહનનો વિમો ઉતરાવાયો હતો તે પોલિસીહોલ્ડરના નામ પર ન હતું.
(4:18 PM IST)
છેલ્લા 8 દિવસમાં સૌથી લોકપ્રિય 
