નવી દિલ્હી: ભારતીય વાયુસેનાએ પાકિસ્તાન પર વધુ એક જોરદાર પ્રહાર કર્યો છે. નવા અહેવાલો અનુસાર, પાકિસ્તાન એરફોર્સ (PAF) ના અનેક બેઝ અને કમાન્ડ સેન્ટરને બીજા તબક્કાના હુમલામાં નિશાન બનાવવામાં આવી રહ્યા છે. સમાચાર એજન્સી ન્યૂઝફર્સ્ટના જણાવ્યા અનુસાર, પાકિસ્તાનના પેશાવર એરબેઝ પર અનેક મિસાઇલો ત્રાટકી છે, જેના કારણે ત્યાં જોરદાર વિસ્ફોટનો અવાજ સંભળાયો છે.

અગાઉ, પાકિસ્તાની લશ્કરી પ્રવક્તા લેફ્ટનન્ટ જનરલ અહેમદ શરીફ ચૌધરીએ દાવો કર્યો હતો કે ભારતે નૂર ખાન, મુરીદ અને શોરકોટ એરબેઝને નિશાન બનાવ્યા છે અને હવે પાકિસ્તાને વળતો પ્રહાર કરવાની ધમકી આપી છે. તેમણે કહ્યું છે કે, "હવે તમે અમારા જવાબની રાહ જુઓ."

ન્યૂઝફર્સ્ટના અન્ય અહેવાલ મુજબ, ઈસ્લામાબાદમાં આવેલો નૂર ખાન એરબેઝ ભારતીય હુમલામાં ખરાબ રીતે ક્ષતિગ્રસ્ત થયો છે. આ બેઝ પાકિસ્તાન એરફોર્સ માટે એક મહત્વપૂર્ણ લોજિસ્ટિક્સ હબ છે. આ એરબેઝ પર IL-78 રિફ્યુલર્સ સહિત અનેક વિમાનો હાજર રહે છે, જેમાંથી એક ગઈકાલે તુર્કીથી પરત ફરી રહ્યું હતું. ભારતીય વાયુસેનાની આ સતત કાર્યવાહી પાકિસ્તાન પર ભારે દબાણ લાવી રહી છે અને પ્રદેશમાં તણાવ ચરમસીમાએ પહોંચી ગયો છે.