નવી દિલ્હી : ગુજરાતના બનાસકાંઠા જિલ્લાના સુઇગામ અને વાવ વિસ્તારના સરહદી ગામોમાં સુરક્ષા કારણોસર તાત્કાલિક બ્લેકઆઉટ જાહેર કરવામાં આવ્યું છે. પાકિસ્તાન તરફથી સતત થઈ રહેલી શંકાસ્પદ ગતિવિધિઓને ધ્યાનમાં રાખીને સ્થાનિક વહીવટીતંત્ર અને સુરક્ષા એજન્સીઓએ નાગરિકોની સલામતી સુનિશ્ચિત કરવા માટે આ સાવચેતીભર્યું પગલું ભર્યું છે. સૂત્રો દ્વારા મળતી માહિતી અનુસાર, પાકિસ્તાન દ્વારા ભારતનાં ચાર રાજ્યો - જમ્મુ કાશ્મીર, પંજાબ, રાજસ્થાન અને ગુજરાત પર એકસાથે હુમલો કરવાનો પ્રયાસ કરવામાં આવ્યો હતો. ગુજરાતના સિરક્રિક અને ભુજ વિસ્તારમાં પણ પાકિસ્તાની ડ્રોન દેખાયા હતા, જો કે ભારતના બ્રહ્માસ્ત્ર ગણાતા S-400 ડિફેન્સ મિસાઇલ સિસ્ટમે પોતાની ઉત્કૃષ્ટ કામગીરી બજાવીને તમામ ડ્રોનને સફળતાપૂર્વક તોડી પાડ્યા હતા.
દરમિયાન, પંજાબના જાલંધરમાં સ્થિત સુરાનુસી ઓર્ડનન્સ ફેક્ટરીને નિશાન બનાવવાનો પ્રયાસ કરી રહેલા એક પાકિસ્તાની ડ્રોનને ભારતીય સુરક્ષા દળોએ સમયસર નિષ્ક્રિય કરી દીધું હતું. આ ડ્રોનને જલંધરમાં ડૉ. બી. આર. આંબેડકર નેશનલ ઇન્સ્ટિટ્યૂટ ઓફ ટેકનોલોજી નજીક અટકાવવામાં આવ્યું હતું, જેના કારણે એક મોટો સંભવિત હુમલો ટાળી શકાયો હતો.
આ ઘટનાક્રમ વચ્ચે, યુએસ સ્ટેટ ડિપાર્ટમેન્ટના પ્રવક્તા ટેમી બ્રુસે જણાવ્યું હતું કે સેક્રેટરી ઓફ સ્ટેટ માર્કો રુબિયોએ આજે ​​ભારતના વિદેશ મંત્રી એસ. જયશંકર સાથે ટેલિફોનિક વાતચીત કરી હતી. આ વાતચીતમાં, મંત્રી રુબિયોએ પ્રદેશમાં તાત્કાલિક તણાવ ઘટાડવાની જરૂરિયાત પર ભાર મૂક્યો હતો અને ભારત અને પાકિસ્તાન વચ્ચે સીધી વાતચીત માટે અમેરિકાના સંપૂર્ણ સમર્થનનો પુનરોચ્ચાર કર્યો હતો. તેમણે બંને દેશો વચ્ચે વાતચીત સુધારવાના તમામ પ્રયાસોને પ્રોત્સાહન આપવાની વાત કરી હતી. આ સાથે, તેમણે પહેલગામમાં થયેલા ભયાનક આતંકવાદી હુમલા પર ઊંડી સંવેદના વ્યક્ત કરી હતી અને આતંકવાદ સામે ભારત સાથે મળીને કામ કરવાની અમેરિકાની પ્રતિબદ્ધતા પણ દોહરાવી હતી.