<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Thursday, 8th May 2025

૨૦૪૦ સુધીમાં ચંદ્ર પર હશે ભારતીય અવકાશયાત્રીઓના પગલાં: વડાપ્રધાન મોદીનો આત્મવિશ્વાસ

નવી દિલ્હી: વડાપ્રધાન નરેન્દ્રભાઈ મોદીએ બુધવારે ગ્લોબલ કોન્ફરન્સ ઓન સ્પેસ એક્સપ્લોરેશનને સંબોધતા ભારતના ભવિષ્યના અવકાશ કાર્યક્રમો અંગે મહત્વપૂર્ણ નિવેદન આપ્યું હતું. તેમણે ભારપૂર્વક જણાવ્યું હતું કે વર્ષ ૨૦૪૦ સુધીમાં ભારતીય અવકાશયાત્રીઓ ચોક્કસપણે ચંદ્રની સપાટી પર પોતાના પગલાં મૂકશે. વડાપ્રધાને આ ક્ષણ ભારતના અવકાશ સંશોધનના ઇતિહાસમાં એક સીમાચિહ્નરૂપ બની રહેશે તેમ જણાવેલ.

 

વડાપ્રધાન મોદીએ પોતાના સંબોધનમાં જણાવ્યું હતું કે ભારતની અવકાશયાત્રા કોઈ સ્પર્ધા નથી, પરંતુ સમગ્ર માનવજાતના કલ્યાણ માટે અવકાશની ઊંડી સમજણ અને સંશોધન માટે એક સહિયારો પ્રયાસ છે. તેમણે વિશ્વના તમામ દેશોને સાથે મળીને અવકાશ સંશોધનમાં સહયોગ કરવા અને નવી ઊંચાઈઓ સર કરવા માટે આહ્વાન કર્યું હતું.

 

 

વડાપ્રધાન મોદીએ ભારતના વૈજ્ઞાનિકો અને ઇસરોના પ્રયત્નોની પ્રશંસા કરી હતી અને ચંદ્રયાન-૩ મિશનની સફળતાને એક મોટી સિદ્ધિ ગણાવી હતી. તેમણે કહ્યું કે આ સફળતાએ ભારતના આત્મવિશ્વાસને વધુ મજબૂત કર્યો છે અને ભવિષ્યના મિશનો માટે નવી પ્રેરણા પૂરી પાડી છે.

 

સરકારના સૂત્રોના જણાવ્યા અનુસાર, વર્ષ ૨૦૪૦ સુધીમાં ચંદ્ર પર માનવ મિશન મોકલવાની તૈયારીઓ જોરશોરથી ચાલી રહી છે. આ માટે જરૂરી ટેકનોલોજી અને માળખાકીય સુવિધાઓ વિકસાવવા પર વિશેષ ધ્યાન આપવામાં આવી રહ્યું છે. આ મિશન ભારતને અવકાશ સંશોધનના ક્ષેત્રમાં એક અગ્રણી રાષ્ટ્ર તરીકે સ્થાપિત કરવામાં મહત્વપૂર્ણ ભૂમિકા ભજવશે.

વડાપ્રધાન મોદીના આ નિવેદનથી દેશભરમાં ઉત્સાહનું મોજુ ફરી વળ્યું છે અને દરેક ભારતીયને આ ઐતિહાસિક ક્ષણની આતુરતાથી રાહ છે.

(9:43 AM IST)