દીપ્તિબેન જાની દ્વારા, ન્યૂ જર્સી : શ્રી સંતરામ ભક્ત સમાજ-યુ.એસ.એ. દ્વારા ગુરુપૂર્ણિમાના પાવન અવસરે ભવ્ય સંતરામ સત્સંગનું આયોજન કરવામાં આવ્યું છે. આ વર્ષે બત્રીસમો વાર્ષિકોત્સવ જુલાઈ ૨૦, ૨૦૨૫ રવિવારના રોજ ઓલ્ડ બ્રિજ હાઈસ્કૂલ, માતાવાન, ન્યૂ જર્સી ખાતે યોજાશે. સત્સંગ સવારના ૧૧-૩૦ થી સાંજના ૭-૦૦ કલાક સુધી ચાલશે.
સંતરામ સત્સંગની શુભ શરૂઆત શ્રી વિષ્ણુસહસ્ત્રનામ સ્ત્રોત્રમ અને શ્રી સંતરામ સ્ત્રોત્રમના સમૂહ સ્તવન દ્વારા કરવામાં આવશે. આ ઉપરાંત, નડિયાદથી ટેલિફોન દ્વારા પ્રાતઃસ્મરણીય પ.પૂ. શ્રી રામદાસજી મહારાજશ્રીના અમૃતમય શુભાશીર્વાદ પ્રાપ્ત થશે, જે આ કાર્યક્રમનું મુખ્ય આકર્ષણ રહેશે. રાજ અને સ્મૃતિ પંડયા પરિવાર દ્વારા સુંદર ભજન સંગીતનો કાર્યક્રમ રજૂ કરવામાં આવશે, જેમાં સંતરામના પદો અને ભજનોનો સમાવેશ થશે.
શ્રી સંતરામ ભક્ત સમાજ-યુ.એસ.એ. દ્વારા તમામ ભક્તોને ગુરુપૂર્ણિમાના આ પવિત્ર અવસરે આ સંતરામ સત્સંગમાં સમયસર પધારવા માટે હાર્દિક નિમંત્રણ પાઠવવામાં આવ્યું છે. સત્સંગની પૂર્ણાહૂતિ બાદ ભક્તો માટે મહાપ્રસાદની વ્યવસ્થા પણ રાખવામાં આવી છે.
ઓલ્ડ બ્રિજ હાઈસ્કૂલ (ઓડિટોરિયમ, ડોર-૮), ૪૨૦૯ કાઉન્ટી રૂટ ૫૧૬, માતાવાન, એનજે ૦૭૭૪૭ ખાતે આયોજિત આ કાર્યક્રમમાં પધારવા માટેની દિશાનિર્દેશો પણ જાહેર કરવામાં આવ્યા છે, જે ભક્તોને સરળતાથી સ્થળ પર પહોંચવામાં મદદરૂપ થશે.
શ્રી સંતરામ મંદિરમાંથી પ્રસાદી તરીકે મળેલ છઠ્ઠીનું કાપડ, કંઠી અને સાહિત્ય પ્રકાશનનો લાભ લેવા માટે (૭૩૨) ૯૦૬ - ૦૭૯૨ પર સંપર્ક કરી શકાશે. સમાજ દ્વારા કે મંદિરના નામે કોઈપણ પ્રકારનો ફંડફાળો કે ભંડોળ ઉઘરાવવામાં આવતું નથી, જેની સર્વે હરિભક્તોએ ખાસ નોંધ લેવા વિનંતી છે.