<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Monday, 5th May 2025

પહેલગામ હુમલા બાદ પાકિસ્તાનમાં ભયનો માહોલ : ૩ દિવસમાં બીજું મિસાઈલ પરીક્ષણ કર્યું

ભારત-પાકિસ્તાન તણાવ વધ્યો : પાકિસ્તાને ફતહ અને અબ્દાલી મિસાઈલોનું પરીક્ષણ કર્યું જેને ભારતે ઉશ્કેરણીજનક ગણાવ્યું

ઇસ્લામાબાદ: પાકિસ્તાને સોમવારે ૧૨૦ કિલોમીટરની રેન્જવાળી ફતહ સિરીઝની સપાટીથી સપાટી પર પ્રહાર કરનારી મિસાઈલનું પરીક્ષણ કર્યું છે. આ પરીક્ષણ ૨૨ એપ્રિલના રોજ પહેલગામમાં થયેલા આતંકવાદી હુમલા બાદ ભારત અને પાકિસ્તાન વચ્ચે વધી રહેલા તણાવ વચ્ચે થયું છે.
૩ મેના રોજ પાકિસ્તાને ૪૫૦ કિલોમીટરની રેન્જવાળી અબ્દાલી સપાટીથી સપાટી પર પ્રહાર કરનારી બેલેસ્ટિક મિસાઈલનું પરીક્ષણ કર્યું હતું. ભારતે આ મિસાઈલ પરીક્ષણને "ઉશ્કેરણીજનક કાર્યવાહી" ગણાવ્યું છે. પહેલગામ હુમલા બાદ બંને દેશો વચ્ચે તણાવ ચરમસીમાએ છે. ભારતે હુમલાના ગુનેગારોને કડક સજા આપવાની ચેતવણી આપી છે.
પાકિસ્તાનની લશ્કરી ગતિવિધિઓ
પહેલગામ હુમલા બાદથી પાકિસ્તાને પોતાની લશ્કરી ગતિવિધિઓમાં ઝડપ લાવી છે. સૂત્રોના અનુસાર પાકિસ્તાને અરબી સમુદ્રમાં નૌકાદળની કવાયત વધારી દીધી છે. જમ્મુ-કાશ્મીરમાં નિયંત્રણ રેખા (એલઓસી) પર સતત યુદ્ધવિરામનું ઉલ્લંઘન કરી રહ્યું છે.
આ ઉપરાંત પાકિસ્તાને દરિયાઈ ક્ષેત્રમાં નૌકાદળની ચેતવણીઓ જારી કરી છે, જેને ભારતે ઉશ્કેરણીજનક કાર્યવાહી માની છે. ૩ મેના રોજ અબ્દાલી મિસાઈલ અને હવે ફતહ સિરીઝ મિસાઈલના પરીક્ષણે ભારતની ચિંતાઓને વધુ વધારી દીધી છે. ભારતનું માનવું છે કે આ પગલાં પ્રાદેશિક સ્થિરતાને જોખમમાં મૂકી રહ્યા છે.
ભારતની કડક પ્રતિક્રિયા
પહેલગામ હુમલાના તરત બાદ ભારતે પાકિસ્તાન વિરુદ્ધ ઘણા કડક પગલાં ભર્યા. ૨૩ એપ્રિલના રોજ ભારતે સિંધુ જળ સંધિને સ્થગિત કરી દીધી. અટારીમાં એકમાત્ર સક્રિય ભૂમિ સરહદ ક્રોસિંગ બંધ કરી દીધું. રાજદ્વારી સંબંધોને વધુ ઘટાડી દીધા.
પાકિસ્તાને ભારતીય વિમાનો માટે પોતાનું હવાઈ ક્ષેત્ર બંધ કરી દીધું. ભારત સાથેનો તમામ વેપાર (ત્રીજા દેશો દ્વારા થતો વેપાર પણ) સ્થગિત કરી દીધો. ભારતે રાષ્ટ્રીય સુરક્ષા અને જાહેર નીતિના આધારે પાકિસ્તાનથી તમામ વસ્તુઓની આયાત પર તાત્કાલિક અસરથી સંપૂર્ણ પ્રતિબંધ લગાવી દીધો.
આ સાથે જ પાકિસ્તાનની ટપાલ સેવાઓ સ્થગિત કરી દેવામાં આવી છે. પાકિસ્તાની ધ્વજવાળા જહાજોને ભારતીય બંદરોમાં પ્રવેશ પર પ્રતિબંધ મૂકી દેવામાં આવ્યો છે.

 

(4:49 PM IST)