નવી દિલ્હી: પાકિસ્તાને થોડા કલાકો પહેલાં ભારત સામે વળતો પ્રહાર શરૂ કર્યો હોવાનું જણાય છે. જમ્મુમાં અનેક ધડાકાના અહેવાલો છે. ભારતીય એર ડિફેન્સ સિસ્ટમ સક્રિય થઈ ગઈ છે અને પાકિસ્તાની હુમલાઓને નિષ્ફળ બનાવી રહી છે. સમગ્ર વિસ્તારમાં બ્લેકઆઉટ અને સાયરનના અવાજો સંભળાઈ રહ્યા છે, સાથે જ ભારે હવાઈ ગતિવિધિ પણ જોવા મળી રહી છે. એવું લાગી રહ્યું છે કે પાકિસ્તાને તમામ તાકાત લગાવી દીધી છે અને તેમના જેટ વિમાનો બોમ્બ ફેંકવાનો પ્રયાસ કરી રહ્યા છે, જેના કારણે ગંભીર ડોગફાઈટની સ્થિતિ સર્જાઈ શકે છે.

સુરક્ષાને ધ્યાનમાં રાખીને લોકોને ઘરોમાં સુરક્ષિત રહેવાની સલાહ આપવામાં આવી છે. ભારતીય સૈન્ય દ્વારા ઓપરેશન સિંદૂર ફેઝ ૩ અંગે આજે સવારે ૫:૪૫ વાગ્યે સાઉથ બ્લોક ખાતે એક પ્રેસ કોન્ફરન્સ યોજવામાં આવશે, જેમાં ભારતે પાકિસ્તાનના ઓછામાં ઓછા ૩ એરફોર્સ બેઝ પર હુમલા કર્યાની માહિતી આપવામાં આવશે.

ગઈકાલે રાત્રે પણ જમ્મુમાં સંપૂર્ણ બ્લેકઆઉટ અને અનેક ધડાકાના અવાજો, હવાઈ ગતિવિધિઓ અને સાયરનના કારણે તંગદિલીભરી સ્થિતિ રહી હતી. પાકિસ્તાનના એરબેઝ પરના હુમલા બાદ ભારતના તમામ મોટા શહેરોને ‘હાઈ એલર્ટ’ પર મૂકી દેવામાં આવ્યા છે. આ ઉપરાંત, અમૃતસરના આકાશમાં એક મિસાઇલ જેવી વસ્તુ પણ જોવા મળી હતી, જેના કારણે લોકોમાં ભયનો માહોલ છે.