નવી દિલ્‍હી, તા.૯: ઇન્‍ડિયન ઓઇલ કોર્પોરેશન લિમિટેડ (IOCL) એ કહ્યું છે કે દેશમાં પેટ્રોલ અને ડીઝલ સહિત કોઈપણ ઇંધણની અછત નથી. દેશભરમાં પુષ્‍કળ ઇંધણ ઉપલબ્‍ધ છે અને સપ્‍લાય લાઇન પણ સંપૂર્ણપણે સુગમ છે. ભારત અને પાકિસ્‍તાન વચ્‍ચે વધતા તણાવ વચ્‍ચે દેશના ઘણા ભાગોમાં પેટ્રોલ પંપ પર લાંબી કતારોના અહેવાલો બાદ IOCL એ દેશવાસીઓને આ ખાતરી આપી છે. એક X પોસ્‍ટમાં, કંપનીએ લખ્‍યું છે કે ગભરાવાની જરૂર નથી. તેણે લોકોને અપીલ પણ કરી છે કે તેઓ કોઈ પણ જરૂરિયાત વિના ગભરાટમાં પેટ્રોલ અને ડીઝલ ન ખરીદે.

ઇન્‍ડિયન ઓઇલે 'X' પર એક પોસ્‍ટમાં લખ્‍યું હતું કે, ‘ઇન્‍ડિયન ઓઇલ પાસે દેશભરમાં પુષ્‍કળ ઇંધણ ઉપલબ્‍ધ છે અને અમારી સપ્‍લાય લાઇન સંપૂર્ણપણે સુગમ છે. ગભરાટમાં ખરીદી કરવાની કોઈ જરૂર નથી. ઇંધણ અને LPG અમારા બધા આઉટલેટ્‍સ પર સરળતાથી ઉપલબ્‍ધ છે.' કંપનીએ લોકોને શાંત રહેવા અને બિનજરૂરી ભીડ ન બનાવવા અપીલ કરી હતી, જેથી સપ્‍લાય સિસ્‍ટમ અકબંધ રહે અને દરેકને કોઈ સમસ્‍યા વિના તેલ મળી શકે.

હિન્‍દુસ્‍તાન ટાઇમ્‍સના અહેવાલ મુજબ, પંજાબના એક પેટ્રોલ પંપ માલિકે કહ્યું કે છેલ્લા બે દિવસમાં તેમના વેચાણમાં ત્રણ ગણો વધારો થયો છે. તેમણે કહ્યું, ‘લોકો ડરી ગયા છે અને ઇંધણ ઉપરાંત રાશનનો પણ સંગ્રહ કરી રહ્યા છે.'

વાસ્‍તવમાં, આ નિવેદન એવા સમયે આવ્‍યું છે જ્‍યારે ‘ઓપરેશન સિંદૂર'પછી દેશમાં તણાવનું વાતાવરણ છે. પાકિસ્‍તાન અને પાકિસ્‍તાન અધિકળત કાશ્‍મીર (PoK) માં નવ સ્‍થળોએ આતંકવાદી ઠેકાણાઓ પર ભારતના મિસાઇલ હુમલા પછી પરિસ્‍થિતિ સંવેદનશીલ બની ગઈ છે. ભારતે આતંકવાદીઓના ઠેકાણાઓ પર હુમલો કર્યો. ત્‍યારથી, નિયંત્રણ રેખા (LoC) પર ગોળીબાર અને તોપમારા જેવી ઘટનાઓ વધી ગઈ છે